【真人真事改編】《去年暑假，我在街上賣寬頻。》: 《去年暑假，我在街上賣寬頻。》（三十七）

　　這幾天對九龍灣周遭環境認識多了，對不同客人的口味了解深了。我如常早十分鐘到達九龍灣站Ａ出口天橋，沒想到遠遠便看見一個「西裝友」在開壇，是的，正是一個身穿長袖恤衫、黑色西褲與黑色皮鞋的男子。我好奇上前跟他搭訕：「阿師兄，乜而家『友善』Ｓｅｌｌ寬頻要著埋西裝咁Ｐｒｏ咩？」
 
　　「Ｈｅｌｌｏ！你今日嚟一齊擺啊哥哥仔？我哋梗係唔係轉西裝制服啦，係我自己一陣要見客姐！」這名接近三十歲的短髮眼鏡男答。「吓？見咩客啊？你一陣去開張寬頻或者電視單姐，都要著到咁隆重？」我大惑不解。「哦，唔係啊，我本身係一個保險經紀嚟嘅，一陣約咗個客喺德福間『Ｓｔａｒｐｕｃｋｓ』咖啡店簽保單，冇理由著住件『友善』制服啩？」他微笑解釋。
 
　　他叫Ｂａｒｒｙ，有著雙重身份，除了是電訊Ｓａｌｅｓ，也是某大保險公司的經紀，工作性質都是一樣──「Ｓｅｌｌ」。我一開始還以為他是『友善』的什麼銷售經理，走出辦公室來監督員工表現，所以一身西裝Ｌｏｏｋ，但想不到他入行比我還遲，只做了兩個禮拜。
 
　　「聽講做保險都幾好搵嘅喎，做咩又嚟打多份工啊？仲要大熱天時企喺條橋上面焗到流哂汗……」我想了解他的心態。「咁做保險冇底薪嘛，呢牌冇咩生意咪經朋友介紹入嚟咬下老底先囉！況且，做保險好多時都係用電話同人聯絡，唔洗返寫字樓，咁我Ｓｅｌｌ寬頻冇客嗰陣，咪可以Ｃａｌｌ下啲保險客囉，一雞兩味，唔洗浪費時間！」他說罷便拿著公事包上商場辦公事了。
 
　　半小時後，Ｂａｒｒｙ成功拿著一份保單回來，笑容滿足。我戲問他：「陰陰嘴笑咁款，今次食大茶飯啦？」「ＯＫ啦，簽咗張『危疾』單囉，但我要跑數啊，唔係儲唔到啲佣金畀首期買樓結婚，女朋友個阿媽一定對我西口西面啦唉！」他語氣帶點無奈與嗟怨，不過這也正常，每個熱戀中的香港真漢子都要面對這個難題。
 




　　之後，他沒有換回短袖制服，一邊坐在摺櫈Ｃｏｌｄ　Ｃａｌｌ潛力客人，一邊Ｓｅｌｌ收費電視和上網服務，每當客人問津，也順便派了保險經紀卡片予他們宣傳，真是個把握機會的人啊！他閒來也跟我分享一些有關保險行業的基本知識，好像保險種類、保單範疇、公司特色等等，也有透露一些佣金計算方法，原來不一定是按月出薪，而是好像有按季、按年幾種玩法，每張保單的佣金比例也不盡相同，比賣寬頻的計法複雜多了，聽得我一頭霧水！
 
　　我身為一個文科書生，又未畢業出來打工，雖然母親好像有給我和妹妹買保險，但我對這方面真是零知識，跟Ｂａｒｒｙ相處了大半天，對財政和人生規劃都有了初步概念，他也算袋錢落我袋了。
 
　　入夜之後，人煙疏落，我們竟然玩起叫口號來，Ｂａｒｒｙ大嚷：「裝『友善』，送保險！」我則呼喊：「『香江寬頻』唔洗錢！」可笑的是，竟然有個師奶走過來問我們是否講真，哈哈哈哈哈！無論怎樣，著西裝Ｓｅｌｌ寬頻真是個有趣奇觀，可算是我企街時目睹最特別的畫面了！

【　如常人埋頭在幹
　　明白我有你挑選西裝
　　如途人默然路過
　　明白我有你抹汗

 
　　〈不可含怒到日落〉　孫耀威　】
 
Facebook專頁: 大雞小事 ( https://www.facebook.com/bigchickenlittlethings )