［人性/有甜］- 屍•家•馬鞍山（隔日更新）: Chapter 19 - 年華路的家

我強忍身上的痛楚，再次站起來扶起 Karen 逃跑。看見右手邊的浸會神學院標語，便打算走進通往神學院的小路。

但是我甫走進街口已經打消我的念頭，不遠處正有數隻喪屍在分享它們的大餐，要避免打擾它們而走過去近乎不可能，於是我便轉頭向另一邊（路牌上寫著《年華路》）的方向跑去。

我們走到一座老人中心門前，正想推門進去時，發現鐵門正緊閉著。我害怕喪屍會追來，便打算爬過鐵門進去。「你爬上去先，我喺下面扶你！」我向 Karen 説。

Karen 點了一下頭便開始爬上去，但好像不太夠力，「我唔夠力...」就在她快要墮下之際，我雙手托著她的臀部推她上去，背脊的痛楚再次襲來。

好不容易才越過鐵門，我們立即跑進室內以免被喪屍發現。



「你哋係邊個？做乜亂咁衝入嚟，你哋係咪新聞講嗰啲暴徒？」一個中年阿姐拿著掃把指向我們説。

「對唔住，唔好誤會，我地就係比啲暴徒追殺，迫不得已先至走入嚟避一避。」我解釋道。

「點解我要信你哋呀？我唔理，呢度係私人地方，你哋好快啲走喇吓！」阿姐毫不退讓。

「阿姐求吓你幫幫手啦，我朋友受咗傷，如果出番去我哋會走唔到㗎喇，至多佢好番我哋就走啦！」Karen 幫手遊説。

「睇佢唔似受傷𡃓！傷咗邊度呀？」阿姐語氣稍為緩和。



「佢傷咗背脊呀！嗱，你睇吓。」Karen 説著把我的背脊對著阿姐，弄得我「呀」一聲的叫了出來。

「嘩，做乜咁多玻璃碎㗎？睇落又好似幾傷喎。」阿姐在遠處觀察我，手上掃把並未放低。「我點知你哋喺咪壞人？同埋佢腰插住嗰把係咪刀嚟㗎？」

「吖...係，不過...我都係攞嚟傍身㗎...㗎啫...」我説時背後痛楚加劇，身體亦開始有一種無力感。

「求下你幫幫手啦...」Karen 繼續請求，跟著向我腰間伸去。「我而家放把刀喺度...」我的切肉刀被放在接待處的枱上，「你可以搜下我哋，已經冇武器㗎喇...」

阿姐仍然堅持，「你哋喺度都冇用吖，呢度都冇醫生幫你止倒血！」



「咁你哋有冇急救用品吖？我學過少少急救護理，我會幫佢攪...」Karen 説道。

「算啦阿萍，比佢哋入嚟啦！」一位大叔從走廊慢慢地走出來，年紀好像比面前的阿姐更大。

「但係院長，佢哋來歷不明又有武器，仲受咗傷，都唔知佢哋係咪壞人。」萍姐續道。

「我哋呢度又冇野比人攞，偷野都唔嚟呢度啦！何況你都話佢受咗傷，更加需要幫下手。」院長慈祥地説。

「但係我哋...」萍姐仍然心有不甘。

「聽我講啦阿萍...我哋三樓有啲房平時都好少用，咪比佢哋休息下囉。嚟啦萍姐，幫我帶佢哋上去啦。」院長再説道。

「多謝院長！放心啦，等我朋友傷勢好啲，我哋就走嫁喇...」Karen 向院長道謝，我也點頭示好。

「咁你哋跟我嚟啦！」説罷萍姐已經頭也不回地，往走廊方向走去。



「咁...我哋，行喇。」我們與院長交帶一句後便跟著萍姐走。

「行快啲啦，後生累累，行得咁慢，我仲有好多野做㗎！」萍姐越走越快，對因傷痛而變得行動緩慢的我再三催促，我亦沒有氣力反駁。

好不容易走到三樓房間，體力好像已經透支，若不是 Karen 在摻扶著我，我應該走不到這裡。

我掃視了房間，內𥚃有單人床，木櫈，床頭柜各兩張/個，除此之外便甚麼都沒有。

「喂佢好似就死啦喎，要死死遠啲，唔好整污糟啲地方！」萍姐句句逼人。

「佢應該係流血所以身體弱啲啫，唞下就冇事嫁喇。」Karen 答道。「同埋我想問吓有冇急救用品？」

「你哋咁麻煩㗎！急救箱喺二樓護理室，你跟我去拎！警告你哋唔好周圍走，呢度有老人家，唔好攪倒佢哋，到頭嚟煩著我！」説罷萍姐就離開房間。



Karen 扶著我躺在床上，背部朝天伏著。跟著便立刻追著萍姐去找醫療用品，過了一會才返回房間。

「呢度唔喺好多嘢可以用，不過應該夠啩！而家我同你洗傷口先，你忍住！」

背脊傳來一陣又一陣的劇痛，跟著就是全身冰冷的感覺。過了一會，連意識也漸漸失去...