［人性/有甜］- 屍•家•馬鞍山（隔日更新）: Chapter 172 - 同伴的下落

我對這些情況與對白已經見怪不怪，所以我亦沒有打算再與他爭論。

反之，我始終無法輕易地原諒他傷害 Coco 的過去。

「你講到你咁感性，你又四圍去姦淫婦女？」我忍不住向他質問道。

「唉！我之前的確係衰，用下面諗嘢，又冇理人感受，不過自從我有一次差啲冇命，比我女神救咗之後，先知好多嘢我之前係做錯咗。」強哥忽然感觸地説道。

可惜我沒有被他的言語所感動，於是繼續向他質問著説，「你男人老狗先學人迷女神？佢有冇對你咁大影響呀？」



「你唔會明㗎喇！我幾十歲人先搵倒真愛，就緊係好好把握啦！我之所以棄暗投明過嚟呢度，都係因為佢㗎咋！」強哥努力解釋道。

我仍是半信半疑。

「係... 我知道我以前做過好多衰嘢，仲傷害過你啲朋友，你唔會咁易就原諒我。所以我都有將功補過，喺孝信手上救番你個朋友出嚟...」強哥説道。

他的話終於引起了我的注意，「咁你就咪賣關子啦，你究竟救咗邊個出嚟呀？」我開始感到不耐煩。

「吖... 其實我唔係有心唔講，不過我真係唔記得佢叫咩名，剩係記得佢係同你哋一齊嘅其中一個女仔。」強哥説得真切，不像在説謊。



「你淨係見倒一個女仔？」我十分在意她們的情況。

「我本來都諗住救埋另外一個出嚟，但係都冇機會。之後發現孝信開始懷疑我，所以我唯有趁出嚟做任務嘅時候逃走。」強哥解釋道。

「佢係素恩同 Karen 帶嚟嗰個？」我想確立他口中女孩的身份。

「係，佢哋帶咗兩個女仔嚟，我一眼就認出其中一個係你個 friend。之後素恩同 Karen 分別有嘢要做，我就負責帶佢哋返去同孝信交差。所以我就把握機會收理你個 friend，然後交比我女神照顧... 不過可能就係咁，孝信就開始懷疑我。」強哥回應道。

「咁你救咗嗰個女仔喺邊？」我想立刻知道 Vicky 的情況。



「嗯... 我帶咗佢嚟呢度，跟住女神做嘢，如果你想嘅話，一陣我可以帶你去搵佢...」強哥答道。

「不如而家就去啦！」我真的不能再等。

「咁心急？你條女嚟哩？」強哥語帶嘲諷地問道。

「佢... 佢係我好朋友... 你唔好理咁多，而家就帶我去好冇？」我尷尬地答道。

「好好好，依家就帶你去。咁洗唔洗叫你現任女友推你去呀？」強哥笑説道。

「你講咩呀？頭先嗰個係普通朋友嚟咋喎！」我答道。

「哦！你話咩就咩啦！」強哥説著已經準備出發，「不過唔好話我唔提你，你個普通朋友話你喺佢男友，佢哋先肯救你同比你入嚟。而家呢度物資短缺，如果比人知道你哋冇關係，就唔單止你會比人趕走，就連你個普通朋友，都唔洗旨意留低...」

「所以你頭先嘅嘢，淨係同我講好喇！」強哥再三叮囑道。



之後我們便離開會所，往另一住宅大樓走去。

由等待升降機的那一刻開始，我的心情已經開始變得緊張，內心不停預習著待會的對話。

而我也留意到強哥正流著冷汗，看來緊張的不止我一個。

升降機终於到達，強哥亦引領我們到達單位門外，然後按起了門鐘來。

可是過了良久，屋內仍沒有應門的聲音。

「噢！睇嚟你哋緣慳一面囉！」強哥的語氣略帶失望，「佢哋應該出咗去做嘢啫！佢哋成日都好似有啲秘密嘢要做，唯有晏啲再搵佢哋啦！」

我們沒有辦法，只有返回會所。途中，強哥提議帶我們在屋苑四周走走。



我拒絕了他的提議，反之，我説出了另一處我希望前往的地方。

「Venci，可唔可以帶我去，琴日你哋話發現兩條屍嗰度？」我向 Venci 問。

「得，冇問題！不過淨係得我哋兩個，會唔會危險咗啲呀？」雖然 Venci 爽快應承，但她的擔憂亦不無道理。

「得，我識做！我會跟埋你哋出去！」當強哥看到我們的視線都集中在他身上時，他亦知趣地答應。

於是我們三人在稍為整理一下裝備後，便往外面出發。

我們走過了昨天跟人猿怪戰鬥的地方，現場只剩下一些燒焦了的殘肢，看來強哥武器的威力也十分強大。

我們一直走，到了一大片草叢的外面，看見不遠處分別躺著兩個應該是赤祼的人形。

我慢慢地走過去，心跳聲變得越來越急促。心情亦變得異常復雜，既想儘快找出真相，亦怕知道真相後該怎樣面對。



而轉眼間，我們已經走到了真相的面前...