［人性/有甜］- 屍•家•馬鞍山（隔日更新）: Chapter 689 - 門衛

「JoJo，我哋一齊去啦！」Miki 並沒有放棄，繞著 JoJo 的手臂便一起出發。

這人，真的窮追不捨...

我們一行四個人，就這樣往林牧師的所在走去。

那我，真的要問嗎？

「阿 Roy 你係咪信教㗎？」JoJo 邊行邊問道。



「冇喎～ 做乜咁問？」我好奇地問道。

「咁 Vicky 呢，妳係唔係教徒？」JoJo 轉向 Vicky 問道。

「唔...」Vicky 搖頭否認。

「如果唔係教徒，就連搵牧師訂婚都唔得？」我插口問道。

「我好似冇聽過教會有訂婚呢個儀式...」JoJo 答道，「所以...」



「所以咪要問吓牧師囉～」我搶答道。

「嗯... 都係嘅～」JoJo 亦只能認同。

「喂，你哋諗住去邊呀？」出現在眼前的，是消失了一陣子的阿君。

「我帶阿 Roy 同 Vicky 去見林牧師，佢哋有啲嘢要搵佢...」JoJo 搶先答道。

「搵林牧師...」阿君若有所思後答道，「哦... 佢啱啱訓咗覺喇喎～」



大家都是半信半疑...

「係呀？」JoJo 覺得有點可疑，「等我入去睇吓牧師先～」

「JoJo... 牧師有啲唔舒服，啱啱食咗啲藥訓咗...」阿君答道，「我覺得妳哋，都係唔好打攪佢喇...」

雖然覺得他不太可信，但若然他所言非虛，我們貿然打擾也好像有點不妥。

「如果係咁都冇辦法啦～」我主動提議道，「我哋聽日再搵佢啦～」

「嗯... 咁好啦！你哋而家返去休息吓，食啲嘢先...」JoJo 無奈地說道，「聽朝再嚟過啦～」

「嗯...」既然如此，我們只好先行回去。

「喂咪行住！」阿君郤從後把我們叫住。



眾人立即停下腳步，回頭查看他所謂何事。

「你... 你哋又食又住，唔洗做返啲嘢呀？」阿君義正嚴詞地問道。

「......」各人對他的要求，一時間無法反應。

「我哋嘅搜索隊仲未返到，咁... 咁點都要有人守門口㗎～」阿君補充。

「喂！守門口不嬲都係你同班豬朋狗友嘅責任喎！」JoJo 不忿地說道，「人哋今日啱啱先嚟，嘢又未食，你就點人哋做嘢？」

「佢都講得啱嘅...」我安撫著 JoJo 道，「你哋比咗休息嘅地方，同珍貴嘅水我哋，我哋都好應該做返啲嘢...」

「不過...」JoJo 好像仍不太認同。



「唔洗不過喇...」我補充一句，「咁大家就冇拖冇欠啦！」

「呃... 咁好啦...」JoJo 只好無奈地說道，「我一陣攞啲嘢食比你哋啦～ 你哋自己都要小心啲...」

「得喇！我哋自己會小心㗎喇！」我回答後向 Vicky 說道，「Vicky... 妳會唔會同我一齊？」

「嗯！」Vicky 肯定地點頭答道。

「多謝妳...」我拖著她的手說道。

「咳咳... 係咪行得喇？」阿君不耐煩地問道。

「行囉～ 洗唔洗咁急呀？」我怒吼道。

於是，阿君便帶著我們二人前往閘門附近。



「君哥... 你好！」原本在閘門前閒聊的二個年輕人，看到阿君前來後，便恭敬地向他問好。

「嗯... 冇乜特別吖嘛？」阿君板起著臉向二人問道。

「冇... 近排都好似唔見啲怪物出現喇～」其中一人答道。

「嗯... 咁咪好囉，優差一份...」阿君向我說道，「係咁意坐返一陣，就又有水、有嘢食，又有地方瞓，幾好呀！」

我沒有發聲，只是怒瞪著他。

「好喇～ 由得佢哋啦～」阿君沒有回應，只是帶領他的手下離開，「啲架生帶走埋得㗎喇...」

「佢哋咁犀利，唔需要㗎喇！」他說罷便往幼稚園出向走去。



我們亦慢慢走向，閘門前由兩張小凳組成的所謂崗位。

眼前所見，只是一片黑暗與寂靜...