［人性/有甜］- 屍•家•馬鞍山（隔日更新）: Chapter 123 - 絕望的 Connie

我抱著 Connie 進入我的房間休息，然後準備返回廳中説出我的決定。

「我已經決定唔再去搵嗰個衰人，雖然呢個係唯一嘅線索，但都唔代表我可以知道佢哋而家去咗邊。」我停頓一下再道，「我會返去搵番我啲隊友，然後再從長計議。」

Mandy 聽後沒有即時作出反應，思考一會後才説，「不如... 比我幫你？」

我目定口呆地打量著她，一時間説不出話來。

「喂，唔好誤會... 我完全冇打算出賣自己喎... 只不過我會幫手同佢傾，搵女人同佢講可能好啲...」Mandy 急忙解釋著。



「哦... 咁都好吖...」我反正都打算放棄，讓她一試亦無妨。

「不過可能要等到晏啲，嗰女訓咗先去得。」Mandy 補充。

「Okay，無問題，我都想休息吓...」我説。

「吖... 其實我想問好耐... 你有冇打算換咗啲衫？」Mandy 打量著我，「同埋你啲傷口痛唔痛，洗唔洗清潔吓？」

「噢，係喎，咁我食完麵入去沖個涼先！啲傷口已經唔痛，唔洗點攪...」説罷我便開始吃起麵來。



「可唔可以話我知，其實入面個女人係咩人，佢好似好緊張咁搵個女...」Mandy 好奇問道。

「吖... 佢係我之前喺恆安商場識嘅...」於是我向 Mandy 講述 Connie 的身份與遭遇。

「吓... 咁佢都好慘喎，突然間啲屋企人死曬...」Mandy 壓低聲音説道。

「唉... 所以我之後出去同我啲 teammate 會合，就靠你照顧佢㗎喇...」我回應道。

「算啦，我都係女人，又係有小朋友，老公又... 我完全理解佢嘅感受嘅...」Mandy 説著亦眼泛淚光。



「媽媽、媽媽，我食完喇...」Mandy 聽罷便去照顧希婷。

我亦返回房間，打算拿取乾淨衣服待洗澡後更換。看見 Connie 仍在睡夢中，我亦不便去打擾。

於是我走進浴室，開始洗滌我的身心。

原來我身上的傷痕都不少，但奇怪的是，身體瘉合的速度真的十分之快。雖然傷口仍在皮膚上留下血紋，但我已經完全感受不到它們的痛楚。

但力量增強的同時，思想就好像比一股邪惡的力量所支配，不由自主地做出傷害別人的事情來。

力量與人性，我可以兩者兼備嗎？若果真的要我取捨，我又會捨棄那一樣？

沐浴後已經將近傍晚，看見 Connie 已經穿好衣服坐在梳化上，正與 Mandy 交談著。而希婷則舒適地睡在媽媽的大腿上。

我不便打擾，逕自帶著風筒返回房間，打算把頭髮吹乾。



整理過後，Mandy 抱著希婷走到房門前説，「可唔可以借間房一用呀？我想同佢訓一陣？」

「Okay 呀，你用隔離間房吖...」我帶領她進入旁邊的房間。

「你同佢傾吓啦，佢心情都仲未係好平服倒。晏啲再同你落去啦...」Mandy 説道。

我回到客廳，仍然雙眼通紅的 Connie 開口問道，「可唔可以同我返去，接番 Fiona 返嚟呀？」

我真的想不到，我可以怎樣去答應一個母親，去看她那已經身首異處的女兒。

「我乜都冇㗎喇，起碼比我攞返佢條屍吖...」Connie 的眼淚再次奪框而出，「我唔想佢孤零零一個咁留喺嗰度...」

「我同妳返去冇問題，不過妳要有心裡準備...」我只有無奈説出真相，「佢... 唔係咁完整...」



Connie 聽後再次感到暈眩，幸好這一次已經沒有像之前一樣暈倒過去。

「我已經冇嘢可求，只求見返佢...」Connie 虛弱地説著。

看來就算我不答允，她也會自行返回，反正我仍要等待 Mandy，於是我和 Mandy 交代一聲，便與 Connie 出發。

回到地下大堂，赫然聽到外面傳出人們的尖叫聲。

我立刻與 Connie 跑到門外，借車子的掩護向外窺看。赫見為數不少的喪屍聚集在對面屋苑的圍欄外，而屋苑內人影恍動，尖叫聲應該是從哪裡傳出。

「對面應該發生咗啲事，我哋而家...」我的話仍沒有説完，只見 Connie 已經從車的另一旁跑了出去。

這完全出乎我的意料，我正猶豫是否要出去阻止她，便已經看見有兩頭喪屍向她飛奔而去。

我立刻拿出切肉刀衝出，我大叫著吸引它們的注意，但這不但成功引起面前兩隻喪屍的留意，還令遠處的喪屍對我產生了興趣。



我打算先把面前的喪屍解決，於是我一腳踢向走得較前的一隻，乘它失去平衡後跌之勢，我立刻趨前在它頸上補上一刀。

另一頭喪屍亦從旁殺至，我立刻轉身用手擋住它的攻擊。雖然手臂被它抓著而產生痛楚，但我仍能準確地把刀插入它的太陽穴中。

我把刀拔出，喪屍的黑血立刻噴射而出。我回望 Connie 走往的方向，她已經成功越過路中心的鐵欄，奔向喪屍群中...