［人性/有甜］- 屍•家•馬鞍山（隔日更新）: Chapter 179 - 酒家內的真相

我想速戰速決，於是奮力往站在右手邊的人撞去。

這一擊力量不少，肩膀狠狠的撞到他的肋骨，胸腔頓時發出破裂的聲音。

我亦沒有因此而停歇，回身往另一面的男子一拳揮去。

拳頭中正男人的面門，受到重擊的他鼻骨被打至移位，頭骨凹陷並口吐鮮血。

此時，眼角看見站在𨋢門口的粗眉男好像有所動作。於是我二話不説，便一腳往他伸去。



「碰」男子應聲往牆邊彈去，力量大得連它背後的牆璧也產生裂痕。

只是一𣊬之間，現場就只剩下富仔一人。

於是我揪著他離開了升降機。

「阿 Roy... Roy 哥～」富仔戰戰兢兢地叫著，「求吓你放過我吖！」

「好！要我放過你都得！」我逼近他後説道，「不過你要認真咁話我知，喺恆安間酒樓發生過乜事？」



「吖... 你想講老蛋嗰單嘢呀嘛？其實喺你走咗之後，你個 friend 阿 Keith 就開始變得好古怪，有時就好好先生咁，有時就對我拳打腳踢...」富仔開始説道，「不過我自己知自己事，就算我點反抗都唔會有人幫我，企喺我呢邊。所以我都冇計，只希望有機會就閃...」

「直到有一晚，我急尿諗住起身痾，點知就聽倒女廁有人好細聲咁叫救命。我初初以為咁荀夜媽媽有嘢𥄫，所以就推開少少門諗住喺出面裝。」

「一開始都睇得我好 high，睇住個男人背影壓住個女仔係咁砌，仲用手㩒住咗佢個嘴，應該喺度強姦緊個女仔...」

「吓！你睇住個女仔比人攪都唔幫手？」我忍不住插嘴問道。

「你唔係呀嘛，阿 Roy 哥！」富仔對我的問題感到奇怪，「比著你都未必出聲啦，又唔係同條女有親，爆出嚟搏比人打咩？」



「更何況...」富仔續説，「我一睇個背影就知道係嗰個阿 Keith，我就更加無謂衝出嚟柒啦！」

「你嘅意思係，阿 Keith 強姦咗個女仔？」我儘量壓低自己的情緒，淡淡地問道。

「係！好肯定！」富仔的答案直接了當，「條變態佬仲喺完事之後，攞把刀出嚟喪插個女仔。嚇倒我即刻轉身走出去大嗌。」

「點知條友仔，一個唔該就屈曬落我度，班人又竟然信，又要打要殺咁。我諗住橫掂點講都嘥鬼氣，所以我終於忍冇可忍，走過去打開度大閘，然後鼠埋一邊等佢哋走入嚟，咬死曬班 PK！」

「超！你話你見倒係阿 Keith 做啫，我夠可以話係你做囉，你有冇證據吖？」我質問著他。

「哈哈！證據... 你竟然問我攞證據？」富仔激動地説，「試問一個右手已經殘廢嘅人，點樣去強姦一個四肢健全嘅人呀？」

我承認我沒有想過這一點...

又或者説我一早已經忘記，這個對他造成了終生烙印的傷害。



內心雖然不安，但我仍是硬著頭皮質問著，「你右手冇力啫，唔比你左手用刀威脅佢㗎？」

「唉... 你係要唔信都冇計，反正個個都當係我做，狽多單又有咩所謂...」富仔然後冷冷的看著我説，「橫掂生存喺度都已經冇乜意思，我又冇勇氣自殺... 如果你想幫人報仇，又或者替天行道，咁就唔該你比我嚟過痛快！」

「我再問你一次，你真係冇攪過個女仔？」其實我心知肚明，只是不肯去面對和接受真相。

「我講咗啦！都話你唔信就殺咗我囉！」富仔堅決地説道。

「好，咁我就放你一馬！你自己好自為之啦！」説罷我按著升降機制，等待前往大堂去。

升降機轉瞬到達，倒卧在𥚃面的二人，在再次看到我後，便露出驚訝的表情，生怕我要置他們於死地。

「唔洗慌，我搭𨋢落去啫！」我踏進升降機，打算把門關上。



「喂阿 Roy，你咪走住！」富仔突然把我喝停。

「頂！你係咪想我改變主意呀！」我雖破口大罵，但仍按著升降機的開門制。

「我... 我仲有件事想同你講...」富仔戰戰兢兢地説道。

「有咩講就快啦！」我開始對他失去耐性。

「冇，我想講個阿 Keith 之前嚟過，又話我哋啲屏障做得好實淨咁... 不過我驚佢見到我，我偷聽咗幾句就番返入屋嚕...」富仔向我説道。

「得喇，唔該！」我想了一會，「除此之外仲有冇其他特別嘢？」

「唔... 之前有個件輝哥嘅食蕉時不時搵我哋班人，吹吓水、搲吓嘢食咁，不過兩日前已經唔見佢...」富仔憶述道。

「兩日前？即係星期六已經冇出現...」我自顧地説著，手插著袋，才發現一直被我遺忘的 USB。



「你哋有冇電腦，想借嚟睇啲嘢...」我向富仔問道...