一次無心嘅表白，竟然令到佢同咗我一齊: 終章
https://www.youtube.com/watch?v=oL8xuAnuLMg（我們很好）聽住睇，見link轉歌
一直以嚟我都冇諗過我同阿靜會有完嘅一日，冇諗過我哋嘅回憶原來只係咁短暫，更加冇諗過阿靜一直以嚟都只係玩我……
「你…你真係肯做我女朋友？」
「係呀傻瓜！」
「我…我可唔可以拖你隻手呀？」
「傻瓜！」
「我哋要永遠咁係埋一齊呀！」
「一定可以架傻瓜！」
「首歌你真係揀得好好呀，真係好啱我哋呀！」
「梗係啦，傻瓜！！」
原來一直以嚟，我只係一個傻瓜……
「你估我哋將來會點吖嗱？」
「我哋將來會有一間屬於我哋嘅屋，屬於我哋嘅鋪頭，屬於我哋嘅幸福！」
「你估我哋將來會唔會好似呢條路名咁吖嗱？」
「唔會，一定唔會！」
「其實拍拖，係咪兩個人之間嘅事？」
「我諗…結婚之前…應該都係嘅…」
「我好憎你呀，你乜都話哂俾人聽，樣樣管到我冇哂自由！」
「對唔住呀…我改…你返嚟我身邊吖……」
說過要你快樂…才令你發覺不再快樂…阿靜，對唔住呀……
一直以嚟，我同阿靜明明每日都過得好幸福，幾乎交都冇嗌過，就算有咩事最多都係冷戰幾粒鐘。我完全估唔到我哋分手分得咁突然，咁毫無徵兆竟然係因為阿靜一直以嚟都係到玩我……
呢晚，我再一次失眠…不過我一滴眼淚都冇流過，只係好呆滯咁望住阿靜最後嘅一句說話…
我好想搵人傾訴…好想發洩…但我唔敢搵chloe同hailey…我好怕佢哋會鬧阿靜…我唔想佢哋鬧阿靜…我唔知我仲可以搵邊個…
明明平時身邊好多朋友…但原來到有事嘅時候，我想搵一個可以俾我安心傾訴嘅人都冇……
終於…捱過漫長嘅黑夜，等到朝早9點幾，我打咗俾helena ，無他嘅，因為我覺得只有佢唔會講阿靜壞話……
「嘟…嘟…」
「點呀，今次咩事呀？」
「hello…有冇少少時間呀…」
「講啦。」
我將同阿靜噚晚嘅對話講哂俾佢知。
「重點呢？」
「你識阿靜咁耐，你覺得佢會唔會講呢啲嘢呀……？」
「不如我問返你吖，你又覺唔覺得阿靜會咁講嘢吖？」
「明明係我問先…」
「答你就答啦。」
「唔會！
「咁咪得囉。」
「嗯？」
「其實你想知佢講嘅嘢係咪真有咩用？唔通知完佢會回心轉意？如果係事實嘅，你係咪會死心吖？如果係假嘅，佢作得出嚟呃你都有原因啦，咁你仲想知嚟做乜？」
當我想反駁嘅同時，helena 又繼續：「我講過，你留到佢嘅，佢就唔會走啦，你知完個原因又點？係咪會放棄吖？」
「唔會，我唔會放棄阿靜架！」
「咁咪係囉，況且，阿靜講你嘅另外兩樣嘢，管佢管成點我唔知就冇得講吖，但佢話你將你同佢嘅嘢話哂俾人知又話得你冇錯喎，你睇下你，啱啱又犯返同一個錯。」
「我…我只係想搵人傾訴下啫…」
「其實呢啲事關其他人咩事？就好似呢件事咁，你係信佢唔會咁講嘅做咩要問我？你跟本就係想有人認同，想人哋認同你嘅所有行為，去合理化自己所有嘅錯。」
我唔知事實上我到低係咪真係想人哋認同我嘅做法…但至少helena所講嘅嘢，我完全搵唔到反駁嘅餘地…
「咁我而家應該點做…」
「你而家要做嘅就係做返個人，再咁頹落去嘅冇人會可憐你。」
收線之後，我好認真咁去諗返頭先helena嘅所有說話，我知道無論點我都唔會放棄阿靜…至少呢一刻一定係。而我都相信阿靜唔會想同件廢物一齊，所以…我呢兩日係屋企，好努力咁迫自己唔好喊，唔好再諗阿靜，重新過返正常嘅生活。
