一次無心嘅表白，竟然令到佢同咗我一齊: 第二十五章

「喂…」

「做緊咩呀？」「我同hailey聽日出街，你嚟唔嚟？」聽埋chloe把聲我就知今晚餐飯我都唔會可以食得安樂……

「er…我而家唔得閒，今晚答你哋…」

「乜你都會唔得閒架咩？做緊咩呀？又打機呀？」

「係呀係呀，唔講啦拜拜。」估唔到我都有要用對阿偉嘅cut線方法嚟對chloe佢哋……





「你起得身啱啱好呀，食得飯啦！」之後即刻衝咗入廚房拎啲餸出嚟。

阿靜試咗啖之後話：「你落樓下買架？」

「嗱，我都話我識煮飯架啦！好味咧！」

「唔係噃，我諗住叫你下次唔好再去嗰間買咋麻，咸咗啲。」

我頂……咁都有位入一入我……都好，起碼冇問起hailey……





食到一半嗰陣，阿靜話：「頭先hailey搵你做咩呀？」

我收返啱啱句說話……

「冇，佢諗住問我聽日出唔出街咋麻……」

阿靜擺出一副和善得過份嘅樣問：「係呀？咁你頭先又話今晚先覆佢“哋”嘅？」

連呢個細微位都俾阿靜捉到，我只好苦笑咁答：「哦，仲有chloe吖麻……」





「哦，chloe呀，你之前講嗰嗰女神吖麻，我記得。」

其實事實上我都冇錯架，但我而家就好似啲行過一樓一順便借個廁所，點知咁啱俾人掃黃拉咗嘅心情咁咋麻……

「哈哈……………係囉…………………咪佢囉……………………」

「但我聽日想上嚟喎，咁你話點算呢？」

哈哈………………你話想上嚟，我一定敢揀同佢哋出街啦………………

「咁梗係陪你啦，佢哋呢啲小意思啦！」

「咁如果我話叫你聽日同佢哋出去呢？」

雖然我都知呢個問題擺明試我，不過我都諗咗陣……如果三人行，我同hailey都冇乜機會可以有好多接觸架啦。嗱，我意思係指，三人行，hailey同chloe一定痴住傾計，由得我多出嚟自己行埋一邊玩手指架啦，點會有機會傾計啫！





如果阿靜上嚟，起碼有條女係可以光明正大咁…………傾計啫！

「傻啦，梗係陪你啦！」

「同佢哋出街都可以陪我架。」

「你意思係……」

「我又嚟。」

頂…唔好咁玩我啦……媽呀……我的天呀……我嘅小寶貝阿靜呀……

「吓……er……um……」





「你好唔想我嚟咩？你哋會做咩係我唔知得架？」阿靜邊講邊擺出個可愛樣…不過與其話可愛，不如話嘟起個咀扮可愛，實質係嚴刑迫供嘅樣……

其實我同佢哋做嘅嘢都好光明正大架！起碼除咗生日嗰次，所有發生啲不可告人嘅嘢嗰陣都係公眾地方先吖……

「梗係冇啦，你都知chloe唔會鍾意我架啦！」

「咁我都係講下笑啫！不過有機會一定要約佢哋出嚟食餐飯喎！仲有，聽日我都要上嚟！」

食餐飯都食到好似坐緊過山車咁，睇嚟我下半世都有排坐……

食完飯，我就送阿靜返屋企。回程嗰陣係到諗，今日都確實肯定咗同阿靜嘅關係，咁終有一日要話俾chloe同hailey知架……

但阿強又話：「你而家講咗，乜都返唔到轉頭架啦喎，可能你同chloe就更加冇機會，hailey連掂都冇得掂架啦~」

啊…………魔鬼呀………………





「我對阿靜好認真架！我決定下半世只係愛佢一個架咋！」

「但你講咗，就連食都只係可以食佢一個咋喎~」

「你估我係你咩！我身心都好專一架！」

「咁你係戲院做乜錫hailey~」

聽完我頓時語窒……

為咗證明我好愛阿靜，返到屋企都係打咗個電話俾佢哋……

「喂，兩位，我有個好消息要宣佈！」





Chloe：「咩呀？你有絕症呀？」

「俾啲新意啦！」

Hailey：「講你就講啦！」

「我拍拖啦！」

《女人想自己嘅男人眼中只有自己，男人想全世界嘅女人眼中只有自己……》