［人性/有甜］- 屍•家•馬鞍山（隔日更新）: Chapter 132 - 再遇素恩

「呀！」我睜開眼，看見人猿怪物退後了兩步後放聲大叫。手裏握住一支箭頭已經插進右眼的竹箭，然後毅然把箭拔出，冷不防把眼球都一併拔下。

它好像沒有受到太大傷害，正打算向我繼續攻擊... 此時，另一枝箭準確定向它的左眼射去。

我看著它打算伸手把箭擋下，可惜它只能把箭身握住，箭頭仍是不偏不倚的插入了它的左眼之中。

突然變成雙眼失明的它，正瘋狂的揮舞著它的巨爪，但由於它跟我仍存在一段距離，它的盲目抓擊並未對我造成傷害。

可是，我亦不見得比它好，受傷的手與內臓的痛楚持續，不消一會，我已經坐在牆邊失去意識...



醒來時已經重新回到車上，正橫卧在後座上。胸腹仍帶著痛楚，但右手傷口的血已經停止流出。

我用力令自己坐起，看見車子正停在一個油站裡面。

外面的天色已經變得昏暗，只見不遠處的便利店中，晃動著兩大一小的身影。

身體仍是虛弱得無法輕易移動，我只有乖乖的坐在車內等待著。我回想著剛才九死一生的情況，想到我在異變者面前的如此不堪一擊，不禁令我剛燃起的鬥志再次熄滅。

就我現在的實力，根本無法與人猿怪物對抗，若果我真的是被選中的一群，我必須想辦法去把力量提升，才真真正正有能力去保護身邊的人。



但如果要達至力量提升，就必須要犧牲其他人，我又該如何抉擇？

據華叔之前所説，我們跟華嫂、Vicky 一樣，應該被殖入了抗體，那為何華嫂死後仍會變異？難道我們破殖入的根本不是甚麼抗體，而真的如筆記簿中所説，是病毒原胚嗎？

那，病毒原胚又是什麼？

一輪沒有答案的思索後，她們亦已經返回車上。

「哥哥、哥哥，你醒喇！」希婷熱情地問著。



「嗯... 哥哥冇事喇！」我回應道。

「冇事，咪呃人啦！你比人打到肺都歪埋，仲喺度死撐！」多日不見的素恩，一開口便是不友善的語氣。

「吖... 係呀，其實個心口仲係好痛，個身都仲唔係好郁得倒...」我只有把感覺誠實地道出。

「哼！冇見一排，估唔倒你仲係咁廢，都唔知你點解可以生存到而家...」坐在駕駛座的素恩，仍然是頭也不回的譏諷著我。

我欠她一個又一個的人情，對著她的冷嘲熱諷，我真的無從反擊。

雖然我對她的身份有點懷疑，但面對著三番四次救我於危難的她，我根本找不到質問她的借口。

更何況以現在的氣氛，根本沒有辦法問得出什麼，如果她的出現真的是早經安排，我亦無需太早把一切拆穿。

「其實... 佢都幫咗我哋唔少...」Mandy 嘗試把尷尬的氣氛打破，「如果唔係佢，我哋仲比人困住喺海典居...」



「哈哈！唔好講到佢咁大愛，佢肯救妳哋，話唔定係另有目的...」素恩斜眼瞄了我一下，由於我不能完全排除我的私心，我對此沒有反駁的餘地。

「咁素恩呀，可唔可以講比我知，我哋而家去邊？」Mandy 打完場般向素恩問道。

「哼，妳問吓阿 Roy 少先啦！佢無啦啦喺恆安出現，應該有啲嘢要做嘅...」素恩冷淡地回應著。

「係喎！」經歷剛才的昏迷後，我差點已經忘記了我來恆安的目的，「返恆安！」我一定要把華叔他們尋回。

「你痴線㗎？我哋啱啱先喺嗰度救番你出嚟，你而家又話要返去？」素恩終於面向著我，「你打得過隻怪物咩？如果唔係佢睇唔倒嘢發癲走咗，你已經死咗啦！」

「係喎，話時話，我都未多謝你救番我...」我誠懇的向素恩説道，「多謝妳！」

「妖！我都唔知救你做乜... 不過我就係咁，見倒街邊流浪狗有危險，我都會救！」素恩答道。



「其實，妳係咪鐘意我，先三番四次救我？」我有心挑釁她，希望能因而找出真相... 因為，連我也想不到她不斷出現在我面前的原因。

「我... 我咁啱經過之嘛... 我都話我見倒流浪狗有危險，我都會救囉！」素恩尷尬地説道。

「咁點解每次有危險，妳都咁啱出現嚟救我？妳夠膽話唔係跟住我？」我不想輕易放過她。

「我都話咁啱囉，你唔信我都冇辦法！」素恩開始變得不耐煩。

「咁你可唔可以話我知，妳帶咗 Vicky 同 Carey 去邊？」我終於忍不住要進入正題。

「咩 Vicky 同 Carey 呀？我都唔知你講乜！我喺恆安救你㗎，我點會知佢哋比咩人帶走咗！」素恩説罷面色一沉，好像已經意會到剛才話語中的不妥。

「我都冇話過佢哋喺邊度唔見，點解她咁肯定嚟咗恆安救我，就等於冇可能捉佢哋走？除非，妳一早知佢哋唔喺恆安！」我立刻用嚴厲的語氣對她説，「快啲講，你同 Karen 捉咗佢哋兩個去邊？」