［人性/有甜］- 屍•家•馬鞍山（隔日更新）: Chapter 114 - Connie 的家 (上)
「吓？我都係想保護妳哋啫...」我心感無辜。
「你係鬼！你頭先似係想滿足你嘅殺人慾望多啲囉！」Connie 説著，「你其他地方唔打，要槍槍打頭。如果要嚇佢哋，向天開槍，甚至打吓啲手手腳腳都得啦！」
我不知道怎樣回應... 的確，剛才的擊殺行為確實為我帶來興奮的感覺。
「唉... 不過算啦，唔殺都殺咗囉，我都明白你都係想保護我哋嘅...」看我沒有反應，Connie 只有自己打完場。
「坐啦！我斟杯水比你...」Connie 説罷已經步入廚房，剩下仍是眼紅紅的 Fiona 坐在梳化上。
客廳特色牆上掛著的，全部都是一家三口的合照，可見他們是個愉快溫馨的小家庭。
當然，這是兩星期前的事了。
「叮噹」這時，門鐘忽然響起。
我立刻持槍戒備，然後示意 Connie 先由防盜眼中窺看，從她的口型示意，門外應該是兩個她不認識的人。
我亦趨前從防盜眼觀看... 門外正站著一男一女，細心觀看，她們有著似曾相識的面孔。
是 Johnson 跟 Heidi。
我的心情開始變得復雜，當初我把他趕走，不知道他會否仍然懷恨在心。而就他在服裝店的行為而言，他絕對是一個百分百的賤人。
我示意 Connie 先跟他們詢問來意，好讓我在必要時仍能作出反應。
「阿 Roy 哥，我知你都喺度㗎，頭先我哋喺門口個閉路電視見倒你...」Johnson 隔著門向我叫道，「冇呀，我哋之前走難嚟咗呢度，好彩加入咗屋苑嘅保安隊... 我想講頭先門口發生嘅事係一場誤會，係守門口嘅守衞自把自為。呢個唔係我哋主席嘅意思，我哋嚟係解釋同賠罪嘅！」
「主席，咩主席呀？」我回答道。
「我哋個屋苑立案法團主席呀！佢而家負責人手物資之類嘅分配...」Johnson 解釋道，「不如比我哋入嚟先講吖？我哋冇帶武器嚟㗎...」
我向 Connie 示意 okay，讓他們二人內進。
為防有其他人借機衝入，我一直持槍戒備，直至大門重新關上。
「唔洗緊張喎 Roy 哥！我哋真係嚟道歉㗎！」Johnson 誠懇地説。
「唔緊張至奇呀，你啲往績咁差，點知你會唔跣我呀？」我認真地回答。
「冇喇，自從發生咗咁大件事，同 Heidi 失散咗，跟住佢又唔顧危險咁嚟搵返我... 咁辛苦先喺番埋一齊，所以我已經決定改過自新㗎喇...」雖然 Johnson 這樣説，但我仍然對他半信半疑。
「咁你哋又唔喺呢度嘅住客，個主席分配咗你哋住喺邊呀？」我好奇問道。
「哦... 我哋有個人識得開鎖，所以我哋新嚟嘅人就住係啲冇人嘅單位度。」Johnson 回應道。
「吓... 咁你地即係擅闖民居啫！」Connie 插嘴説道。
「吖... 你都可以咁講嘅，不過我哋又真係冇地方住，而且嗰啲屋嘅人都唔知會唔會返嚟，所以我哋咪住住先囉。不過正因爲咁，所以我哋出嚟都冇得鎖門，都好唔方便...」Johnson 解釋道，「不過呢道都唔係好多外來人，所以我哋都淨係用咗十間屋左右啫...」
「咁你哋啲嘢食點嚟㗎？我見啲住客好似好悠閒咁嘅？」Connie 繼續問道。
「呢個就要歸功於主席嘅領導能力喇，佢平均咁將住喺度嘅人分工，主要負責內部行政、保安、清潔、外出搜尋物資嘅工作...」Johnson 繼續解釋著，「我哋每隔一段時間，就會派物資隊出去附近商場去搵食物同日用品，所以暫時我哋嘅物資都好充裕...」
「乜附近嘅商場冇喪屍咩？」我好奇地問。
「唉... 我都係加入咗冇幾耐，淨係知道馬鞍山廣場嗰邊係安全。據其他嘅隊員講，佢哋之前都犧牲咗唔少人，先至確保倒嗰度嘅安全，可以比大家去攞物資...」Johnson 説道。
「咁你哋個主席係咩人？」我再問。
「呢個我就唔係好清楚喇，淨係知道佢係法團主席...」Johnson 忽然雙眼一閃，「吖... 你哋有咩想要，我哋可以幫你哋攞喎...」
「吓... 就咁攞呀？有冇咩條件㗎？」Connie 疑惑地問道。
「吖... 其實都冇乜特別嘢嘅...」Johnson 停頓了一下，「頭先都講每個人都要幫屋苑做啲嘢，咁先公平... 不過你哋啱啱先嚟，而家又咁夜，不如我哋攞啲嘢食比你哋，聽朝先去搵主席，睇吓佢有咩安排啦...」
「咁好啦，我哋想要啲麵、乾糧同飲品...」Connie 答道。
「好吖... 咁我去攞啦，Heidi 你係度陪吓佢哋，睇吓仲有咩需要啦...」説罷 Johnson 已經站起身準備離去。
「嗯...」Heidi 輕輕點頭回答。
待 Johnson 離開後，Heidi 終於開口問道，「係呢，我想問 Coco 同 Carey 去咗邊呀？」
「Carey 仲安全，不過 Coco 就...」我的心情突然變得沉重。
「咁，你啲朋友呢，佢哋係咪喺附近？」Heidi 好像意會得到，於是提出另一個問題。
不過，看來這才是 Johnson 要她留低的真正目的...