一次無心嘅表白，竟然令到佢同咗我一齊: 第五十二章

係黑暗中我聽到一把久違嘅聲音：「你唔係咁冇用呀，為咗個女仔唔食唔瞓攪到自己暈埋！」係阿強係到講嘢。

「我真係唔得呀…我冇胃口又冇睡意…我好辛苦呀…」

「妖，戀咋麻，邊個未失過啫？枉你成日自命不凡，原來又係廢物一條，失吓戀就攪到要生要死咁！」

「你唔明架啦…」

「你都痴撚線，而家全世界得你一個失過戀咩？」





「咁我明明同佢好地地，突然話分手就分手，我真係好辛苦呀…」

「呢位先生，唔通佢俾個理由你先分手你就會唔辛苦？佢要分手嘅，咩理由都係廢話，你留得到佢就唔會走啦，醒下啦廢人！」

濛瀧間，我feel到有好多水倒緊落我塊面，我慢慢清醒返嘅時候見到係個水壺淋緊我，再望返自己，全身同地下都濕哂。跟據成個環境證供顯示，我應該係暈之前咁啱掃跌咗個水壺，又咁啱佢冇跌埋落地，又咁啱啲水淋正係我塊面到…我諗嗰陣唔係咁多咁啱擺埋一齊，都唔知之後會點…

係完全清醒返嘅時候，我同阿靜係屋企嘅所有嘢，而家好似投影片咁一直播放出嚟…一齊坐係梳化到依偎住對方嚟睇碟；係間房到攬住一齊數星星；係廁所一齊沖涼；廚房入面一齊煮飯……

屋企每一個角落都係到同步放影緊我同阿靜嘅一切…我唔識放棄，唔識忘記……我寧願好似啱啱咁一直暈落去……





雖然阿強講得啱，我再咁落去都唔係路，但如果咁快冇事就唔係真正愛過啦…係暈過返生之後，我好努力咁迫自己倒啲嘢落肚，但我為嘅只係星期一可以有足夠精神同體力，確保唔會暈係條街到。不過，我並唔係因為要上堂，而係，我要去等阿靜…

如果我見唔到阿靜，唔親口問清楚佢嘅原因，我係唔會心息…而為咗可以挽留佢，我買咗之前阿靜話好鍾意嘅domo公仔，諗住送俾佢…

我再次係阿靜屋企樓下由日頭9點坐到夜晚，但一直都見唔到佢身影…如是者，我走咗成個星期堂，但依然都等唔到阿靜…

點知星期五晚，我返到屋企嗰陣，我見到阿靜send咗條離線信息俾我：「夠啦阿恆，你唔好再等我啦，你唔會等到架…」而信息嘅下面仲有一條youtube link。

我click入條link到，原來係首歌嚟…周柏豪嘅「夠鐘」…我腦入面嘅畫面，再一次返到去分手嗰一日…





「我哋…差唔多夠鐘啦…」阿靜當日所講嘅…原來係指我哋嘅關係…等我仲成日以為自己好了解女人…但原來到最後，我乜都唔明…

雖然阿靜好似知我每日都等緊佢咁，話我一定等唔到，但我從來都唔係一個易放棄嘅人，所以，又等咗一個星期…

呢兩個星期我冇上堂，冇搵任何人，幾乎同外界失去聯絡，就算係chloe同hailey我都只係虛應兩句就算…

我真係好想好想再見多阿靜一面，即使只係一面都好……亦都係因為咁，我依然會出現係阿靜屋企樓下…

直到12月10日嗰晚，我拖住無靈魂嘅身軀返到屋企嗰陣，見到阿靜上咗msn，連唔見咗嘅靈魂都即時歸位。

「阿靜…我好掛住你呀…點解我哋要分開呀………」我急不及待咁send咗出去。

「夠啦阿恆！你癲夠未？你日日唔返學係到等我有咩用？我話咗分手就分手架啦！你要原因吖麻，咁我而家話你知，我好憎你將我哋嘅嘢話哂俾你啲好朋友知，明明我哋兩個人之間嘅嘢，關佢哋咩事？仲有，你小學嗰個女仔講得你好啱，我唔係屬於你架，我都有自由，我都有自己嘅生活架！你管得我好辛苦呀，我真係我真係好憎你呀張雋恆！」

曾經聽講過，一段關係會嗌交即係仲有得救，連交都唔嗌啫係已經玩完。係見到阿靜呢段嘢之後，我個心突然有返希望。





「我改吖，我唔再同佢哋講我哋嘅嘢吖…以後你鍾意點就點吖…我唔管你吖…求下你返嚟我身邊吖阿靜………」

「夠啦！我唔會同返你一齊架！」

「點解呀…」

「我一直以嚟都係玩你架咋！我而家玩夠啦死肥仔！你唔好再煩我呀！」

「唔係架…我知你唔係啲咁嘅人嚟架…你一定係講大話架…」我未打完，阿靜又再落咗線……

望住阿靜佢話玩我嗰句，我個頭好痛…好暈…一直依賴住對佢嘅信任嚟支撐住嘅身體，呢一刻已經冇咗個支撐點…我嘅精神完全崩潰…得返空洞嘅眼神停留係阿靜話玩我嘅句子上……

《愛情從來都唔複雜，複雜嘅係人類嘅心……》