［人性/有甜］- 屍•家•馬鞍山（隔日更新）: Chapter 122 - 保安室的魔鬼

他説著這句時，嘴角滲出陰沉的笑容。我看在眼裡，心裡立即湧出千般思緒。

不缺食物？我看著枱上的鮮肉，不禁打了個冷顫。

「咁...」我望了一下他身上的名牌，「呀輝哥吓話，咁你想要乜吖？」其實，我已經大概猜到答案。

「女人！」他斬釘截鐵地答道。

「女人？你冇咩？你有咁多肉食，應該都困住咗唔少人啦？」我打算試探他的底縕。



「咩呀？我唔知你講乜喎...」他裝作全不知情。

「我話呢袋呀，你唔好話比我知係人肉嚟㗎！」我指著裝著鮮肉的袋，然後連人帶櫈把他壓往辦公卓旁。

他掙扎著想逃離我的壓制，甚至想反過來把我制服，可惜他完全無法阻止現在的我。

「你想點呀？我食咩唔關你事啫！你... 你如果殺咗我，你就唔會知道電腦個 password！」他大叫著。

他説得對，我不要忘記我來這裡的目的。



「講，password 係乜，如果唔講我就殺咗你！」我恐嚇著他。

「我死都唔會講㗎喇，橫掂而家生存都冇乜意義！你要殺就殺啦！」輝哥的語氣十分堅決。

我無計可施，只好將他暫時放開。

「其實都係各取所需啫，以你嘅身手，要捉個女人嚟，唔難囉！」他獲釋後便繼續游説，「嗱，唔好話我唔比機會你，我知道呢個屋苑都仲有唔少生還者，附近嘅好似海典居呀，馬鞍山廣場咁，都好似有唔少人㗎...」

聽著他像如數家珍般道出附近的情況，令我想從他身上獲取多一點情報。



「你咪係度吹啦！出面一街都係喪屍，你又點知外面咁多嘢呀？」我裝作質疑著他的説話。

「平台附近都冇喪屍，同埋曾經有人嚟求救呀嘛，我咪知囉...」他説到後段突然停止...

「咁而家啲人去咗邊呀？」我追問道。

「唔... 唔知喎... 佢哋問完嘢就走咗，點知佢哋去咗邊呀？喂！你係咪搵女嚟，唔係就走！」輝哥呑呑吐吐地回應著。

「係咪我帶女嚟，你就開比我？」我揪著他的衣領説，「唔好諗住玩嘢！」

「係... 一定...」他只有無力地回應。

我離開保安室，咀嚼著他説的每句話。

他應該有所隱瞞，那些鮮肉很有可能是人肉，而那些求救的人，會否就是這些肉的主人？



而 Carey 跟 Vicky，又會否在這些人之中？

我返回家中，屋內洋溢著公仔麵的香氣。Connie 亦被人蓋上了被舖，安睡在梳化上，Mandy 則捧著熱騰騰的湯麵，從廚房走出來。

「你返嚟就啱喇，啱啱煮咗啲麵，一齊食吖...」Mandy 熱情地説著。

「嗯...」話語剛落，一陣饑餓感襲來。

我看著 Mandy 捧出來的餐蛋麵，似曾所識的感覺，加上對 Vicky 的思念，不禁令我流下淚來。

正在同枱進餐的希婷見狀，顯得有點不知所措，只有無奈的離坐躲在 Mandy 身後。

「希婷乖，過嚟呢邊食吖...」Mandy 説著將湯麵移到梳化前的茶几上，示意希婷前往那兒進食。



「頭先係咪發生咗咩事？」Mandy 返回後問道。

於是我把剛才遇到的事一一告知。

「吓... 咁你打算點呀？」Mandy 聽後有點驚訝，只有向我追問著。

「我唔知... 未諗倒...」我亦無奈地回應。

「嗰兩個朋友對你好重要㗎？」Mandy 追問。

「吖... 係... 其中一個係我女朋友嚟...」我回答道。

「哦...」Mandy 聽後不置可否。

「呀～」此時梳化那兒傳出女人的輕微叫聲。我們探頭查看，看來 Connie 已經甦醒。



「呀... 呢度係邊度？」Connie 嘗試讓自己爬起，冷不防被舖從身上滑落。

「呀！」Connie 立刻重新把被子蓋上，然後四處張望。「Fiona，Fiona 呢？」

她用被包裹自己後便四處尋找，然後走到我們的面前。

「阿 Roy，Fiona 喺邊呀？點解佢唔喺屋入面嘅？」Connie 發了瘋一般問道。

「Connie 你冷靜啲先，慢慢聽我講...」我打算先安撫她的情緒。

「冷靜，我個女唔見咗呀！點冷靜呀？」Connie 已經瀕臨崩潰。

「好，你冷靜啲聽我講，你個女... 已經比人殺咗...」我硬著頭皮説出這殘酷的事實。



「吓... 冇可能... 冇可能㗎！」説罷她已經暈倒在地上...