［人性/有甜］- 屍•家•馬鞍山（隔日更新）: Chapter 399 - 神秘的黑先生

我打量了首領那一身全黑隱秘的打扮，令我實在想不明白，他為何要如此徹底的去隱藏身份。

難道，他是我們認識的人嗎？

「客套話就唔多講喇，我諗你都趕住去救你啲朋友...」黑先生向我說道，「我會叫阿 Keith 同芷蕾佢哋去幫你手，不過大前題係，你有咩方法去追太師？」

一言驚醒夢中人，我只是盲目地向前走，卻沒有想到這一點。

「佢坐嘅船行得唔快，要追都唔算太難，不過你搵唔搵倒船去追佢？」黑先生問。



確實，太師已經把所有的船開走。

難道真的沒有辦法？

噢不！我突然想起了 Tommy 提及過的遊艇。

記憶中，它好像停泊在泥涌碼頭附近。

只是，我亦記得遊艇的燃料已經耗盡...



「船我應該可以搵倒，不過就要再搵啲油先得...」我回應黑先生道。

「唔... 遊艇發動機用嘅柴油，我哋呢度都有啲...」黑先生說道，「不過我哋自己都唔係好夠用，真係冇辦法借比你...」

我感到有點失望，但我也明白，不能為了自己的私利而犧牲其他人。

雖然，我不久前才試過。

但那只是因為在緊要關頭，若非迫不得已，我決不會那樣做。



「黑先生，咁你可唔可以話比我知，啲油喺邊度攞嘅？」我打算自己去解決面前這難題。

「嗯... 呢度本身都有啲存貨，不過之後嗰啲就係去警署隔離嗰個油站攞嘅。」黑先生指示道。

「Okay，唔該曬你！」雖然有很多東西想跟他問個明白，但當務之急，是先要把 Vicky 等人尋回。

「雖然有啲唔好意思，不過我真係有啲趕時間，想而家走先...」我打算先向黑先生道別。

「我明白，你有緊要嘢做就走先啦！」他爽快地回應，「Keith，你帶埋紫蕾佢哋一齊去啦！」

Keith 點頭示意，便與我一起轉身離開。

「Keith、Roy～」黑先生突然從後把我們叫住，「你哋小心啲...」

我回頭看着他，有一種不能形容的感覺。



他到底是誰？

「放心啦黑先生，我會照顧好阿 Roy 㗎喇！」Keith 搶在我作進一步行動之前，已經打完場地回應道。

我亦爭取時間出發，不去多作糾纏。

門外的 Dickson 並沒有閒著，已經與 Daphney 愉快地談天說地起來。

我回到素恩所在的房間，看到她正躺在床上休息。

「妳喺度唞吓先，我出一出去搵啲嘢，再返番嚟接妳...」我不想打擾在睡夢中的她，只好交代一句後，便準備與其他人離開。

「阿 Roy...」病床那邊傳來微弱的聲音。



我立刻返回查看，卻見素恩正努力從床上爬起。

「素恩... 妳冇事嗱？不如妳休息多一陣先啦！」我急不及待向她回應道。

在她身旁的芷晴，亦好像給我突如其來的反應嚇了一跳。

「我冇事... 帶埋我一齊走吖...」素恩氣若游絲地答道，「我唔想留喺度...」

我也十分明白，讓她停留在這個地方，確實不太理想。

但以她現在的身體狀況，跟我們在一起也是十分冒險。

「不過，妳都係唞吓好啲喎～」我始終放心不下。

「唔洗啦... 你睇，我已經差唔多好番曬...」素恩說著，已經準備下床。



我看她移動得十分勉強，真的無法說服自己讓她同行。

「妳都係休息吓啦！」我按著她的雙肩，然後轉向芷晴說，「麻煩妳幫手照顧佢...」

我還是決定離開。

「阿 Roy！」豈料素恩還是不肯罷休，「如果你唔比我跟住去，我都會自己走出嚟搵番你！」

看來，她真的下定了決心。

反正留低也不一定安全，倒不如讓她跟著我們一起。

於是我返回床邊，讓她靠在我的背上。



「我比妳跟住嚟都得，但係妳要應承我，唔好離開我三尺範圍之內...」我對素恩開出條件...