［人性/有甜］- 屍•家•馬鞍山（隔日更新）: Chapter 153 - 素恩的甦醒

前無去路，我只有悄悄的返回車站裡面。看來只有等待我的體力回復，或是素恩甦醒過來才能繼續行動。

我看著面前的素恩，她總是在我危難之時出現，雖然她曾經説過這是基於孝信的安排，但直覺告訴我，事情不是這麼簡單。

當然，這亦可能只是我的個人幻想。

無論如何，我欠她的都好像已經太多... 雖然現在我無法作出任何承諾，但我已經暗自決定，我將盡我所能去保護她。

由於喪屍的低喃聲好像有移近的跡象，以防萬一，我決定揹起素恩返回上層的月台等待。



就這樣待了兩個小時，素恩终於在睡夢中蘇醒過來。

「嗯... 我冇死到？」素恩慢慢坐起來説。

「嘿嘿... 我都未死，妳邊會咁易喎！」我逗趣著説。

「唉... 仲諗住今次死緊，點知都仲係死唔去...」素恩不但沒有被逗樂，語氣反而變得沉重。

「妳行唔行倒？」為了終結這沉鬰沒趣的話題，我決定轉移視線，「出便都有唔少喪屍，我哋要準備好先可以出去...」



「頭先隻怪物一吓咁衝埋嚟，而家個心口仲有啲痛...」素恩搓著胸脯説道，「不過唞陣就應該 okay！」

我目定口呆地看著她，然後語帶猥瑣的笑著説，「不如妳比我睇吓嚴唔嚴重吖？」

素恩用凌厲的眼神看著我説，「你真係滿腦子都係咸濕嘢㗎喎，不如你諗吓一陣點同孝信交待好過啦！」

「吖... 我殺咗隻人猿怪，算唔算完成咗任務？」我指著遠處躺著的屍體説。

「吓！你講笑咋嘛？」素恩帶著半信半疑的態度前往確認，待她看到人猿怪的屍體時，便興奮地説道，「好嘢喎，睇唔出你平時吊兒郎當咁，原來一啲都唔嘢少㗎喎！」



我被突如其來的讚賞弄得不知所措，只能以尷尬的笑容回應。

但素恩的表情忽然又變得沉重，「不過隔咗咁耐，我諗佢體內嘅病毒都已經死曬... Anyway，攞咗先算...」

素恩説罷已經拿起一枝不知道從哪裡弄來的針筒，從人猿怪的臉上抽出血液。

我記得 Clara 之前亦做過同樣的動作，究竟，收集這些血液樣本的用途是什麼？看來這也是 Clara 和拍擋 James 的相片，出現在目標人物名單中的原因。

這亦令我想起華叔在馬中的升降機中，警告著 Clara 關於提取我血液的事。

如果是這樣，孝信也會否和 Clara 一樣，以收集我的血液為其中一個目的？

難怪，他跟我稱兄道弟，原來另有目的...

可惜，我還沒有跟他決裂的條件，雖然知道陷阱就在眼前，但我仍必須無奈地走下去...



素恩亦已經完成了她的"任務"，正小心翼翼的把針筒放進一個小小的密實盒內，然後再放入她那防彈背心的口袋中。

我們打算多休息十五分鐘才出發，於是我爭取時間，希望從她身上套取一些線索來。

「係呢，妳唔係要負責睇住 Carey 佢哋㗎咩，做乜會突然喺呢度出現嘅？」我終於可以問這個令我想不透的問題。

「孝信突然收到佢手下嘅報告，話喺呢度發現目標人物。而佢又覺得 Carey 佢哋都唔會偷走，所以就派我嚟幫手。點知目標人物就搵唔倒，剩係撞倒你呢個衰人...」素恩説罷便用力瞪著我。

「其實，妳收集啲血有乜嘢用？」我又再轉移話題，但這一個問題，我卻是十分希望得知答案。

「吖... 都係做吓啲研究咁囉...」素恩支吾以對，「其實我都唔係太清楚，我都係跟孝信嘅指示做...」

「吓？阿素恩姐，妳唔好玩我啦！妳係孝信條女，有乜可能唔知呀？」我十分質疑素恩的答案。



「其實我喺佢心目中，都唔係咁重要...」素恩冷冷地答道，「所謂嘅女朋友，只係佢嘅玩伴... 佢有需要就嚟搵你，冇事就擺你埋一二邊，甚至完全當你透明都得。」

「所以佢個幾個掛名女友都好出力幫佢做嘢，因為得寵嘅女人除咗可以得到優先嘅物資分配，仲可以得到佢同佢團隊嘅保護，喺依家咁嘅環境，都係幾吸引嘅 offer 嚟...」素恩續説。

我對她的説話半信半疑，但既然她沒有打算説出真相，我亦沒有繼續強迫她的打算。

因為，我對另一個疑問比較有興趣。

「咁妳可唔可以話比我知，Vicky 去咗邊？」我向素恩問道。

「吓，乜 Vicky 唔喺酒店咩？」素恩對我的話感到驚訝，「我明明已經將佢交咗比強哥... Karen 仲同佢哋一齊㗎喎...」

「妳講嘅係咪真㗎？」我不敢相信她説的話。

「我做乜要呃你？」素恩不忿地説，「如果你唔信我，又做乜要問我？總之我冇呃你，你唔信就算！」



其實我不是不相信她的話，只是，她口中的真相令我感到十分不安...