［人性/有甜］- 屍•家•馬鞍山（隔日更新）: Chapter 390 - 暴力蔓延

Dickson 説得猶有餘悸。

「過咗冇耐，個男職員已經冇再抽搐...」Dickson 續說。

「第一個犧牲品出現咗之後，啲人就好似借啲意就發爛咋。而一打起上嚟，就好似一定要置人於死地咁。」

「越嚟越多人受傷同死亡，屍體又開始腐爛，環境變得越嚟越差。有啲人開始沿路軌走過去恆安，諗住一直走離開馬鞍山。」

「我原本都想走，不過我一心諗住嚟馬鞍山搵我女朋友，我冇理由就咁走咗去。無辦法之下，我唯有繼續留低。」



「不過留低最迫切嘅係糧食問題，原本我帶咗啲乾糧，一早已經比我食曬。之前又冇去搶嘢食，嗰陣真係唔知點算。」

「雖然我唔想搶人嘢，不過人有時迫於無奈，都係會做得出平時唔會做嘅嘢...」

「不過我都有低線，就係盡量唔傷人。於是我就搵咗幾個志同道合嘅後生仔，諗住一齊出去搵嘢食。」

「我哋叫啲職員幫手睇吓閘外面有冇喪屍，肯定安全之後，啲職員就拉開少少度閘比我哋出去。」

「我哋第一個目標係馬鞍山廣場一樓間七仔，始終近近哋，我哋冇乜經驗又唔敢走咁遠。」



「咁第一次行動都好成功，搵倒唔少食物返嚟。不過我哋返去之後都將啲戰利品分比其他人，因為我哋知道，唔分享咁啲成果，我哋只會成為公敵。」

「自從第一次成功咗之後，肯一齊出去嘅人變得越嚟越多。而我哋都行得遠咗，上到去馬鞍山廣場二樓嘅超市攞嘢...」

「不過另一面嘅新港城就有好多怪物徘徊，所以我哋都冇去到嗰頭。」

「過咗一、二日，馬路上面突然出現咗一啲軍隊，同啲喪屍同類似人猿嘅怪物駁火。起初我哋見啲軍人好似控制倒個場面，都忍唔住大聲歡呼。不過，之後啲怪物越嚟越多，啲軍人就開始抵擋唔住...」

「跟住就見到佢哋節節敗退，然後睇住佢哋全軍覆沒...」



「之後嘅路就越嚟越難行，原本冇乜喪屍嘅馬鞍山廣場，突然多咗喪屍出現，令我哋失去咗唔少同伴...」

我看著他，說時泛著點點的淚光。

「後來仲有好多唔同嘅人出現，同我哋爭奪資源，周不時都打起上嚟。」

「而有啲就用啲奇怪嘅嘢想同我哋交換... 女人、人肉、動物、武器、日用品咁，真係你諗倒同諗唔倒嘅都有...」

「不過令我最深刻同遺憾嘅一次，就係我哋班物資搜索隊最後一次嘅外出任務...」他説罷深深的呼了一口氣。

「嗰日我哋如常咁，出發去二樓間超級市場攞物資。因為之前已經遇過唔少喪屍，我哋每一次嘅出發，都盡量小心同裝備多一啲武器...」

「不過我哋嘅所謂嘅武器，只不過係啲鐵棒呀、刀呀、厚毛巾同垃圾桶蓋咁，叫做可以擋吓啲喪屍一、兩吓，但係如果比佢哋圍攻，結果都係冇分別...」

「但係為咗生存，我哋明知危險都一定要去...」



「嗰日原本都相安無事，唔好話喪屍吖，簡直係鬼影都唔見多隻。」

「真係好耐都未試過咁順利，所以我哋成班人都好興奮，個個都攞到一車二車，有咁多拎咁多。」

「不過我哋每個人都唔知道，自己已經大難臨頭...」

「我哋一出到超市門口，已經見到有兩隻之前喺馬路見過嘅人猿怪物，痞咗係度等緊我哋。」

「佢哋怪叫咗幾下，就發晒狂咁衝過嚟。臨嚟到我地面前，就突然間跳起，一下就將我哋兩個同伴嘅頭，批咗落嚟...」

「其他同伴比突如其來嘅慘況嚇到呆咗，仲未嚟得及定神，另外兩個同伴已經做咗犧牲品...」

「突然間四個同伴慘死，其他人亦都終於識得反應。所有人即刻放低手上嘅物資，發咗癲咁衝返入超級市場入面。」



「我哋一路咁走，啲怪物就一路咁追，走喺最後面嘅，就少吓一個又少吓一個。」

「我哋班人變得越嚟越少，我見勢色唔對，即刻離開大隊，同另一個同伴鼠咗入其中一條橫巷。」

「好彩啲人猿怪冇再跟嚟，只係一枝箭咁衝咗去追其他人。」

「我哋兩個就襯呢個機會，偷偷哋走返出去，然後返翻車站入面。結果等咗好耐，都等唔倒其他人返嚟...」

「嗰一次真係死曬所有年青力壯嘅男人咁濟，所以自此之後，已經冇人再提出去攞物資。」

「而由於好多家庭都係突然間失去咗佢哋嘅親人，佢哋又覺得淨係我哋兩個冇事返番嚟好可疑，我哋喺入面都變到過街老鼠咁。」

「迫於無奈，我唯有離開嗰度...」Dickson 總結道。