［人性/有甜］- 屍•家•馬鞍山（隔日更新）: Chapter 468 - 新來的四人

天空中烏雲密佈，完全看不到前路。

我拿著剛才在士多拿取的手電筒，往營地的外圍走去。

幸好，沒有動靜。

我轉而走向營地群，發現最遠的大帳篷滲出了些許的亮光。

那是，剛才那四名女子的帳篷。



我走到附近，聽到她們正竊竊私語。

那好，這可以讓我打探一下消息。

「Hello... 唔好意思，會唔會阻住妳哋？」為免把她們嚇著，只好先詢問她們的意見。

「嗯...」她們又好像商量了一下，「Okay... 你入嚟啦！」

我慢慢地把帳幕掀開，走進裡面。



「Hi... 我叫阿 Roy，妳哋好！」我先介紹自己。

「Hi...」只有我們一開始便遇上的女子輕聲地回應，其他三人都只是輕輕的點頭，「你好，頭先都唔記得多謝你... 我叫阿 Pat，呢個係我細妹阿 Moon...」

我打量著阿 Moon，從她的眼神看來，她已經回復了不少。

而其他的二人，看來還是雙眼通紅。

「佢兩個分別係 Maggie 同 Yu 仔...」Pat 繼續介紹道。



我的眼光不其然向各人看去... 這才令我想起除了 Pat 之外，其餘三人都只能以泳衣和沙灘巾敝體，令我感到有點尷尬。

「妳哋一早就識？」我嘗試打開話題。

「吖... 唔係，我哋都係啱啱先互相認識...」Pat 回應道，「我哋諗住住埋一齊，有咩都容易照應...」

確實，這四個同病相連的弱質女子，走在一起也好作互相依靠。

「咁... 妳哋冇乜嘢啦嘛？」我親切地問道。

「嗯... 多謝你救返我哋出嚟，依家個感覺好啲...」Moon 終於也願意回答我的提問。

「舉手之勞啫！」雖然我這樣說，但實情是我們原本也不太願意。

「阿 Roy，你可唔可以代我同頭先個女仔講對唔住呀？」Pat 尷尬地問道，「頭先我太心急...」



「我諗佢冇乜嘢嘅...」我淡然地回答，「不過我哋聽日就要起程離開呢度...」

帳篷內頓時鴉雀無聲。

「吖係呢，你哋係點嚟㗎？」Moon 首先打破沈默。

「真係說來話長...」我真的不知從何說起，「簡單嚟講，我哋係由台灣坐救生艇返嚟嘅...」

「嘩！台灣咁遠？坐救生艇嚟咁犀利？」Moon 覺得有點不可置信。

其實，我也有一刻曾經懷疑過，但卻苦苦無法印證。

我也認為，那時我們並沒有走到那麼遠。



「嗯...」我只有模稜地答道，「其實我哋都唔係太清楚，糊裏糊塗就返咗嚟...」

「咁我哋都算幾好彩，預倒你哋...」Moon 眼裡流露出一點感激之情。

「都係小事啫，唔洗擺喺心...」一路以來，我都幫過數不清的人了。

「不過，可唔可以幫多我哋一個忙？」Moon 誠懇地問道。

其實，我都大概知道她所問何事。

只是，這一趟我真的不想冒險。

「喺我應承之前，妳可唔可以話比我知，呢度發生過咩事？」我想弄清楚發生過什麼事情。

雖然，這有點在她們傷口上撒鹽。



但若然她們真的無法說出口，這也能給我一個拒絕的藉口吧！

「唔...」這一趟，Moon 好像面有難色。

她與 Pat 互相交流了一下眼神，便嚴肅的跟我說。

「喺呢度講唔係咁方便，不如...」Moon 的神情變得有點奇怪，「不如我去你嗰度再傾...」

Moon 的要求好像有點唐突，但我更想知道她葫蘆內買什麼藥。

「Okay... 我同妳過去...」沒有什麼顧慮，我便爽快應承。

「咁好啦！我同家姐傾幾句先，我轉頭過你度搵你吖？」Moon 向我說道。



「Okay... 咁我返去先！」我只有先行回去。

我回到自己的帳篷內等待，出奇地，心情有點緊張。

而不消一會，Moon 便出現在我的帳篷之前...