一次無心嘅表白，竟然令到佢同咗我一齊: 第十九章

望住阿靜一步一步咁遠離我視線，我只可以帶住失望咁離開……唔知點解，呢個時候成個世界都好似放慢哂步伐咁，連兩分鐘一班嘅地鐵我都好似等咗好耐……一邊等，一邊嘆息……

上到車之後，我打咗俾hailey。

「可唔可以出嚟陪下我呀？」

「吓？我啱啱先返到屋企咋喎。」

「咁算啦……」





「你做咩事呀？我而家出嚟啦，叫唔叫埋chloe呀？」

「冇…好悶，想叫你出嚟食飯啫，唔叫chloe啦，廢時阻住佢大小姐啦！」

「好吖，咁半個鐘後荃灣等吖。」

其實我都唔知咁做算點，明明最憎當人水泡，但唔開心又搵人攝時間……

到咗荃灣，其實我都冇乜心情食飯，所以捉咗hailey陪我去碼頭，一邊飲酒一邊吹風。





「你做咩呀？」

「冇嘢呀，冇胃口咋麻……」

「你呃我唔到嘅，講啦。」

我唔知我係痴咗線定係係酒精嘅影響低下，我將hailey拉埋我身邊強行咁錫咗落去，而hailey竟然冇反抗到，而且塊面仲俾啲酒精攪到好紅……

熱吻咗幾分鐘後我哋先分開，由嗰刻開始，直到我送佢返屋企，我哋都冇再講過半句說話。





我搭車返屋企嘅時候個腦海不停咁問自己，究竟做緊乜呀……而最恐怖嘅係，hailey竟然冇反抗到，所以事實證明，酒精並不導人向善，少飲為妙呀……濛瀧間，阿強又走出嚟同我講：

「嗱，有食唔食，下世乞食呀，hailey又唔係差，而且你咁嚟強姦…啊，強吻佢，佢都唔反抗報警起飛腳，擺明對你有嘢啦，冇咗個阿靜啫，仲有個hailey喎，仲要係熟哂添架啦，食得架啦！」

咁下世乞食下世嘅事吖，關今世嘅我咩事……至於食唔食咗hailey……從來都冇咁嘅打算……

曾經聽過一個故事：有一男一女原本係對無話不說嘅好朋友，有一次因為個男仔忍唔住同咗個女仔上床。呢次之後，雖然表面上嘅關係仍然冇變，但已經唔再好似以前咁，成日傾心事……而且每次見面，只係得指定動作……我唔想我同hailey嘅友情都變成咁，應該係話，好怕同佢會變成咁……

不過我不由得要讚一讚自己，每次飲醉酒，無論身處係邊，飲到幾醉都好，我總係可以撐成個鐘以上咁返屋企，咁都冇俾車撞死我都真係好勁……

呢晚返到屋企，啲酒精都揮發得7788，於是諗住打多陣機先。係開完電腦之後，msn就彈出咗個離線信息出嚟……

「bb，好多謝你份禮物呀，我好鍾意，真係好有心思呀，其實可能你覺得我今日好cool，不過唔係架，我只係怕羞咋，唔好嬲喎，我愛你呀，嘻嘻~」

呢一刻，我以為我終於行完衰運。阿靜嘅外表對我嚟講，無論用邊個被稱為女神嘅女明星嚟比喻都會變得庸俗。一個正常嘅女仔見到我呢條死毒撚之後，非但冇避之則吉，竟然仲繼續當我係男朋友，佢簡直就好似上帝派落嚟可憐我嘅天使。





「最緊要你鍾意啫！我又唔知你鍾意啲咩，唯有送心意架咋…」

「傻啦，我都好鍾意啲有心思嘅嘢，尤其係bb你送嘅添！不過好似少咗啲嘢喎……」

「少咗啲咩呀……？」你唔好同我講生日卡呢啲咁離譜嘅嘢呀……

「我愛你喎，愛幾耐啫！！」

Fine…我又輸…

「我愛你~一生一世~」

「好啦，我收貨啦，不過下次要加返上個心到架！」





下次？！咦，下次係聖誕喎，咁係咪即係話下次摺返同一個心，再係上面加返一生一世就可以當新嘅禮物送俾阿靜呢！嗱，我真係冇取巧架！

呢日嘅心情就好似坐完過山車咁，先係好似俾阿靜拒絕，再唔小心強吻咗hailey，之後再知道阿靜嘅心意係如此出乎意料之外……

今晚連瞓覺都瞓得特別甜，至於咩原因呢，就不得而知啦……

第二日，chloe同hailey如常咁同我傾電話，不過就完全冇講起噚晚嘅事。到chloe收咗線之後，我同hailey講：「um…噚晚呢……」

「噚晚飲到好醉呀，乜都唔記得哂，我有冇做啲咩失禮嘢呀？啫係例如大叫呀，當街跳舞呀，或者講咗啲唔應該講嘅嘢咁呀？」

屌，睇少啲tvb啦，真係咁易斷片咩（我斷過一次）！分明有心扮失憶啦……唉，都話冇人接受到毒撚架啦，仲要俾條毒撚強吻喎，咁不堪回首嘅事俾我都扮失憶啦，都係阿靜最好！

「冇呀，有兩條mk走嚟問你拎電話，你俾咗佢哋咋麻，乜你仲未收到電話騷擾咩？嗰兩條死mk真係扮事不力啦咁。」咁你都扮得失憶，咁我就更加唔應該負責啦（好似係）！

嗰晚嘅事，我哋就好似將佢列為最高機密咁，絕口不提……





《只要你用心去愛我，我願意用性命作回報……》