［人性/有甜］- 屍•家•馬鞍山（隔日更新）: Chapter 564 - 與 Irene 的相談

「有人開始發起遊行示威，向政府提出抗議，不過每一次都冇引起太大嘅關注...」Irene 續說。

「之後網上就有人傳，圍住喺封鎖區外面嘅軍警，好快就會放棄新界，撤退到九龍防守...」

「吓？咁啲人有咩反應？」我問道。

「啲人起初都半信半疑，不過傳吓傳吓，呢人就開始喺新界區逃亡...」Irene 答道，「但係政府就好快封鎖咗，新界出九龍嘅幾條隧道同公路，出入都要接受檢查...」

「就連主要嘅行山徑，都有重兵駐守...」她補充。



「咁睇嚟，政府真係好似早有準備...」我插口說道，「不過，會唔會只係網上傳嘅流料？」

「我真係唔知...」Irene 繼續解釋道，「政府就話咁做係要防止流民出現，令到社會出現混亂...」

「佢哋又頒布咗宵禁令，唔比人夜晚十二點之後喺街上面流連，如果冇合理解釋，就直接拘捕...」

「自此之後，啲人又好似咩事都冇發生過咁，返番自己屋企，第二日又正常咁返工返學...」

雖然聽落荒謬，但我又相信現實真的如此。



「咁啲人有冇諗過離開香港？」我再問道。

「唉... 冇啦！」Irene 無奈哋說道，「自從傳出咗喪屍事件，其他國家都即刻停止咗香港人入境...」

「除非你有頭有面，如果唔係，你就連大陸都返唔倒...」

十二時之後便宵禁，那異生教便可以在深夜渺無人煙的時候，肆無忌彈地去偷運這些人偶。

果然，一切都是在相互地配合著。



但，為何阿聰卻沒有跟我敘述那麼多？

「話時話，你嗰日仲有冇救倒其他人？」Irene 看來有點擔心其他人的安危。

「好抱歉，當時我已經再見唔倒其他生還者...」我如實回答。

「係呀？」Irene 好像若有所思。

「妳有朋友要搵？」我好奇地問道。

「吖... 都係我啲同事啫...」她答得有點兒敷衍。

「男朋友？」我進一步打探道。

「唔... 唔係...」Irene 慌忙地否認，「我都冇男朋友...」她的聲音漸漸變少。



「Okay... 明白...」我知道她沒有說出真心話，「咁妳同事有乜特徴？」

她猶豫了一下，似是要想清楚才回答。

「其實都冇乜特別，只係普通嘅男男女女...」她回應道，「真係要見到先講倒你知...」

「Okay... 我哋出去嗰陣留意吓啦！」我只好這樣的回應。

「嗯...」她亦只是淡淡地點了一下頭。

氣氛，突然變得有點尷尬...

「吖！我哋一陣就會出去，妳會唔會跟埋嚟？」我打破沈默。



「嗯... 我一個人都唔知可以去得邊...」她看似滿懷心事，「如果你哋唔介意，就帶埋我走啦！」

「不過，你決定咗去做邊件事先？」她打量著我問道。

我猶豫了一會，便十分堅定地答道，「當然係搵咗我啲同伴先啦！」

「因為，呢樣係關乎全人類嘅安危...」我認真地答道。

「不過... 你嗰兩個朋友，好似唔係好想同你一齊去喎！」Irene 說道。

「係... 不過我唔會留低佢哋自己出發...」我向她表示立場，「所以喺未有共識之前，我係唔會出發住。」

「哦... 明白...」她靠近我說，「如果我冇估錯，Vicky 應該係你女朋友啦！」

Irene 亦靠近得有點過分；她那柔軟的胸脯，正牢牢貼緊在我的手臂之上。



原來她的衣服裡面，竟是完全真空...

「嗯... 係...」偶一分心的我，亦只好坦承地回答。

「果然...」Irene 微笑地說道，「咁不如交比我，說服佢哋出發啦！」

「始終，女人同女人講嘢方便啲...」她補充。

「咁就麻煩曬妳...」我當然樂於接受她的幫忙。

「不過，我有一個條件...」看來，她也善於把握機會，討價還價。

「好... 妳講嚟聽吓先...」我想先知道她的底牌，才決定要不要接受她的幫忙...