［人性/有甜］- 屍•家•馬鞍山（隔日更新）: Chapter 154 - 對素恩的打探

假若，素恩真的有把 Vicky 交給強哥，而卻沒有在酒店中出現... 除非素恩或孝信刻意隱瞞，否則，可能性只剩下一個...

一個我不敢想像的可能性。

現在只有一個方法找出真相，就是找當時人問清楚...

「返去酒店之前，可唔可以陪我搵一個人？」我問素恩。

「嗯... 我都想知道真相。」素恩欣然答應。



「多謝妳...」我對她的支持表示謝意。

「吖，我想多口問句，妳又知唔知 Coco 點解會出現嘅？同埋 Suki 而家喺邊？」我追問道。

「佢哋同你係乜嘢關係？」素恩反問著。

「吖... 普通朋友囉！」確實，我與她們只算是普通朋友的關係。但實質上，我們又好像比普通朋友再親密一點。

「真係普通朋友？」素恩的眼神充滿著懷疑，「你咁樣答我冇問題，不過如果孝信問你，你真係諗清楚先至好答。」



我不禁展露出一副不解的神情。

看見我一臉不解，素恩於是解釋道，「唉... 比佢哋捉咗嘅女仔都冇乜好下場... 通常都只得兩個結果。一係比孝信睇中，做佢所謂嘅女朋友，一係就負責服侍佢啲手下...」

「吓...」我無言以對。

「所以真係睇吓你想點，如果你想救佢哋，你就要諗清楚點去講。不過如果你個個都話係女朋友，孝信都未必會信...」素恩續説。

「不過 Suki 係孝信特登要搵嘅人，所以暫時都應該安全。至於 Coco...」素恩打量著我説，「佢唔係又同你有過關係吖嘛？」



「吖... 你都可以咁講嘅...」我有點尷尬地回應。

「唉... 估唔倒你成個宅男咁嘅樣，都可以處處留情喎！」素恩用奇怪的眼神打量著我。

「吓，我唔覺得我好差喎！」我反駁她説，「同埋妳都唔洗咁擔心喎！孝信已經應承咗今晚放番 Carey 同 Coco 比我喇...」

「嘿嘿！佢應該係放佢哋今晚陪你，唔係真係放咗佢哋...」素恩續説，「佢哋一日喺孝信手上，你一日都要跟住佢嘅説話做。所以，根本冇嘢值得你開心...」

我被她這樣一説，興奮的心情頓時跌落了谷底。我亦完全攪不清面前的狀況，於是冷冷地問著素恩道，「可唔可以話我知，妳同孝信係咩人？」

「呢樣你唔需要知，知咗對你唔會有好處... 總知你信又好，唔信又好，我都係有心幫你，所以唔好當我係仇人咁對我...」素恩不願透露更多。

「妳有心幫我？唔係吖嘛？妳想幫我就唔會捉我女朋友嚟呢度，又要我引 Suki 嚟比妳捉啦！妳咁都叫幫我？」我氣憤地説著。

「都話你唔信就算咯！你知唔知如果我唔去捉，孝信一定會派其他人去。到時，佢哋嘅下場可能會好慘...」素恩解釋著。



「咁妳又將我啲朋友交比強哥？咁同推佢哋落火坑又有咩分別呀？而家攪到 Vicky 唔見咗，都唔知係咪比佢收埋！」我向素恩叫罵著。

「嗰時我都唔想，孝信突然有嘢叫我做，我都冇辦法。不過我已經交託 Karen 睇住佢哋，點知會唔見咗喎！而家我哋返去問清楚佢咪知囉！」素恩説著便站了起來，打算出發。

「我想搵吓強哥先，我有啲嘢想當面問佢...」我拉著素恩的手説道。

「你放手呀！」素恩説著用力把我的手甩開，「你唔係當我係衰人咩？做乜又要我陪呀？你自己去咪得囉！同埋點解要咁急搵佢先？返去酒店先問唔得㗎咩？定係你有嘢想同佢私下解決呀？」

我無法對素恩的連珠炮發式的問題，作出即時的反應。為免進一步把她惹怒，我只有安撫她説，「我唔係咁嘅意思，只不過實在太多嘢發生，我想搵番強哥當面問佢啫，始終酒店人多唔係咁方便...」

「總之而家就返酒店先啦！如果唔係，孝信以為我哋走咗去，冇完成任務就麻煩喇...」素恩説罷，便頭也不回地往前走。

我亦只有無奈地去跟隨著素恩走，到達大堂後，她便一直警戒地往巴士總站方向走，直至快要走到車站附近，她才蹲在一石屎柱後張望。



「出面有大約有十幾隻喪屍，我哋一陣儘量貼住行，我諗應該可以順利出倒去。」素恩只用側臉向著我説。

「不如我哋試吓其他路吖？」我提議著。

「你唔係得嗰十幾隻喪屍都驚嘛？以你而家嘅實力，就算得你一個都搞得掂啦！」素恩説時仍是沒有正面看著我。

「我唔係怕啲喪屍，只不過...」我打算道出我的難處。

「旋旋係其中一隻喪屍吖嘛！我見倒啦！不過咁又點啫？佢已經唔係人類嚟，已經認唔倒你㗎喇！」素恩道出了一個，我十分明白，但卻不想接受的事實。

「更何況，當初都係因為你放低佢走咗，佢先攪成咁。所以佢唔認得你咪仲好！」素恩續説。

「吓！我唔明妳講咩喎！其實，我都想問，我走咗之後，究竟發生咗咩事呀！」我大聲質問道。

「好，你想知冇問題，不過大前提係我哋有命上返我㗎車度先算！」我望向離素恩的不遠處，喪屍們已經被我們的談話聲吸引了過來...