［人性/有甜］- 屍•家•馬鞍山（隔日更新）: Chapter 389 - 初困 • 馬鞍山站

「我哋等緊阿 Keith 返嚟，有埋佢喺度，起碼同 King 佢哋打都有啲把握...」芷蕾説出心中所想。

我亦認同她的說法，這個已經好像如風一般出現而又消失的弟弟，可算是我們現今唯一的可靠支柱。

但大前提，是我們可以支撐到 Keith 的到來。

說著說著，我們便已經到達了醫療營外面。

我們先行把素恩安置好，待剛進來的芷晴替她檢查一下。



「我出去先...」Dickson 可能感到有點尷尬，故提議先行迴避一下。

「放心啦！芷晴佢學過吓護理，我同佢會幫手照顧你朋友㗎喇...」芷蕾示意我都應該迴避一下。

為免我們的親密關係曝光，我還是出去逛逛。

「放心啦，你朋友應該冇事嘅...」Dickson 向我安慰道。

雖然我對他沒有好感，但我亦同時感到，他對我沒有惡意。



「多謝你... 係呢，話時話你點解會同 Vicky 佢哋一齊嘅？」我單刀直入地問道。

「我哋係兩日前喺市中心見倒嘅...」Dickson 開始說道。「唉... 其實我原本係諗住返嚟比個驚喜我女朋友嘅，點知我去到馬鞍山站，就見倒一大堆人衝入嚟，啲職員攔都攔唔住...」

「咁我當時一心諗住出閘，就唔理咁多喺人罅中間穿出去，但係我行到中途，就已經見倒出面的人好似癲咗咁互相襲擊。」

「可能啲職員見情況開始失控，或者睇倒出面嘅情況，佢哋就開始將啲鐵閘慢慢咁閂埋。」

「當時都仲有好多人衝緊入嚟，不過佢哋都唔理繼續閂閘... 結果雖然順利閂倒，但係就有好多人入唔倒嚟，發咗癲咁大力拍度閘...」



「我見新港城呢邊出唔倒，咪即刻走過去馬鞍山廣場嗰邊出囉！點知嗰個出口都閂埋閘。」

「當時有啲乘客同啲職員理論，又話佢哋非法禁錮咁，要重新打開度閘...」

「不過有班喺出面入嚟嘅人，就話出面有人咬人，有啲仲話有喪屍咁，死都唔比佢哋開閘。」

「結果兩班人各不相讓，就咁打起上嚟... 我本身都好想出去，又覺得啲人話有喪屍咬人好似太誇張，所以當時我都諗住出去...」

「但係我又唔想因為咁就打人，於是我唯有企埋一邊等。」

「等吓等吓，啲人又好似靜咗落嚟，冇再堅持話要出返去。我聽啲人講，話閉路電視影倒出面啲人，真係發咗癲咁咬人。原本堅持要出去嘅乘客，睇完之後都冇再堅持要走...」

「咁之後啲人就喺站入面百無聊賴，有啲人就研究可以點走，有啲人就討論點樣喺呢度生存落去。」

「就係咁，我哋就一直喺車站度等到夜晚。站入面嘅人開始肚餓、頸渴，於是就向站入面嘅店舖埋手。」



「啲人開始衝入去舖頭入面搶嘢，啲店員見佢哋來勢洶洶，都唔敢阻止佢哋，有啲甚至攞埋一份。除咗便利店入面嘅人...」

「原來佢哋一早已經偷偷拉咗閘，啲人係咁拍度閘叫佢哋打開，點知佢哋就話入面嗰啲係公司財物，佢哋有責任保護咁喎...」

「不過啲人就覺得佢哋邊會咁有使命感吖？反而似係想自己霸住啲物資就真。所以就發曬癲咁，係咁拍度閘叫佢哋出嚟...」

「但係啲員工又點會理？結果啲人冇辦法，其他舖頭嘅糧水都暫時夠用，所以就冇再進一步嘅行動...」

「結果一大班人就喺站入面過咗一晚。跟住嗰一、兩日啲嘢食都消耗得七七八八，又冇人負責分配好啲物資，結果有啲人收埋好多嘢食，但係有人就乜都冇得食。」

「資源分配唔平衡嘅結果，就會衍生好多問題。而最快爆發嘅，就係社會秩序。」

「一啲人開始偷嘢，甚至明刀明槍咁搶。然後有啲就再次打間便利店嘅主意，用唔知喺邊度搵倒嘅鐵筆呀、鐵槌呀，係咁狂打度閘。」



「結果度閘抵受唔住爛咗，啲人就發曬癲咁衝入去，見嘢就搶，唔夠一陣間舖啲嘢已經比人掃光曬。」

「結果仲有好多人乜都搶唔倒，咁佢哋就起曬哄咁拉咗兩個店員出嚟。男嗰個就比佢哋用啲雜物打到爆曬缸，女嘅就比幾個男人扚咗入廁所。」

「班人仲好似越打越起勁咁，用盡全力咁又打又踢個男職員，又係咁用啲嘢扔佢個頭，結果打倒佢七孔流血，全身抽搐咁訓喺地上面。」

「廁所就傳出個女仔嘅慘叫，便洗問，大家都知道入面發生緊咩事。」

「最令我諗唔倒嘅係，全部人，包括我在內，竟然企埋一邊望住呢一切發生，而冇諗過伸出援手。」

「可能，大家都想置身事外...」

「而最恐怖嘅嘢係，原來暴力，係會不斷咁蔓延...」