一次無心嘅表白，竟然令到佢同咗我一齊: 第二十章

自從雯雯拎咗我電話之後，每日起身佢都會send信息俾我，而我又衰仆街，真係會應佢架喎……

「起身未呀？」

「點？」

「好悶呀！」

屌你有邊日唔悶架……





「咁你想點吖？」

「呢排戲院咪上緊喜愛夜蒲嘅，陪我去睇吖。」

「好窮呀。」

「我請你啦！」

嗱，有人請就唔同講法！大家需要明白，我絕對唔係啲貪小便宜嘅人，只係我本性善良，抵唔住佢嘅苦苦哀求先會應承佢架啫！





「幾時？」

「一間6點，東薈城！」

聽講你好似住荃灣架喎，山長水遠踩入我地頭，算點先！

「吓，做咩入嚟東涌呀……」

「冇呀，想參觀你屋企囉！」





「吓，做咩要參觀我屋企呀……」

「想囉。你屋企冇人架可？」

其實我一直都唔知呀爸呀媽返咗工，得我一個係屋企嗰陣到底算唔算有人……

「睇完戲間戲院未爆炸，我屋企冇火燭，電梯冇壞嘅咪上嚟囉。」

就係咁，我係唔知做乜嘅情況低下，俾人迫咗去做陪客睇戲……由於東涌範圍係我主場，我梗係唔到最後一秒都唔出門口啦，結果……係佢早到，我冇遲到，入到去都係miss咗個opening啫！

我諗無論有冇睇過套戲嘅人，聽個名大概都估到係套咩戲啦！而今日雯雯一身戰鬥格嘅打扮，超緊連身裙再加對1吋到嘅矮踭鞋。其實呢套衫如果著落個皮膚又白又滑嘅靚女身上絕對係令男性秒速充血嘅武器，但著上個同賓妹大概只係語言上嘅分別嘅人身上，我忽然可以好專心咁睇戲！

喜愛夜蒲作為一套偽術片，當然唔少得大量嘅床戲，但一諗到隔離坐住個賓妹，我幾乎諗住睇完去附近搵醫生check下我係咪陽痿……

睇完戲，同佢行返我屋企嘅時候，我一眼都冇望過雯雯，直到佢問咗條好恐怖嘅問題……





「頭先佢哋係張床做嗰啲嘢呢，點解好似好舒服咁嘅？」

呢句如果換轉係chloe問，我會話：「我同你試下咪知囉！」

但呢個係賓妹……

「咁你得閒就要同佢哋做返個訪問啦！」

「其實我成日都好想試下……但又怕啲男友係為咗呢啲嘢而同我一齊……」

咁其實應該所有男人都係嘅……

講講下，已經到咗屋企門口。





「不如……我哋試下咯！」雯雯係我耳邊用輕微嘅氣息同我講……

如果呢番說話出自chloe把口我相信我會連門口都未入已經將佢就地正法，但而家係個賓妹同我講……

係呢個時候，阿強就話啦：「豬排都係肉，好過去自瀆呀，熄哂燈乜都睇唔到架啦，食得唔好哂呀！」

我由下而上打量咗雯雯一次，直到望到個樣……

「唔係咁好嘅……」眾所周知我係個正人君子嚟架啦，我點會做呢啲嘢呢係咪先！

「仆街啦你，送到埋嚟你都唔食，幾多人恨都恨唔到呀，妖！」雯雯講完之後嬲爆爆咁走咗……

唔係送到埋嚟就要食架下話，唔係話唔想食，都要食得落先得架！雖則我唔係靚仔啫，雖則我某程度上直頭可以叫樣衰啫，都冇理由咁饑不擇食架……不過講開又講，我都想見識下嗰啲好想食佢嘅生物，真係想研究下一個人類要係對性方面有幾大嘅需求先會恨同雯雯……

但……雯雯有樣嘢真係講得啱……今次我真係唔荒唔仆街啦，大家都唔係唔知香港啲樓嘅走廊幾應聲架啦……頭先段對話正正係走廊到發生……睇怕我真係有排都唔洗出門口見人……





返到屋企，我打俾hailey同chloe，同佢哋講咗呢個咁悲哀嘅故事之後，聽完之後佢哋恥笑足我成晚，連往後嘅日子都會得閒講出嚟抽一抽水……

當佢哋問起套戲講咩嘅時候，其實我都唔知點答……喜愛夜蒲有劇情架咩？我嘅記憶當中只係出現一場又一場嘅肉博畫面，仲有連公廁都係戲入面扮演好公廁嘅角色……

傾到差唔多12點嘅時候，chloe因為第二朝有堂，所以收線先，剩低我同hailey。

「不如陪我睇多次吖！」hailey問。

雖然呢套咁嘅偽術電影冇辦法令我泛起入戲院睇幾次嘅衝動，但hailey叫到啦喎……

「你想幾時吖？」

「聽日6點，東薈城吖。」





屌，咁熟口熟面嘅……乜而家東薈城間ua舒服啲架咩，個個都入嚟睇戲嘅……

「好，你咁偉大肯入嚟最好啦。」

但係約完之後，我就開始後悔……我同雯雯咩都冇發生係因為未識欣賞賓妹吖……但hailey，話哂都有過咁近距離嘅身體接觸……

冇事嘅，唔會嘅，你控制到嘅阿恆！我係心中默想。

《好色係人類嘅天性，但至少要建基於寧缺毋濫之上……》