【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十七）

　　６月１８日，星期一，一個狂風暴雨之日，這還是首次開工遇上壞天氣。如常來到「吉橋」，然而橋上食風，行人寸步難移，唯有在商場內靜觀其變，到了兩時半，風雨稍停，方敢開壇。叮叮糖鄭伯今天沒來，這也難怪，一個老人冒雨推車出外是相當吃力的，再說橫風橫雨，行人怎會有心情停下來買糖？
 
　　我勇敢地升起兩支易拉架，各用膠紙把旗竿連同鐵欄緊緊綁上十圈，以為安全，但十分鐘後，強風從側面襲來，把旗身吹得回彈架內，真的使我「收旗」，橋面潮濕，差點滑倒，搞了半個鐘才能安頓下來。誰知顧得了旗，又顧不了壇，壇是用發泡膠製成的，輕得不能立穩，一不留神便被吹得東歪西倒。
 
　　為了看緊攤檔，不能躲進商場，身子被雨撇得濕透，突然怪風暗捲，把壇吹散，我又再次失守。「師兄，你啲膠紙唔夠勁喎，用我呢卷啦，膠紙闊度夠長先貼得夠穩陣！」一位身穿紅色Ｐｏｌｏ恤的男子說道，細看服裝，胸上印著「數據通」的標誌，原來他是流動電話服務供應商「數據通」的戶外Ｓａｌｅｓ。
 
　　「唔該哂大哥，冇咗你啲強力膠紙真係唔得掂！」「哈！睇落你都幾後生，應該做咗冇耐冇咩經驗，落雨天梗係用闊啲嘅膠紙固定攤位啦，仲要買啲靚料啲嘅添啊，唔係一滲水就冇哂黏力。」這位有心的師兄不但借我膠紙，還教我從什麼角度綁貼才最穩固，對開壇十分講究。
 
　　「係呢，我叫偉仔，做咗冇半個月，唔知師兄點稱呼？」「我就叫聶仁邦，啲人通常叫我阿邦。」「嘩！『獵人』咁勁？你好鐘意玩ＰＳＰ隻『Ｍｏｎｓｔｅｒ　Ｈｕｎｔｅｒ』㗎？」「搞Ｇａｇ咩？我唔打機㗎，不過都唔止你一個叫我『獵人』嘅……」邦哥廿六歲，入行七年，染上一頭中長金髮，樣子尚算俊朗，身材不高，有點貌似日本男子組合「嵐」的二宮和也。
 




　　「嘩！意大利贏唔贏到啊？日防夜防，久守必失啦！」「我今場睇好佢隊波喎！啱啱先用馬會手機Ａｐｐ買咗兩百蚊『讓球主客和』意大利勝！」近來歐洲國家盃踢得火紅火熱，便與他談談波經。之後，他又告訴我一些行情，原來他數次轉換公司，不論是「香江寬頻」、「線上遊」或「８寬頻」也效力過，現在就看準流動電話市場，所以就加入了「數據通」。
 
　　「邦哥，其實你覺得Ｓｅｌｌ寬頻同Ｓｅｌｌ電話服務邊個好數啲？」「冇話邊個好數嘅，睇嗰期興咩囉！呢兩年開始，人人都用轉用智能手機，出街都用３Ｇ上網，流動數據服務越嚟越大需求㗎啦，所以咪做『數記』囉！你諗下上網一間屋幾個人用只係畀一個月費，但係一個人用一部電話㗎嘛，各自畀一個月費喎，有啲人仲唔止一部電話……」邦哥之言不無道理，就連我媽也會用Ｓｍａｒｔｐｈｏｎｅ，會發Ｗｈａｔｓａｐｐ短訊，就知智能手機與數據服務需求是多麼大了。
 
　　後來，說到他以前在「香江寬頻」的工作經歷，原來他三、四年前也是跟經理「堅爺」搵食，還大爆其趣聞軼事。原來堅爺經常拉大隊帶部下北上消遣，最愛到深圳一間名叫「魅力八方」的Ｄｉｓｃｏ玩樂，最爆笑的莫過於他經常在舞池上生硬地Ｆｉｎｇ吓Ｆｉｎｇ吓，好像在跳「開心舞」，我只幻想都覺得好笑。
 
　　「喂！偉仔，我走先啦，想返屋企訓覺！」「吓，咁早走？而家先六點半多啲咋喎！」「頭先你都見我開咗兩張單，夠數交差啦，早啲返屋企訓幾個鐘，今晚睇波仲好！你加油啦！」然後，我便目送他收拾行裝離去，天氣不佳底下，開工三個小時，兩人詢問，兩次開單，都是一撃即中，看來他是個有料之人。
 
　　過了幾分鐘，浩哥打來問我情況：「偉仔，今日落雨咩環境？」「冇啊，條橋好大風，啲人都唔得閒理我啦！」「我都預咗！不過我地呢行係要日曬雨淋㗎啦，捱得住風浪，咪開到單囉！」「嗯，我都明，不過我隔籬『數記』個師兄竟然開咗兩張單，真係犀利，仲話開夠單早走添！」
 




　　浩哥驚愕一問：「未夠七點就走？唔通係『獵人邦』？」「你點知㗎？佢好出名㗎？」「佢當年係堅爺手下Ｔｏｐ　Ｓａｌｅｓ嚟㗎，嗰陣公司冇人唔識佢，佢人如其名好似『獵人』咁，每日搵夠獵物開夠單，就會早走返屋企，不過後來畀人報串成日遲到早走，收哂上頭警告，嫌煩先轉公司姐嘛……」
 
　　真想不到能夠跟一個風格獨特瀟灑的Ｔｏｐ　Ｓａｌｅｓ一齊開檔，我放工後立即奔到廣福道馬會，跟邦哥小注買了＄５０意大利玩玩，最後真的中了……

 【　一生之中誰沒痛苦　　　
　　得失少不免
　　看透世態每種風雨　　　
　　披身打我面

 　〈幾許風雨〉　羅文　】




 
Facebook專頁: 大雞小事 ( https://www.facebook.com/bigchickenlittlethings )