能擁有你嗎？哪怕只有一天: 十一 變心

係佢地一齊既呢半年，我都係會係其他人口中聽到佢地既野，因為佢地一齊左之後就封鎖哂所有我搵到佢地既途經，話咁快我地就升到中五。由於我之前同凌詩frd既時候，我地會共用locker，佢有幾本書依然留左係我度，我逼於無奈之下就whatsapp返佢。

我：你有幾本書仲係我度，我下個禮拜返學比返你。

詩：唔該你。我好想同你講返句對唔住，我真係後悔左。

我：做咩咁講？

詩：我想同佢分手，我同佢根本唔適合。





原來呢個世上真係有性格不合呢個分手理由，因為我地凌詩係全班最高既兩個女仔，永遠係課室都係我同佢坐最後個兩行，佢就坐我後面。禮拜一比返本書佢，佢突然同我係度講佢同何逸霖既問題，其實我真係唔想聽，你已經係我中意佢既時候同左佢一齊，你仲好意思依家同我係度講？直至佢講左一句。

詩：我中意左第二個。

我：下，點解會咁？

詩：佢對我好好，加上呢排我同何逸霖成日嘈交，佢係何逸霖既好兄弟黎，每次係我地嗌交既時候，佢去會安慰我，最後我慢慢就中意左佢。

我心諗：何逸霖身邊既兄弟我都識嫁，都無可能會同佢一齊啦，原來佢身邊啲兄弟又唔同左喇。





我：下，咁你諗住點，你真係同佢無得挽回喇咩？你同何逸霖未分手，你點可能同其他人一齊？

詩：我唔知，你覺得我同佢分手好無？

我：呢啲野你自己決定啦，我都唔多講咁多喇。

其實我預左佢同何逸霖終有一日會分手，所以我都無乜好大既反應，只不過我估唔到佢會中意左第二個。到左幾日後，佢同我講佢已經同何逸霖分左手，仲同左另外個男仔一齊左，凌詩同我講佢忍受唔到何逸霖既脾氣，我聽過好多人講過何逸霖既脾氣好差，但係佢從來都無發過我脾氣，而我成日係度諗點解個個人都咁講呢？我都無再去問凌詩太多，因為我明白佢呢一刻揀左另外一個，證明佢同何逸霖真係唔適合。不過點解人可以變心咁快？