［人性/有甜］- 屍•家•馬鞍山（隔日更新）: Chapter 133 - 素恩口中的真相
「好喇喎！我特登嚟救你，你做乜當我仇人咁呀！」素恩不忿地説。
「哼！喺馬中個保安話曬比我知啦，佢形容嘅人外表同妳一模一樣，同埋我都喺閉路電視見過你個樣，雖然包到實曬，但我都一眼應倒妳！」為了增加説服力，我選擇説了個大話。
「吖...」素恩沉思一會後説道，「係... 係我同 Karen 引佢哋走嘅，Karen 同佢哋講你喺恆安嗰邊受咗重傷，情況好危險，話好想見佢哋... 起初嗰個叫 Vicky 嘅女仔都有懷疑，不過另一個女仔就乜都唔理，就要去見你。Vicky 都好小心咁同 Karen 了解你哋嘅情況，我睇得出佢半信半疑，不過因為另一個女仔喊曬咁話點都會去，個 Vicky 冇辦法之下唯有跟住...」
「Carey...」我完全感受到她當時的心情，因她一直也不贊成我參與這次行動... 其實她的願望十分簡單，可惜在現今的環境下，我可能無法答允她的簡單要求...
「咁妳哋捉佢哋做乜？佢哋依家喺邊呀？」我追問著。
「其實我哋都唔係咁清楚，我哋喺車迷暈咗佢哋之後，我就交咗比一個叫強哥嘅人，Karen 就同佢哋走咗，而我就繼續我嘅任務...」素恩續説。
「強哥...」這個可惡的名字再次出現，真的後悔當初沒有把他殺死。而更令我擔心的，是 Vicky 與 Carey 落在強哥手上的下場。
擔心、憤怒，一下子湧上心頭。
「妳點解會同條 PK 做嘢㗎！佢兩個同妳無仇無怨，點解要咁對佢哋？」我咬牙切齒地問道。
「其實... 我都唔想...」素恩説著眼泛淚光，「總之，對唔住！」
我雖然怒不可遏，但也盡量讓自己的情緒冷靜下來。然後冷冷的問，「咁妳喺恆安出現，一定唔係巧合啦！」
「係... 我嘅下一個任務，係要搵一個叫 Suki 嘅女仔...」素恩欲言又止，「我知，佢都係你嘅同伴...」
剛抑壓下的怒火再次被燃起，「屌妳！妳明知佢係我同伴，妳又嚟救我？」
「嘿嘿... 因為救咗你，我會有大啲機會捉倒 Suki...」素恩臉上忽然露出陰沉的笑臉，「同埋，上面落嚟嘅命令... 你，係唔可以死！」
我無法為剛剛聽到的話作出反應，到底這個常常出現、又常常消失於我面前的女人，究竟是甚麼人。
「如果妳打算跟住我會搵倒 Suki，我可以話妳知... 冇可能！」我斬釘截鐵地説，「唔好話我唔知佢哋喺邊，我就算知，我都唔會講！」
「放心，你同你啲同伴嘅情況我哋都好清楚，甚至佢哋喺邊我哋都知。不過我嘅任務係要活捉佢，有你喺度會方便好多...」素恩冷冷地説道。
「嘿嘿，好笑喇，妳憑咩覺得我會聽妳講？」我不屑地問。
「就憑呢度得我知道佢哋個大本營喺邊... 我嘅任務係捉人，至於捉咗嘅人有冇走甩或者比人救咗，就唔係我嘅事...」素恩胸有成竹地答道。
「我點解要信妳？唔比妳反口㗎？」我抱著懷疑的態度問道。
「因為你，冇、得、揀！」素恩續説，「強哥係咩人，你比我清楚十倍，你遲一日救佢哋，佢哋就受多一日苦...」
她一下子説中了我的要害，這正是我現在最擔心的地方。
「妳... 究竟係咩人？妳唔似係一個普通學生...」我忽然想到華叔之前的叮囑，令我不禁佩服他的觀察力。
「你覺得我係咩咪咩囉！橫掂你知嚟都冇用...」素恩沒有正面回答。
「睇嚟你都要慢慢諗吓㗎喇，你諗清楚再搵我。」説罷她已經離開車箱，往便利店方向走去。
「阿 Roy，雖然我唔係好知啲來龍去脈，不過我覺得奇怪，點解佢會同你講咁多嘢？」待素恩走進便利店一會後，沒有參與討論的 Mandy 亦終於開口，「其實如果佢乜都唔認，你都冇佢辦法。不過佢而家咁乜都講曬比你聽，我硬係覺得佢設個局比你踩。」
「我都知...」我回應著她，「不過素恩講得好啱，我根本就冇得揀。要儘快搵番我啲戰友，同入去個大本營，冇佢就好難搵倒... 而我女朋友又喺佢哋手上，我一定要速戰速決。就算明知係陷阱，我都一定要去！」
「咁又係...」此時 Mandy 轉而望向便利店的方向，「佢都完全唔擔心你會 say no，喺入面攞咗一袋二袋拎番返嚟喇...」
「係、我冇得揀，不過妳同希婷可以...」我轉向 Mandy 説，「聽我講，妳同希婷返馬中等我，我攪掂啲嘢就去接番妳...」
「我咪講過唔好囉，做乜又迫我返去！」Mandy 表情變得認真，「而家邊度會係安全？總之我決定跟住你，就去到邊都會跟住！」
時間就好像在這一刻凝住，我亦沒有再作出任何表示。
「喂，做乜咁靜呀？啱先見你哋好似傾得好開心㗎？」此時，走到車尾箱放置物資的素恩探頭問道，「係咪，有決定喇？」
「決咩定吖！個答案妳都一早知啦，仲攞定咁多嘢上車囉，你都預咗我冇得 say no 㗎啦！」我無奈地説道。
「咁你又唔好咁講...」説罷素恩返回駕駛座，「咦？咁即係 Mandy 姐都一齊去囉？」
「嗯...」Mandy 只是輕哼一聲回應。
「咁好啦，我哋而家出發！」素恩忽然轉身向我説道，「喂阿 Roy 你郁得未呀？你一個人訓兩個位，Mandy 要抱住希婷坐前面好辛苦，你冇事就好換位啦！」
於是我用力撐起自己的身體，開門與 Mandy 換位...