【真人真事改編】《去年暑假，我在街上賣寬頻。》: 《去年暑假，我在街上賣寬頻。》（四十四）

　　「偉仔，聽浩哥講你好似做多幾日就唔做啦喎？係咪真㗎？」嘉寶驚訝問道。「嘉寶，人哋假假哋都係大學生，仲未畢業㗎，梗係開學前休息下啦！」振波說道，然後志龍插了嘴：「唓，休乜鬼嘢息啊？條友仔同我講會玩咩『Ｏ　Ｃａｍｐ』，所以先要八月初Ｑｕｉｔ姐嘛……」隊友們於檢討會後一起閒聊。
 
　　「哈哈，不過我都同意偉仔要參加下大學迎新營嘅，唔快啲溝返條女，三年大學生活咪枉過？」浩哥開了個玩笑，續問：「係喎，你都就嚟走，通常呢，走之前我都會畀啲手下揀位企嘅，當然最多人流嘅位就畀Ｔｏｐ　Ｓａｌｅｓ霸哂㗎啦，但係你有冇話想擺邊一區啊？」我便回答：「最好近我屋企囉，最後一個星期都唔想走咁遠啦，如果係馬鐵沿線就Ｐｅｒｆｅｃｔ嘞！」
 
　　於是，我於翌日來到了沙田圍馬鐵站。我就在Ａ出口外的天橋底開壇，此橋可通往沙角邨，設置完畢便橫越天橋到大排檔吃午飯。如果你是「沙田友」，你一定會知道沙角邨大排檔是「火鍋聖地」，只需七、八十元，便能任飲任食兩三小時，算是價廉物美了，中學時代同學聚會，不是打邊爐，就是打邊爐，所以這地盛載著幕幕回憶。
 
　　當然，大排檔的午市炒粉麵飯與熱奶茶也是不俗的，一個人的浪漫，吃了碟揚州炒飯。但吃到一半，忽覺風雲色變，樹葉紛紛被強風吹落，瞥了對面馬路一眼，易拉架搖搖欲墜，心知不妙，立馬付款結賑，跑過天橋去加固攤位。
 
　　之後，竟然刮起大雨來，幸好我反應快，不然壇上的文件便全濕了，也幸好今天在沙田圍工作，即使天氣欠佳，回家也容易，心血來潮時不妨把心一橫，射個「靚波」，提早歸家吃晚飯。一兩張單對於我來說已經無意義，反正一星期後我將光榮引退，唔試下「射波」點叫做過寬頻Ｓａｌｅｓ啊？哈哈！
 




　　落雨時日就便指望會有人問價了，我坐在天橋樓梯避避雨，玩玩手機，很快便到了下午五點，很是鬱悶，便想試試兩個月以來第一次偷走，突然一個畫面讓我怔住了，我不禁拍下一張照片──
 
　　馬路中間，一個老伯穿著黑色雨衣，推著一車紙皮緩緩移動，因大雨關係，原來約莫二三十公斤重的紙皮，重量應該增加不少，所以他推得甚是吃力。
 
　　二十秒後，危險的事情出現了，後面的雙層巴士載客後往前駛去，但路線被老伯與車子阻擋著，巴士司機不禁鳴號，並揮手示意老伯改道。而老伯處於兩難境地，因距離前面路口還有三十米，中途只能直走，速度太慢也不是辦法，所以他想走回行人路。搞了三十秒，老伯終於將車子調了頭。可是，紙皮實在是太重了，不夠力度把車子槓上去。
 
　　又過了十數秒，巴士不斷「呠呠呠呠呠」，見到如此情景，我不出去助老伯一把也不是漢子，立馬開了傘子跑到路邊，然後用脖子夾著傘子，再使出九牛二虎之力，用雙手抽起車頭雙角，向後一拉，兩輪終於滑上了行人路，老伯也就一推，將車子送上來……
 
　　雖然我只抽起車子三四秒，但已用盡全身力量，十指也變得通紅，可想而知紙皮有多重。巴士離去後，老伯向我道謝，我問：「阿伯，做咩推架車出馬路啊？落大雨啲紙皮濕哂唔係更加重更難推咩？」怎料他說：「巴士站好多人落車趕住返屋企，我地呢啲執紙皮嘅老嘢，成大架車會阻住人嘛……」這句誠懇之語語震撼我心，不知道如何回應，只好叫他小心過馬路，而我亦不想偷走了。
 




　　天氣欠佳時候，我們都匆忙地想著如何盡快回到家裡，或許會在途中因全身濕透而煩躁，但在戶外工作了一段時間，發覺不用日曬雨淋也是一種奢侈了。夜晚十點，雨勢減弱，臨走前看見一個清道夫孤軍清理坑渠垃圾，內心難免有戚戚然之感……
 
【　誰也在這一生某段落做過少數
　　誰都知呼天不應那種冷漠殘酷 
　　誰一個漂亮轉身之後做了多數
　　又會能待那孤軍更好
 
　　〈孤軍〉　Ｃ　Ａｌｌ　Ｓｔａｒ　】
 
Facebook專頁: 大雞小事 ( https://www.facebook.com/bigchickenlittlethings )