一次無心嘅表白，竟然令到佢同咗我一齊: 第二十四章

其實一路諗極都真係得個諗字，第一次見就上床，都唔合理吖，mk仔都要培養返幾粒鐘嘅感情先啦，何況我呢條死毒撚。所以返到去，我都好守規矩，乜嘢踩界嘢我都冇做過（當然如果同我孤男寡女共處一室嘅係hailey的話，我唔保證會冇事發生）。

「好肚餓呀，不如落街食嘢啦。」

係喎，無啦啦虐待咗阿靜對眼成個下晝都冇嘢俾佢落肚…如果而家有啲新鮮嘅奶白色液體俾佢飲，唔知餵唔餵得飽佢呢？諗咗去邊呀，我講緊鮮奶咋！

「洗咩啫，我煮咪得囉。」

阿靜露出個好驚訝嘅表情望住我：「你識煮嘢食架咩？」





至少都識：煮個麵你食嘅……

「我仲識好多你想像唔到嘅嘢添！」啫係例如神之手咁啦，加藤鷹我師父嚟架！

由於呢到唔係飲食台，我冇理由將我嘅功力用文字演繹返出嚟嘅。大概用咗3分鐘至30分鐘左右啦，都叫煮好咗碗麵，另加隻俾啲雲遮住咗嘅太陽蛋。

阿靜用咗個好無奈嘅樣望住我：「碗麵…食得架…？」當然佢冇將呢句講出口，但佢嘅眼神彷彿好似部投影機咁，將句說話投射入我眼中。

「食咗先啦！真係食得架！唔好睇啲麵好似漲哂咁，其實食落同意粉差唔多架咋，仲有隻蛋呀，你睇唔到隻蛋黃啫，但你會食到有蛋味架啦！」





其實我唔係唔識煮嘢，我只係啱啱遇著剛剛，唔識煎蛋，跟住為咗研究隻蛋就忽略咗兜麵咁解啫！加上我由細到大都唔會煎啲咁冇挑戰性嘅蛋，唔識煎有幾奇啫！

但係阿靜又真係勁喎，我連隻蛋黃都煎到唔見咗，而佢竟然仲吉得出啲蛋汁出嚟。就係呢次之後，我哋每逢出街食飯佢它要揀啲有半生熟蛋嘅餐嚟俾佢吉蛋汁……

當然，最後呢兜電咗負離子嘅出前一丁我哋都冇再掂過，任由佢沖出大海自生自滅。

「你屋企人幾點返嚟架？」阿靜見時候唔早，怕會見到屋企人，所以諗住走先。

「佢哋返咗鄉下，星期日先返，唔洗驚喎。」





「咁今晚去邊食飯？」

「我煮！！！！」

阿靜面色一沉：「啊，其實呢，我呀媽煮咗我飯！」

「嗱，做人唔得咁架！你唔可以因為我兜偽意粉而斷定我煮嘅嘢難食架麻！」

「咁多俾多次機會你，我而家瞓陣先，煮好叫醒我！」

其實我好感激你對我呢隻禽獸咁有信心，但第一次就敢係我到瞓會唔會大膽咗啲呢……

點知原來阿靜一入到我間房就鎖咗門……我係應該為佢都尚存一絲嘅危機意識而開心吖，定係為我一間要唔知點叫醒佢而悲哀好呢……

我為咗一雪前恥，真係好認真咁對待每一樣材料，甚至條蔥都幫佢按摩咗陣。





攪咗成粒鐘，終於煮好飯，正當我想叫阿靜出嚟食飯嘅時候，我個電話響起。聽真啲，原來係我間房傳出，雖然我平時份人行得正企得正，冇嘢唔見得光，但如果咁啱係hailey打嚟我都已經可以準備接受嚴刑審問啦……

點知我真係黑到唔想嗰樣偏偏中嗰樣，阿靜拎我部電話出嚟俾我嘅時候話：「唔知hailey打俾你知事呢？」

我苦笑咗一下之後接過電話……

《旁人眼中再普通不過嘅事，於當事人而言已經係最珍貴嘅回憶……》