［人性/有甜］- 屍•家•馬鞍山（隔日更新）: Chapter 422 - 被操控的巨輪
我們慢慢地走著，終於也回到了駕駛室外。
而原來美鈴跟素恩，早已站到門外等候。
她們看見我們的情況，可說是又悲又喜。
不過，看來悲絕對比喜多。
「美鈴... 妳冇事嗱？」芷蕾看到她，好像重拾一點歡顏。
「嗯... 啱啱醒返冇耐...」美鈴摸著頭答道。
「芷晴佢？」美鈴帶著惋惜的神情，看著 Keith 懷中的芷蕾問道。
「嗯... 佢已經...」芷蕾哽咽地說。
「吖... 芷蕾妳都好似受咗傷喎，我同妳去醫療室包紥咗先...」美鈴幫手攙扶著芷蕾道。
「不過美鈴，係咪妳哋開返隻船？」Keith 拍著她的肩膀問道。
「呀！我都啱啱想問，做乜隻船自己會郁嘅？」美鈴好奇地問道，「我哋一直喺入面，都冇郁過的嘢...」
那即是代表，這艘船並不是被她們操控著？
莫非，有裝置控制著貨輪的移動？
我探頭往駕駛室查看，卻發現看不到其他人的身影。
「咦？Carey 佢呢？」我向她們問道。
「佢話唔係好舒服，想休息吓...」素恩回答道。
「佢唔喺入面？」我追問。
「嗯... 佢話想訓一陣，所以落咗醫療室...」美鈴幫忙回答。
「吓？得佢自己一個？」我感到有點不安。
「唔係，Daphney、Aki 同緊佢一齊...」素恩説道。
「哦...」我仍是有點不放心，但放在眼前的，還有更重要的事情。
「美鈴，妳知唔知機房嘅情況...」我向她問道，「同埋，究竟妳哋發生咗咩事...」
「我諗大家都需要包紥，不如一路落醫療室一路講...」美鈴說著已經攙扶著芷蕾往前走。
「喺怪物襲擊我哋嗰日，我哋已經覺得基地嘅情況有啲奇怪，太師同佢幾個心腹都唔知去咗邊...」美鈴開始說道。
「之後怪物嚟到冇幾耐，就有全副武裝嘅士兵拍我哋度門，跟住就用眼罩套住我哋，話要帶我哋去安全地方...」
「咁華叔同 Vicky 佢哋呢？係咪同一時間比人捉咗上船？」我追問道。
「呢層我唔太肯定... 因為我上咗船之後，佢哋就比我自由活動...」美鈴答道，「不過我一路都冇見過華叔佢哋，只係見到阿 King 同 William。」
「我試過問阿 King，佢哋話自己都係比人帶上船，所以唔清楚...」美鈴補充道。
看 King 他們剛才的表現，很難令我信服他們全不知情。
「係呢，你有冇見倒佢哋？」美鈴打量了我們後問道。
我不知道應否將真相告知。
「King 同 William 比我哋殺咗！」想不到 Keith 竟將真相說出來。
「哦... 係呀...」美鈴卻比我想像中冷靜。
「美鈴，我好明白你嘅心情，但佢兩個係我哋嘅敵人...」Keith 安慰道。
「我知... 我明白...」美鈴好像在自說自話。
「係呢，咁點解你之後會暈咗喺醫療室嘅？」我想另闢話題。
「吖... 其實我都唔係太清楚...」美鈴摸著頭說道，「我淨係知道隻船行咗唔夠兩日，就突然停咗喺度，跟住就有怪物喺啲貨櫃度衝出嚟...」
「之後出嚟嘅怪物越嚟越多，阿 King 佢哋都忙住同啲怪物戰鬥。所以佢就派咗一個小隊嚟保護我去匿埋先...」
「點知我哋走咗冇幾耐，就比啲怪物圍攻。」美鈴帶點驚恐地答道，「我哋一路打一路走，一直退到醫療室入面，佢哋已經死淨幾個人...」
「跟住有隻怪物衝咗入嚟，混亂間我好似比人打倒，就失去知覺暈咗...」
「再之後，我就見到你哋喇...」美鈴說得猶有餘悸。
聽她說完，我感到有點奇怪。
因為剛才的戰鬥，那些士兵不是正在幫助著怪物，反而向我襲擊嗎？
難道，一切另有內情？
我們一路說著，卻已經走到了醫療室的門外...