救爸行動1986(穿越)(愛情)(親情): 8
~就喺我不斷掙扎，又唔可以大叫嘅時候...有把聲突然叫我...。
輝叔即時鬆返開佢對臭手，同我一樣向後望。
「…阿宜牙...做緊咩呀???」原來係姑姐啱啱睇完電視走左出離搵我，
好彩姐...如果唔係比輝叔熔左都似。
「如姐...冇呀...煲水沖涼囉!!!」我即時企左起身答姑姐，
而輝叔亦都好冇引咁行開左。
「...咦...二哥佢...做咩呀??」姑姐一邊望住走緊嘅輝叔一邊好疑惑咁問我。
「....唉....。」而我就好似鬆左一口氣咁...坐返低嘆一嘆氣。
「...做咩呀...阿宜???唔係發生左啲咩事吖嘛???」
姑姐份人疑心真係好重，見到我嘆氣...於是不斷追問。
「…輝...er...你二哥佢...。」死啦...點講好呢...好尷尬添，
又唔知佢兩個感情好唔好，萬一我講完姑姐唔信我咁...點算喎?
「...係咪...二哥佢對你...唔規矩呀??」點知我未開聲講，姑姐已經衝口而出啦。
「...er...你點知架?」我問。
「...其實二哥佢...之前都試過對阿晶摸手摸腳架啦...
仲比我咁啱睇到添...，好彩阿晶最後冇追究姐...。」
姑姐唔係應該覺得好彩阿晶冇事先啱架咩，睇離佢同輝叔感情唔差喎....。
「...er...你同你二哥感情好好架?」我好疑惑咁問。
「...對唔住呀...阿宜，我知你依家緊係好憎我二哥架啦，但是其實佢本質唔壞架，
而且仲好錫我添...我幫佢向你道歉吖...!!!」姑姐捉住我雙手，好誠懇咁講，
睇離佢地感情真係好好，死啦...如果下次輝叔再搞我嘅話，姑姐唔會睇到都當睇唔到掛....。
「…但係...如果佢...再係咁呢?」我口窒窒咁問。
「...我發誓...我一定唔會再比依啲事發生...!!!」
姑姐用好堅定嘅眼神向我發誓，唉...為有信住先啦...。
同姑姐傾完一輪之後，熱水已經煲滾，於是我就揪住煲熱水走左入廁所沖涼，
成個廁只得一舊番皂...沖涼又係佢...洗頭又係佢，連洗面都係佢添，
都無辦法啦...有好過冇...為有照用啦，唉...啲皮膚無啦。
因為熱水有限，所以我都好快沖完換完衫走返出離，經過大廳...
阿爸輝叔同阿爺三個依然係坐左喺度睇緊電視，阿爸望一望我，
而輝叔更加係用啲深深不忿嘅目光睥行我，好似想話比我知終有一日要食左我隻豬咁...。
我急急腳咁好快行到返房，姑姐好無聊咁攤左喺張床度睇緊老夫子，
見到我行入離之後就放低左本書，擰左過離望住我啦。
「…嘻嘻...又到我地嘅少女心事時間啦。」姑姐好興奮咁坐返起身，
睇離又係想捉我陪佢傾計啦。
「…嗯...咩野少女心事呀?」我一邊整理緊自己個背囊一邊問。
「...阿宜你今日都見過我啲朋友架啦，嘻嘻...你覺得佢地...點呀?」
姑姐忽然問我個咁嘅問題嘅。
「…er...幾好吖...佢地都幾熱情。」我繼續敷衍hea答。
「...嘻嘻...咁阿文呢??」姑姐少女含春咁繼續追問，姑姐唔會係鍾意阿文掛。
「...吓...er...唔錯吖...，有禮貌...有風度。」我口窒窒咁答。
「...嘻嘻...你都覺得呢...，阿文真係幾好...嘻嘻...。」
死啦...姑姐發哂姣咁...咁家良姑丈點算呀???
