［人性/有甜］- 屍•家•馬鞍山（隔日更新）: Chapter 345 - 解藥的成效

「我仲有一樣嘢想問...」我向芷蕾問道，「點解要困住咁多喪屍？」

「其實有幾個原因...」芷蕾解釋道，「第一，將佢哋捉番嚟困住，可以減少外出部隊嘅感染風險。第二，你都知我哋研究緊將啲解藥量產，希望到時救得幾多得幾多...」

「佢哋全部都可以救得番？」我帶點興奮地問道。

「吖... 同你講全部救得番，都冇乜可能啦！」芷蕾顯得有點傷感，「其實好睇佢受傷害嘅程度，大腦同身體機能有冇嚴重受損。」

「我哋都做過啲臨床實驗，發現啲解藥可以救番喪屍嘅機會並唔高。以十個外表健全嘅喪屍為例，只有兩個有康復嘅跡象。而當中，亦只有一個可以回復受感染前嘅行為認知...」



「所以，你都唔好抱太大希望...」不知怎的，芷蕾說時竟也眼泛淚光。

「妳... 冇嘢吖嘛？」我感到有點奇怪。

「可唔可以，借個膊頭用吓？」她突然提出奇怪的要求。

「嗯...」我也不好拒絕。

就這樣，芷蕾伏在我的肩膀上啜泣了一會，才慢慢回過頭來。



「可唔可以，話我知咩事？」我至少也想知道大概。

「我哋嘅臨床實驗對象，大部分都係受咗感染嘅戰友。而其中一個，係我嘅好朋友...」芷蕾終於把事情娓娓道來。

「好朋友？定係男朋友呀？」看芷蕾那傷感的神情，我覺得她們不只是好朋友的關係。

「我唔鐘意男人㗎！男人對我嚟講，只係一隻淨係識交配嘅野獸，就好似阿 King 咁...」她突然變得激動。

「咁妳...」我不知怎去問。



「係，我係鐘意女人嘅！我仲同芷晴一齊添！」芷蕾看似有點控訴，「比著啲男人，同女人相處舒服好多...」

「Okay... 咁妳同個朋友一定感情好好啦！」我只能這樣的打圓場。

「佢追咗我好多年，不過我一直都冇應承同佢一齊...」她仍是雙眼通紅，「直至幾日前，佢出任務嗰陣發生意外失咗蹤，直至前日先搵番...」

「不過其他人搵倒佢嗰陣，佢已經比病毒感染，連個樣都唔同咗... 如果唔係佢身上嘅軍服同軍牌，啲同僚都未必認倒佢...」

「之後佢就送咗去醫務營接受治療，不過用咗藥兩日都仲未醒...」

經她一說，原本充滿著希望的我，突然變得有點擔心。

「咁妳哋知唔知，係咪有乜嘢影響倒隻藥嘅成效？」我十分想知道原因。

「隻藥本身就睇唔出有乜嘢問題，我哋推斷最大嘅影響，係受感染者喪屍化嘅程度。」芷蕾解釋道。



我還是現在才知道，它們竟也有著程度上的區別。

「我諗你都知道，病毒會侵蝕大腦，以達致操控人類作為寄生體去繼續傳染病毒。不過正確啲講，佢哋首先做嘅係霸佔，之後先慢慢咁去侵蝕...」

「所以人類喺感染初期，大腦仍然存在住感覺認知，只不過病毒已經操控咗佢哋嘅四肢、神經同器官，所以佢哋只可以任由病毒主宰自己嘅行為。」

「咁照妳哋推斷，病毒要完全入侵大腦要幾耐？」我忍不住插口問道。

「對唔住，呢樣嘢我哋都研究緊...」芷蕾無奈地答道，「不過暫時可以肯定，佢同時間行為有關...」

「第一樣我明，時間越耐，病毒侵蝕大腦嘅範圍就越多。咁行為又係乜？」我再次打斷她去追問。

「行為... 即係代表病毒控制人類作為寄生體所做出嚟嘅行為。」她說得我一臉茫然，「簡單講，就係食人。」



「病毒進入人體之後，一般只係足夠霸佔大腦控制行為嘅區域，並未有足夠力量去再進一步侵蝕大腦嘅思維同認知，所以佢必須誘發寄生體嘅慾望，令身體配合去進行獵食。」

那即是說，Carey 應該還有意識的。

「我哋之所以有呢個推論，係因為從幾個對藥物產生排斥嘅感染者牙齒入面，都發現有殘留嘅肉碎同血跡。而從呢啲樣本睇嚟，佢哋應該全部都有咬過、甚至食過唔只一個人嘅肉...」

「所以食得人肉越多，大腦就漸漸比病毒侵蝕。而最可悲嘅係，食嘢原本就係人類嘅本能慾望，思想被屏蔽嘅人類，好自然就會好似肉食動物咁狩獵。」

「而呢個亦都係我哋，要儘可能困住啲喪屍嘅第三個原因...」芷蕾作出總結。

「我想問，Keith 佢知唔知呢啲嘢？」我想確認一下，他是否一早知道這事，而作出在我家中的相應安排。

「呢層我就唔太肯定，我就呢兩日睇倒醫療隊嘅報告先知。而 Keith 係行動組嘅隊長，所以佢可能比我早一步知道呢個重要資料...」芷蕾回應道。