［人性/有甜］- 屍•家•馬鞍山（隔日更新）: Chapter 16 - 分歧

「咦？阿 Roy，未夠鐘接更喎？瞓唔著呀？」Ben 發現我在大廳後問，他表現鎮定，好像沒有事發生過一樣。

「係呀！成晚典呢典去瞓唔倒，所以咪諗住落嚟早啲接更吹下水囉！咁，你哋...」我擺動手指指向他們兩人。

「我留低咗部電話，銀包，手袋喺舖𥚃面，阿 Ben 話肯陪我番去拎。」Eva 搶答。

「哦！咁出面嘅環境安唔安全？冇喪屍咩？」我佯作什麼都不知道。

「我啱啱諗住同你哋傾吓。吖... Eva，如果你攰就上去瞓先。」Ben 答道。



「哦，好吖，攪咗大半日，成身黐納納，我上去沖涼先！Good night！」Eva 説罷便走上樓梯。

我心想「你緊係要沖涼啦...」轉頭和 Ben 説「咁你有乜發現？」

「我覺得啲喪屍有作息時間，佢哋好似只會喺日頭活動，夜晚就同我哋一樣要休息。不過都有啲例外，我見村口都有幾隻喺度徘徊。所以要再研究下。」Ben 説道。

「其實我想講聽朝我哋會出發去恆安果邊，你哋會唔會同我哋一齊去？」

「而家嘅情況唔係咁許可，一到日頭，佢哋又會回復正常，比佢哋追住好難走得甩。」



「但係你之前唔係話想番去㗎咩？」

「係，不過我再諗過，其實又可以去得邊吖？番到去都未必安全，不如喺度等人救好過。」

其實，我也十分明白，如果沒有需要尋找和守護的人，根本不值去冒險。女朋友在大嶼山 camping 應該安全，不需要太擔心。若果不是 Suki 要回家看父母，我也犯不著去冒險。

「不如你哋都留喺度啦！呢度啲野食都頂倒幾日，再唔係到時我哋拍住出去搵野食都 ok 啦！」Ben 極力勸我留低。

「等我諗下先！」其實，我也沒有拿定主意。



「唔緊要啦，你慢慢諗下。我去瞓先，早唞！」Ben 説著便起身上樓去。

之後也沒有大事發生，與 Keith 交接後，便回房睡覺...

「喂大佬，起身喇！」Keith 在拍我的手。「佢哋煮咗早餐，再唔起身就冇得食㗎喇！」

簡單梳洗後便走到大廳，看見各人都已經差不多吃完了。
「你哋...好似食完啦喎...」

「你怕咩吖？Vicky 一早留定咗最大份嘅比你啦！自己喺廚房拎啦，嘻嘻...」Suki 笑道。

我走進廚房，鑊蓋蓋著一碟精美的早餐。

「嘩！好靚喎，點解我哋果啲冇咁靚嘅？」Kimi 看著我的早餐問。「Vicky，點解嘅？」



Vicky 滿險通紅。「咩呀？你哋果啲咪一樣！你哋食曬之嘛！」

「唔...好味，你哋煮啲野真係好味嫁喎，開舖都得。」我已經急不及待吃起來。

「你哋係咪諗住出發喇？」Ben 問道。

眾人注視著正細味早餐的我，我只有尷尬地回應。「吖...係呀，食完早餐就傾吓點行。咁你哋會唔會同我哋一齊？」

「我哋覺得留低會安全啲。呢度暫時都夠野食，出去預著啲喪屍又走唔切，都係留番喺度等人救。」Ben 好像已經當這裡是自己的家。

「唔洗問我啦，我自己屋企做乜要走？」Eva 説出預期的答案。

「我都冇地方去，唔走嚕...」Kimi 的答案也在預期中。

「咁即係得我哋四個啦！好，食完早餐就傾下點行。」我咬著美味的雞扒説。



「我哋仲要整啲野傍身，雖然唔知有冇用，但都好過手無寸鐵咁出去。」Keith 和議著説。

「Eva 姐，廚房啲罐頭可唔可以比啲我哋呀？我哋留低雪櫃啲生肉同你交換吖？」Vicky 問道。

「應該問題唔大嘅，我可以比一半你哋。應該夠你哋食兩/三日嫁喇，到時你哋都應該搵倒地方落腳啦！」Eva 思考著道。

「應該都夠用，再加埋我哋原本啲乾糧，個背囊都唔輕，太重我哋走起嚟都好唔方便。」Keith 答道。

「喂你同講咗咁耐，點解沒人問我會唔會留低嘅呢？」大家一致地望向聲音來源...