跟住星期一，我照常咁上堂落堂，亦都照常咁……去返以前同阿靜去過嘅每一個地方。雖然以前嘅畫面不停咁播放出嚟，但我個人就係咁，既然離唔開呢個傷心嘅旋渦，咁倒不如係呢個旋渦入面尋找一點快樂。
https://www.youtube.com/watch?v=o7J3z8yveAk（超人）
係呢啲充斥住我同阿靜嘅地方，我亦都可以係心痛之中，見到好多我同阿靜過去甜蜜嘅影像……自從分手開始，我養成咗一有任何唔開心嘅事，都會去海邊嘅習慣…因為，呢到有我同阿靜嘅回憶陪住我……
係認識阿靜之前，我從來都唔覺時間係過得咁快，明明所有事都好似只係發生咗幾日咁，但轉眼間又就嚟到聖誕…以前因為冇女朋友嘅關係，我都只可以自己毒係屋企，每逢佳節上高登，最多嘆息一句這些機會不屬於我…但今年…應該係話原本未來嘅每一個聖誕我都可以同阿靜一齊過…
我好怕…我未試過咁怕到聖誕…明明聖誕係耶穌生日，但偏偏俾人包裝到情人節咁，擺明精神欺凌緊啲單身人士…以前單身過聖誕已經夠折磨，今年仲要係失戀過聖誕……
不過幾日後，我接到一個電話，亦都係呢個電話話我知，我並不孤單。
「阿恆，我有啲嘢想請教下你呀…」呢個電話，係由個有異性冇人性，一拍拖就冇搵我嘅朋友，flora打嚟。
「講吖…」
「我真係受夠我條仔啦，佢成日煩住哂，又成日唔俾我有男仔朋友，我就嚟考試佢仲成日要我陪佢出街，一個中二都留足4年班，我好想同佢分手呀！」
「咁你咪同佢講分手囉。」
「所以我咪打俾你囉！」
「我冇做呢啲陰質嘢好耐…」
「唔陰質架，嚟啦，講啦，你講事實咋麻…」
其實件事就咁嘅，唔止flora，係任何一個女性fd一拍拖都會即刻斷咗同我嘅聯絡，因為如果唔係嘅話，佢哋都會好快分手。原因當然唔係因為我係地獄黑仔 王，會傳埋啲黑氣俾佢哋啦。其實係因為唔知點解佢哋條仔衰親啲咩都會咁啱俾我捉到正一正，加上我把口夠賤…咁多年嚟都拆散不下20對情侶…
「事實就係，分手咪分手囉，洗理由咩？你條垃圾男友我憎佢好耐，又食煙又入扮大佬，有事又要靠你拆，讀書唔成，行古惑又上唔到位，人又柒，你話佢可以俾到啲咩幸福你先？」
「其實佢對我幾好架…我都好愛佢架…」
「你都痴撚線，愛可以當飯食？而家佢自己廢都要拉埋你落水呀，俾你成績再好，搵到份好工，唔通養埋條垃圾呀？你唔好唔記得佢仲成日周圍點火頭，一間行出街無啦啦俾人斬幾刀住院又冇錢，又要你照顧，你話佢憑咩要你跟佢一世？」
「但我真係好愛佢……」
「信我啦，呢個世界唔係話愛就得架…timing唔啱，幾愛都冇用，呢件垃圾唔值得你繼續架。你諗下佢幾幼稚，唔通你要好似照顧細路仔咁照顧佢一世咩，咁大個人中二都未讀完，剩係識管住你，有撚用咩？」
「咁我而家應該點做…」
「直接講分手，唔好再理佢，佢講乜都唔好聽。」
咪住…點解個情況好似咁熟口熟面嘅……係啦…阿靜當時就係咁做……但我唔明……明明flora係因為唔忍心分手，要人教先做到咁絕，但阿靜係玩我……
或者我個心偏向相信，其實阿靜唔會咁絕，都係因為身邊有另一個「張雋恆」教佢咁做……或者呢個只係我幫阿靜搵嘅一個籍口，但已經足夠我相信阿靜唔係咁絕嘅人……
而flora亦都因為我嘅一番說話，令到聖誕節前被單身嘅人多咗個，所以我知道，我並不孤單……
https://www.youtube.com/watch?v=WiBUpDp3WKA（突然很想你）
