［人性/有甜］- 屍•家•馬鞍山（隔日更新）: Chapter 627 - 藏身的洞穴

我見 Vicky 沒有抗拒，便進一步加強熱吻的深度。

剛才沒有為意自己身處何方，於是我分神打量四週，發現這裡很大可能是個山洞。

這裡除了我們，好像沒有其他人。

於是，我的手又忍不住往她身上撫摸。

「嗯...」Vicky 只顧投入熱吻，並沒有太大的反應。



因此，我的手再往她胸前移動...

「喂呀... 有其他人呀！」這一趟，她終於伸手將我輕輕推開。

有其他人？

是的，我差點忘記我們是給同伴救回。

「係喎，差啲唔記得咗添！」我只好裝作善忘，「不過，唔見 Dickson 嘅？佢喺附近？」



「唔... 我諗佢哋... 出咗去...」Vicky 往外張望後説。

「咁咪得囉～」我聽後，便再伸出手往她身上遊走。

「喂！仲有 Carey 同泫雅喺出面呀！」Vicky 反駁說。

原來如此...

「咁我哋不如趁機走囉！」我向 Vicky 提議道。



「吓！我都係多得 Dickson 佢救咗我，如果唔係...」Vicky 好像不太同意，「如果我哋就咁走咗去，好似唔係咁好...」

「咁妳即係要留喺度報恩，唔洗理我啦！」我實在有點醋意。

「係喎！我諗可能要以身相許喎～」她好像有意挑釁道。

「咁又係... 我又冇人哋咁大隻、咁靚仔...」，我故意回應道，「妳諗住同佢一齊都啱嘢～」

「你啱啱先話愛我，而家又想推我比人...」Vicky 聽到我所講，立刻向我表示不滿。

「係喇... 得喇...」我立刻安撫她一下。

「喂！你哋打情罵俏完未？」泫雅突然帶著 Carey 走了進來，「出面打緊仗，你兩個仲好意思嘅！」

我一臉茫然，不知道她所道何事。



「啲怪物仲喺附近，所以我哋先匿住喺度先...」泫雅再解釋道，「一有機會，我哋就要即刻走...」

我見泫雅的眼神有點奇怪，於是我只好憑直覺回答，「知道喇～ 橫掂都要等埋佢哋返嚟先㗎啦！溫馨吓又有乜所謂喎～」

「咩冇所謂呀！」泫雅突然叫道，「佢... 佢哋話啲怪物嘅主要目標係我哋，所以佢哋特登出去引開啲怪物，叫我哋一有機會就自己走先！」

「吓？得我哋班老弱婦孺？」我對此完全沒有信心，「一比班怪物發現，實比人 team kill 㗎喎～」

「你係咪男人嚟㗎？」Carey 突然插口道，「Dickson 就比你呢個無頼，有責任感得多喇！」

她，明顯話中帶刺...

「哈！睇嚟你都有唔少仇家喎...」泫雅亦不忘冷笑道。



我不想給比下去...

「好～ 走咪走囉！」我實在心有不甘，「不過就算我哋走得甩，都要知去邊㗎！」

「咁呢層你又唔洗擔心...」泫雅回應道，「我哋已經約好咗個地點，不過 Dickson 話安全起見，唔好話你知住...」

「妳始終信佢唔信我？」我不甘地問道，但說罷便隨即感到後悔。

因為，我在她們的眼中，根本沒什麼地位可言。

「嘩！你都真係幾厚面皮㗎喎～」泫雅嘲諷道，「你係咩人自己知啦！仲妄想同人哋比？」

「Vicky... 妳都係快啲同呢個衰人割蓆好喇～」泫雅仍是咬著不放，「如果唔係，遲啲你就會後悔㗎喇～」

我頓時被她說得，面目無光。



「呢個男人，真係靠唔住㗎...」她特意走到 Vicky 説道。

我怒視著她，但因我不想 Vicky 對我的誤會加深，所以還是沒有把她制止。

「係呢，我哋洗唔洗出去睇吓外面個情況？」幸好 Vicky 並沒有受泫雅影響，只關注外面的環境。

「Okay... 咪出去望吓先囉～」泫雅見挑釁不成功，只好無奈地步出。

我亦留意了一下 Carey 的表情，可是她只顧低著頭，完全沒有跟她眼神接觸的機會。

看來，她真的對我死心...

無言的我，亦只好緊隨其後，走到外面查看。