［人性/有甜］- 屍•家•馬鞍山（隔日更新）: Chapter 221 - 無法回頭的賭注
「Venus，幫我揸住佢先...」我向 Venus 説道，然後擺好姿勢，準備與孝信戰鬥。
「嘿！估唔倒你會做依個錯誤嘅選擇。」孝信看我決定與他敵對，亦不忘警告我。
我同意 King 的說話，只能把孝信幹掉，才能一勞永逸。
「Roy，你負責保護個公事喼，一有機會就出去同 Clara 佢哋滙合，呢度就交比我得喇！」King 說罷已經往孝信撲去。
雖然我很想幫忙，但我自知不是孝信的對手，於是我只好靜靜地從一旁溜走。
可是，雙腳一踏離羈留倉，我便開始後悔。
這一次的押注，注碼是否太大了？
我正想返回羈留室內，可是卻遇到剛剛趕到的強哥等人。
而令我喜出望外的，是團伙中除了強哥、Clara 外，還有 Vicky...
難道，她是關心我的安危才趕過來嗎？
可是，這完全是我的幻想。
因為她只是打量了我一下，便打算走進羈留室。
「喂！唔好入去！」我趨前攔住去路，「佢喺入面同人打緊，好危險...」
豈料她把我的手推開，「咁你又企喺度？點解唔去幫手呀？你係咪男人嚟㗎？淨係識溝女！」她一邊説著，視線亦遊走到 Venus 身上。
這一刻，我感到無地自容。
而內心深處，更湧出一陣酸溜溜的感覺。
「Vicky，呢個都唔係男唔男人嘅問題，實力懸殊，入去盞阻手阻腳！阿 King 咁打得，唔會有事嘅！」還是 Clara 替我解圍。
「更何況佢手上個公事喼好似好重要咁，佢應該有重任在身啦，係咪？」Clara 說罷向我使了個眼色。
一言驚醒夢中人，我立即回應道，「吖... 係呀！入面有啲重要樣本，阿 King 話要我保護啲嘢走先...」
「哼！冇鬼用！」Vicky 拋下一句，便頭也不回的往樓梯方向走去。
「好喇，行啦兄弟！」強哥向我的肩膀拍了一下，便出發離去。
我亦打算緊隨其後，可是，卻被 Venus 一手拉住。
「咁我個妹點呀？你唔打算救佢嗱？」Venus 説著眼泛淚光。
雖然我不想再令 Vicky 誤會，但人命攸關，我實不能見死不救。
「阿強哥唔好走住，我仲有一個人要救！」我不敢把 Vicky 叫住，只好大聲向強哥傳話。
「你咁大聲係咪想引曬啲喪屍嚟呀！」走在前面的 Vicky 回頭叫道，「你仲有幾多感情債要還呀？」
其實，她何嘗不是在大叫大嚷？但我當然不會反駁，更何況，她說的也不無道理。
「一係我比咗個喼妳哋先，我自己同佢搵？」我向身旁的 Clara 説道。
「咁又唔係咁好... 話曬我哋都係因為你嘅通風報訊，我哋先嚟幫手，不過又係嚟得遲咗啲... Anyway，其實你係咪搵緊一個女仔？」Clara 回應道。
「係呀！」Venus 已經搶先一步回答，「佢咁高倒，長頭髮，圓圓哋咁，你係咪見倒佢？」她一邊向 Clara 詢問，一邊努力地比劃著。
「咁我勸你哋都係跟我哋返去先，因為我見個女仔比孝信啲手下捉走咗...」Clara 回答道。
「吓！咁我哋而家即刻去救佢吖！」Venus 緊張地叫道，「佢係我個妹嚟...」
「阿姐姐，我哋唔係唔想救，之但係我哋又唔知佢哋捉咗佢去邊，況且我哋今次差唔多所有打得嘅人都出曬嚟，已經冇人可以再幫手。孝信佢人多勢眾，就憑我哋幾丁友去搵，可以話係白白送死...」強哥亦幫忙解釋道。
「咁 Kelly... 嗚...」Venus 聽後更是哭成淚人。
「妳放心啦，我哋返去再諗辦法啦！」Clara 安慰著 Venus 說。
Clara 亦用眼神向我示意，於是我便向 Venus 保證道，「妳放心，我一定會搵返妳個妹返嚟嘅！」
我頓時成為了眾人的焦點，從他們的眼神看到，他們對我這一個承諾的質疑。
只有 Venus 用感激的眼神看著我，「嗱，妳應承咗㗎！你要負責㗎！」
「哼！」此時，我看到 Vicky 再次頭也不回地離去，而羈留室的打鬥聲亦漸見激烈。
「碰～」室內傳來一聲巨響，為免情況有變，我們亦立刻往大門口進發。
一路上屍環遍野，看來這裡曾經有一番激戰。
沿途沒有任何阻礙，我們順利到達警署的大門口...