【真人真事改編】《去年暑假，我在街上賣寬頻。》: 《去年暑假，我在街上賣寬頻。》（四十二）

　　有時會想，到底這兩個月企街期間，吃飯都吃了些什麼東東？除了「Ｍ記」和「大快樂」的快餐，最多一定是「牛腩河」了！
 
　　本人有一個習慣，就是每次到新食店吃飯時都會讓「相機食先」，將食物拍照留念，方便日後撰寫食評，無聊打開手機相簿，驟眼一看，幾乎全都是牛腩、牛雜，配上粉麵或飯。粗略估計，兩個月內都吃了至少二十次，平均一個月吃十次，一星期都至少有兩三次，我覺得我可以當牛腩粉麵專家了！
 
　　為什麼我上班時經常吃牛腩類食物？其實有「主觀因素」和「客觀因素」，前者是因為「好食」同「我鍾意食」，後者則是「落單後好快上菜，節省食飯時間」、「食牛腩河可以食得好快，節省食飯時間」、「梗有一間粉麵店喺工作地點附近，節省食飯時間」、「牛腩粉麵飽肚，唔駛企企下街就咁快肚餓」……

　　總括以上各項因素，除了自己喜歡吃以外，不外乎一個字──「快」，而且能夠補充體力，應付一日工作所需。組長浩哥經常跟我說：「客人好可能喺你食飯嗰陣出現。」所以，做街霸食飯一定要快，切勿浪費任何時間，有些師兄甚至連吃飯也坐在壇旁，是勤奮的表現呢！


　　以下兩段文字改編自《火腩飯潮文》：





　　「每舊牛腩都經過紅紅烈火，百度高溫，係經過歷煉，係經過漫長既試鍊！每一嚿都有佢嘅歷史，佢嘅故事……我恨我嘅人生唔可以好似牛腩咁，搵到咁多好嘅伴侶：河粉、米粉、粗麵、幼麵，各有特色，亦搵唔到咁多知音客人開單。
 
　　有時侯，我自己一個坐喺麵店食牛腩河，我覺得自己係孤獨，我覺得呢個地區係冇客搵我開單，我叫咗支可樂，我望住樽入面黑色嘅汽水，我望唔透，我望唔清究竟呢個地區仲有幾多單我係可以開到，我好迷茫……」
 
　　全文末句是──「我覺得我係一個浪子。」其實，每一個寬頻街霸，就是「浪子」的最佳代名詞。


【　現實裡裝英勇難避免
　　成為了

　　不懂哭也不想笑的一個漢子
 
　　〈小伙子〉　Ｓｕｐｐｅｒ　Ｍｏｍｅｎｔ　】
 
Facebook專頁: 大雞小事 ( https://www.facebook.com/bigchickenlittlethings )