係聖誕當日，冇情人嘅我理應留係屋企，不過我偏偏鍾意自虐，所以我照樣自己一個出街行，為嘅就係望住街上嘅情侶哂幸福…冇阿靜係身邊嘅日子啱啱好過咗一個月，但感覺就好似噚日先同佢行完街咁…
雖然唔知自己想去邊，但就係唔知點解會去咗荃灣…於是我又行咗去碼頭。
望住沿途各種嘅燈飾照耀下，令我到覺得我好似唔應該出現係繁華嘅街道上咁…數之不盡嘅情侶同我擦身而過，顯得我格外孤獨…更加令我變得完全唔屬於呢個地方……
到咗荃灣碼頭，我唔知可以做咩，就咁坐咗係到，腦入面全部都係阿靜同我一齊嘅日子…仲有佢最後一句嘅說話。
呢一刻，我打咗俾一個人…
「可唔可以出嚟陪我呀…」
「er…你係邊到呀…」
「碼頭…荃灣碼頭。」
「咁你等我一陣吖，我而家過嚟。」
原本今日，chloe同hailey有約我出街，不過唔知點解，我拒絕咗…原本諗住屈係屋企嘅我，點知都係出咗嚟…
15分鐘之後，hailey打俾我。
「你係邊呀？」
「西鐵站間7仔。」
收線冇耐，hailey就出現係我面前。
「你又飲酒…」
「陪我飲吖…」
「嗯…」
之後，我哋好靜咁將成支vodka溝綠茶清哂。
到第二朝醒返嘅時候，我發現自己瞓咗係hailey間房，而hailey就瞓咗係我隔離。不過，我哋冇衣衫不整，因為連衫都冇係身，點不整。
講下啫，我哋的確冇衣衫不整，甚至條皮帶都冇解開過。雖然我醒咗，但身邊嘅hailey依然瞓到隻豬咁，而成件事最大嘅問題係…我係攬住咗hailey咁瞓，我如果要縮返隻手可能又會嘈醒佢…於是唯有由得隻手繼續痺…
唔知過咗幾耐，hailey終於都醒咗。
「你帶我返嚟，唔怕屋企人見到呀？」
「唓，佢兩公婆聖誕拋棄咗我自己去咗澳門玩，攪到我要自己留係屋企。」
「係呢…咁你噚日唔係應該約咗chloe出街架咩？」
「咁你打嚟吖麻，我咪叫佢返屋企先囉…」
聽完我只可以靦腆咁笑一笑…
「肚餓未呀…不如落去食嘢咯…」
「嗯…」
我同hailey一離開咗張床之後，再次出現返朋友嘅界線…直到食完早餐，我就返咗屋企。
我開始好似之前咁，每晚正常咁同返chloe佢哋傾電話，不過聖誕發生過咩事，我同hailey又係將呢件事視為最高機密。
當我以為我可以因為阿靜嘅決絕而忘記佢嘅時候…我見到阿靜留俾我嘅…最後嘅溫柔…
12月31日，2011年嘅最後一日，正當我想將呢一年所有冇用嘅嘢都清走嘅時候…我諗起阿靜嘅一張記念冊…
當我再一次細閱嘅時候，依然不禁心甜起上嚟…
姓名：lam chingyan
興趣：打阿恆同咬阿恆
留言版：bb，好想同你可以好似我哋嘅主題曲咁，海角天涯，一直到青春變成白髮，仍然以傻瓜相稱。
而係右下角，有句句子突然吸引咗我嘅視線…
阿恆…我愛你…但若果分開了…請忘記我…
睇到呢到，我個心突好似揪住咁痛…我突然抖唔到氣，眼淚不停咁流…
我唔知阿靜幾時留低呢句說話…但我可以肯定我當晚睇嘅時候一定冇…
原來…阿靜預咗會有呢日…
原來…阿靜到最後都將佢嘅溫柔用一個咁嘅方式留俾我……
睇完之後，我衝咗出門口，不過唔係去阿靜屋企，而係去咗我哋嘅「嗰個海邊」…
我行咗上石橋，去到盡頭，希望利用微風將一句說話傳到阿靜耳邊…
阿靜…
我相信我哋會再見架…
我愛你呀…
聽唔聽到呀……
《我用文字打造了一部時光機…為嘅就係想興阿靜再一次相遇……》
《或許未來的我們會遇上不同的人，但我永遠都不會忘記那日那天的你……》