［人性/有甜］- 屍•家•馬鞍山（隔日更新）: Chapter 171 - 重遇強哥

Venci 推著輪椅上的我前進，轉眼已經到達屋苑的會所。

兩日不見的強哥，就站在會所門外與其他人寒喧著。

「喂，兄弟！別來無恙吖嘛？」這副熟悉但令人厭惡的面孔，再次出現在我的眼前。

「哦冇乜嘢，仲未死得！」我只有敷衍地回應。

「琴日我喺望遠鏡見倒你，就即刻仆倒咁落去救你喇。」強哥自滿地説道，「落到去隻嘢都唔理我哋，我唯有叫啲手下開槍射佢，引佢注意。」



「我哋本身都諗住一嘢炸死佢算，不過我又怕炸親兄弟你，所以咪冒險搵槍射佢先囉！點知佢比人射之後勁大反應，發曬癲咁向我衝過嚟。」強哥續説，「好在我早有準備，即刻用榴彈炮兜頭打爆佢！」

「跟住就 "砰" 一聲，乜都散曬！」強哥興奮地説道，「然後我哋就夾手夾腳抬你返嚟囉！」

雖然以強哥的性格，當中一定有誇大的成分。不過，我還是向他表示道謝。

「話時話吖，點解你會嚟咗呢度？」強哥搶先問了一個，我原本想問他的問題，「孝信唔係派你嚟捉我返去嘛？」

底牌被揭穿的我頓時感到十分尷尬，於是我便直接道出我的來意，且看他的反應如何。



「無錯，孝信要我嚟捉你返去嘅！必要時仲可以格殺勿論！」我如實地説。

四周的氣氛頓時變得凝重，我亦作好強哥一旦發難的準備。

「哈哈哈！你依家咁嘅身世，又點樣捉我呀？」強哥嘲笑著。

「都係㗎，所以你最好趁依家就制服我，如果唔係，我一好番你就大鑊喇！」因我仍未摸清強哥的底蘊，所以只有透過不斷的挑釁，嘗試看清他的底牌。

只要他一出手，我便會把他就地正法。



「喂！枉我特登走出去救番你返嚟，你唔係咁老土恩將仇報吓話？早知我就由得你比人分屍算！」強哥沒有我預期般出手，反而對我説起大道理來。

究竟，他是不是我所認識的強哥？

還是，我之前從沒有認識過他？

「咁你可唔可以話我知，究竟係咩一回事？」我決定先向他打探，才作進一步的行動。

「嘩，咁樣有排講喎，不如入去坐底慢慢傾啦！」強哥提議著。

會所門口有兩名持槍男子把守，𥚃面收著各式各樣的物資、裝備等，看來這應是他們的大本營。

我們在一房間中坐下，一直替我推著輪椅的 Venci，也識趣的離開迴避。

「喺我答你個問題之前，可唔可以話我知，點解你會跟咗孝信？」強哥問道。



「其實我都唔想幫佢，不過我都係身不由己...」我無奈地説道，不過又不想對他透露太多。

「為咗嗰幾個女人？明嘅，我都同你一樣，女人對我好重要...」強哥説道。

我實在受不了他用我來比喻他自己，於是我反駁道，「我點同你！我對佢哋有愛，而你肯定冇！」

「嗯... 睇嚟你對我好有偏見。啱嘅，以前嘅我對啲囡真係好 PK。不過呢啲已經係以前嘅事，而家嘅我已經好唔一樣。」強哥誠懇地對著我説。

我用疑惑的眼神看著他，一時説不出話來。

「唉！自從喺條八婆間屋走甩咗之後，我好辛苦先返番去我喺耀安嘅屋企。返到去已經面目全非，好彩咁啱比我撞返幾個老死，人搭人之下知道有人招兵買馬，咁大家都覺得有得諗，咪去咗搵孝信佢囉！」強哥續説。

「當初加入孝信佢哋，係因為諗住跟佢有著數，反正喺外面都冇特別嘢做，跟住佢又可以有特權。喺而家呢個世道，恰人總好過比人恰吖！」



「初初加入嗰幾日又真係覺得幾過癮嘅，可以蝦蝦霸霸，又可以周圍去攪吓啲女咁。呢啲機會，喺件事發生之前真係諗都唔洗諗，所以我初頭都好享受。直到後來發生咗好幾件事，我先發覺孝信唔單止冇當我哋係人，直情係當我哋肉盾添！」強哥已經説得青筋盡現。

「啱啱過去嘅幾次行動，我睇住同我一齊嘅兄弟一個一個咁白白犧牲，就知道孝信完全冇當佢哋條命係一回事。甚至係一啲事上面，我覺得佢係特登送我哋去死添！」強哥握緊拳頭地説著。

「結果呢兩個禮拜以嚟，我啲老死都全部死曬。我又由初初好激動，漸漸咁變到冇曬感覺。跟住新跟我嗰啲手下又死吓一個，死吓又一個，攪到我都完全麻木曬咯！唉...」強哥説罷深深嘆了口氣。

我完全不能接受強哥的忽然感性，於是我向他問道，「不過我嗰日見你同啲手下好 friend 咁，唔似新相識喎！」

「佢哋都只係同我 part 咗兩三日，不過大家已經好似兄弟咁！」強哥回應道。

「咁喺商場嗰陣，你又閂埋道門唔比你個兄弟入嚟？」我質疑道。

「嘿嘿！咁你又有冇見倒，佢隻手已經流緊血？比佢入埋嚟又有咩效果？我諗掉番轉係佢見倒我受傷，佢都會咁做。」強哥冷冷地回應著...