［人性/有甜］- 屍•家•馬鞍山（隔日更新）: Chapter 423 - 貨輪的秘密

我打量著四周...

想不到，這艘船竟然有另外的一個醫療室。

「咦？呢度同之前嗰間...」我好奇地問。

「係... 我哋都係睇倒隻船嘅平面圖，先知呢度嘅醫療室有兩間...」素恩幫忙解答道。

一般的貨輪，為何需要兩個地處不同的醫療室？



「咁妳哋仲有冇發現其他奇怪嘅地方？」看來 Keith 已經有著與我一樣的疑問。

「有... 我發現呢道有好多閉路電視...」美鈴亦道出她的發現，「其中一部係影住醫療室外面，所以我哋都好放心比佢哋入去唞吓...」

「你哋一路都睇住？」我問。

「係呀！」美鈴爽快地回應，「咁當然唔會金睛火眼咁望住啦！」

我想一想，那即是代表在我們登船之初，已經很有可能被人發現。



「話時話，咁妳即係由頭到尾都冇見過太師？同埋，妳係咪冇見倒華叔發生咗咩事？」我想向美鈴得到多一點的情報。

「冇... 上咗船之後，就冇再見過...」美鈴回應道，「至於華叔... 我就更加唔知佢有咩事...」

我看著她，好像有點奇怪的感覺。

但是現在，我又說不出有什麼不妥。

美鈴說罷，已經伸手去把醫療室的門打開。



大門打開，卻沒有發現 Carey 她們的蹤影...

「Carey？Carey？」我立刻內進呼喚著，可惜沒有意外。

「素恩，同我一齊出去...」我把華叔放在床上，便打算外出尋找。

「大佬，你冷靜啲先...」Keith 卻出手阻攔著，「呢度已經好似一座孤島咁，佢哋應該唔會去得邊度...」

「呢層我都知，我只不過怕佢哋比啲怪物...」我把說話停住，因不想說的變成事實。

「我明白...」Keith 仍是冷靜的回應道，「不過呢度唔似有打鬥過嘅痕跡...」

「我諗若果啲怪物有嚟過，佢哋點都會反抗...」Keith 補充道，「更何況啲怪物一般都唔會將人捉走...」

這一點我卻不盡同意，Janice 不是給 Jacky 捉走禁錮嗎？



但是，我認同這裡不像有怪物來過。

「咁不如上返駕駛室去睇返個閉路電視吖...」素恩提議著說，「可能會搵倒啲線索...」

冷靜的素恩，總是在我迷惘中指引方向。

「係喎！」我不禁大叫道，「咁我上去望望先...」

「Keith，咁你...」我轉向 Keith 說道。

「得喇！呢度交比我啦！」Keith 完全明白我的想法，「我會睇住佢哋㗎喇！」

「我同你一齊去吖...」素恩二話不說，已經提議跟我同去。



「嗯...」我當然沒有拒絕，拉著她的手便一起前往。

沿途再沒有什麼阻礙，我們很順利便回到駕駛室中。

素恩亦很快引領我到裡面的房間，去觀看閉路電視片段。

我們正打算回看醫療室外的紀錄，卻不慎開啟了另一段錄影。

而這個監察著機房大門的鏡頭，卻出現了另一個身影。

「呢個咪 Dickson？」我想向素恩查證。

「睇嚟係...」素恩也認同我的說法，「不過機房度門唔係鎖咗㗎咩，點解佢會開倒嘅？」

「唔通佢有鎖匙？」她繼續說道。



「佢無啦啦點會有貨輪鎖匙㗎？」我重新思考了一下，「之前我都覺得佢有問題㗎喇... 唔通，佢係太師嘅人？」

「我睇又唔似...」素恩不表示認同，「不過我可以肯定，佢唔係普通人...」

「咁會唔會同 Clara 佢哋一夥？」我推論道，「佢咁啱又喺外國返嚟，身手又咁好...」

「好大可能...」素恩思考著，「咁佢入去機房做乜？」

「我諗淨係有一個可能...」我說，「就係要隻船開返...」

「你睇...」我指向顯示屏上說，「呢個同開船時間好吻合。」

「咁即係隻船係 Dickson 控制佢返轉頭㗎啦！」素恩凝視著顯示屏說，「不過佢點樣控制隻船，佢又喺隻船入面，就唔怕比我哋捉倒？」



「佢唔怕...」我再指向另一屏幕說道，「因為佢已經準備咗後路...」