［人性/有甜］- 屍•家•馬鞍山（隔日更新）: Chapter 530 - 落難鴛鴦

Vicky 這才留意到那對青年男女的存在，我向她交代一下剛才的對話後，她便主動趨前向二人接觸。

「你哋喺邊度嚟㗎？」Vicky 向二人問道。

「我哋原本同同學放咗學之後，參加緊課外活動...」青年開始說道，「本來都冇乜嘢，不過我哋食完餐晚飯之後，就好多人都話好攰想休息...」

「咁我就諗住喺飯堂瞌一陣，點知瞓醒之後，已經唔知自己去咗邊度...」

「咪住先！」我忍不住插口問道，「你話你參加緊課外活動？你間學校喺邊度？」



「將軍澳...」青年帶點疑惑地答道，「有乜問題？」

「問題就係，你哋係比人喺封鎖區出面捉咗入嚟...」我回應道。

「吓？咁呢度係邊度？」他問。

「西貢囉！你哋唔係唔知吖嘛？」我感到不可置信，「你哋唔認得啲路，都見倒啲路牌吓嘩？」

青年只是搖頭回應。



「之前網上都有傳過有人失蹤...」他補充道，「不過政府好快否認咗，話網上留言者不負責任。而討論區相關嘅帖又好快比人 delete 曬，所有嘢都好似無聲無息咁消失咗...」

「吓，照你咁講，唔通政府一早已經知情？」Vicky 亦插口問道。

「都有可能...」我答道，「不過亦有可能係政府仲調查緊，唔想打草驚蛇... 又或者唔想製造恐慌呢！」

當然，我亦十分懷疑，政府只是對西貢及馬鞍山地區作出封鎖，但卻沒有出手去徹底解決喪屍問題，背後一定是有什麼原因。

「你繼續講...」我向青年示意。



「嗯... 當我醒返嗰陣，就發現我、凱琪、十幾個同學，同埋其他唔識嘅人，一齊困咗喺一間大房入面...」青年續說，「佢哋唔比衫我哋著，又淨係比好少嘢我哋食...」

原來，面前這一聲不響的少女叫凱琪。

「我哋又凍又餓，環境又臭又污糟，所以我哋都好想偷走...」

「不過，我哋都知道就咁走唔會成功，於是我哋夾埋等機會...」

「原本我哋準備好下次班人再入嚟嗰陣，就一齊上去制服佢哋。但係當班人再出現嗰陣，佢哋已經唔理三七廿一就打落嚟，跟住就朦住我哋對眼，綁埋對手帶我哋走...」

「我哋比人帶咗上車，不過好似坐咗唔係好耐，架車又再停低咗...」

「跟往我就 feel 倒有人比人帶咗落車，然後就喺出面傳嚟好悽厲嘅叫聲。我哋睇唔倒嘢，又比人綁住，所以都唔知點做好...」

「之後就喺啲女仔嘅慘叫，同埋男人好似野獸咁嘅叫聲... 有啲人仲用啲唔咸唔淡嘅廣東話，話乜嘢橫掂都死，不如益吓我哋咁...」



「我覺得佢哋係想殺死我哋，所以我即刻起身諗住衝出去。點知行唔夠兩步，個後腦就比人扑咗吓，之後就冇咗知覺...」

「到之後醒返，已經訓咗喺堆死屍度。如果唔係凱琪係咁拍醒我，我都唔知會暈到幾時...」

「咪住先，點解淨係妳會冇事？」我移近少女問道，「阿凱琪？」

她好像十分驚恐，只是瑟縮在青年身後。

「喂！你唔好嚇親人啦！」Vicky 立刻走過去安慰。

凱琪對此也看來十分受落，立刻好像找回親人一樣依偎在 Vicky 身上。

但與此同時，我亦發現青年正窺看著，由 Vicky 領口露出的一絲春光。



甚至，他已經作出了生理反應。

「咁即係點？」我改以尖銳的眼神掃視著青年。

「哦... 不... 不如我幫佢答...」青年立刻把不規矩的視線收起。

「凱琪話佢都唔係太清楚，因為嗰日有人想攪佢，佢係咁掙扎，個男人就一怒之下打暈咗佢...」

「到佢醒返之後，就已經同我一樣喺屍體堆上面。當時佢好驚，不過佢發現綁住自己嘅繩唔算好緊，佢鬆綁之後，就想快啲搵返我...」

「好彩我就訓咗喺佢附近... 佢發現我仲有呼吸，所以就用力拍醒我，希望我可以快啲醒番。」

「佢話拍咗我好耐先醒，不過嗰陣黑媽媽，周圍又冇人，佢好驚唔敢走開，唯有一直咁叫我拍我。」

「而我之後都終於醒咗，不過周圍太黑我完全認唔到呢度係邊度，唯有趁住有月光一直反方向行，直至發現咗呢間大宅...」



「我哋幾經辛苦先爬倒入嚟，好彩入面冇人，道玻璃門又冇鎖...」

「咁我哋咪諗都唔諗，即刻衝入嚟諗住避一避囉！」

「點知我哋入嚟冇耐，外面就傳嚟砰砰嘭嘭嘅槍聲，嚇到我哋匿喺被竇度，唔敢出嚟...」