「...er...如姐你鍾意阿文?」我好直接咁問姑姐...。
「...嘻嘻...我...我都唔知呀...，㖿...唔好問人啲咁嘅野啦。」喂...姑姐...明明係你問我先架咋喎...。
「...就算係...都唔知人地鍾唔鍾意我啦...。」我都冇問...姑姐又忍唔住自爆左出離啦。
「…係呢...阿宜牙，你覺得我...應該做啲咩去吸引阿文嘅注意好呀??」姑姐繼續興奮咁問。
「...吓...我唔知喎，我都唔識佢。」我答。
「…咦...~你地果個年代嘅女仔一定多啲辦法嘅，...教吓我啦!!!」
姑姐捉住我隻手搖離搖去咁...救命呀。
「…er...我自己都未拍過拖，我都真係唔識教你喎...。」我答。
「…er...就算你冇拍拖，你身邊都應該有朋友拍拖嘅...佢地有啲咩秘訣呢?.?」姑姐繼續追問。
「...吓...er...都係主動約多啲個男仔出街囉，對多啲自然會日久生情啦!!!」
是但求其答吓姑姐啦...希望依個答案佢會滿意啦。
「...係...係喎，阿宜你仲話冇計，一諗就諗到啦...嘻嘻...。」姑姐好開心咁回應。
「...哈哈...係囉係囉...你約吓佢去街囉...主動啲...如果唔係人地唔知架!!!」我繼續和應姑姐。
傾多一陣之後呢，姑姐終於都唔再煩我啦...
好開心咁訓著左，而我就繼續整理一下我個背囊...。
睇吓先...背囊入面有部電話...有部ipad...風扇仔...尿袋同差電線，仲有一堆雜物，
其中有一個可以去旅行用嘅三腳轉兩腳萬能轉插，86年嘅電制應該喺用緊二腳，
所以應該用得著，不過其實我個行山尿袋有太陽能差電功能，所以有冇個轉插都冇咩所謂...
嘻嘻...真係要多謝我嘅冇手尾唔執袋習慣...所以依家返到離1986年都可以繼續有電話用咋。
~...di...。~
我開左我部電話，因為穿越果日部電話已經用到冇哂電熄左機，
所以依家我插住個尿袋一邊差一邊用。
睇吓先...初步睇離手機運作良好，一切正常...只係收唔到姐...。
不過收唔到都好合理姐，收到就真係驚啦。
嘻嘻...好耐冇玩過手機啦，好掛住部電話添。
我挨住張床...係度摷返啲舊相出離睇，睇返細個同阿爸一齊嘅相，
以前睇嘅時候會不禁落淚，但係依家睇返又覺得個感覺唔同左喎，
可能阿爸依家就係我身邊嘅關係啦...，但係睇到同阿媽影嘅相嘅時候，
反而忍唔住喊起上離，...嗚嗚...對...對唔住呀...媽咪，我知你而家一定係好擔心我架啦...。
睇左一陣之後，因為都好夜嘅關係，
所以我收返埋啲野入背囊之後就訓著左啦。
之後幾日呢，因為阿爺唔洗出香港仔交漁嘅關係，所以我地都冇得出去，
留左喺漁排度百無聊賴咁...，以前啲人嘅生活又邊有咁多采多姿吖...。
今日呢，雖然阿爺唔洗出去，但係阿爸就鬼鬼鼠鼠咁一早自己揸左隻(登件仔)出去喎。
之後就成個下午都冇見過佢啦。
我依舊係無無聊聊咁喺度玩電話同幫幫阿嫲手餵吓雞咁...，
到黃昏五點幾左右，阿爸終於都揸住佢果隻(登件仔)返離啦。
我即時走左出去準備迎接，但係當我行到去排邊嘅時候...先發覺...咦...點解....多左個人嘅....?
係一個女仔...望落都係十八...九歲左右，偏瘦...但係身材幾好，之後我再行近啲...
望真啲...佢個樣...咦...我諗我應該冇認錯啦....佢...應該...就係阿媽。
「…咦...阿宜...咁得閒嘅?」阿爸拖住阿媽落船，
而阿媽就冇出到聲，而係用好疑惑嘅眼神望住我...。
「…係...係呀..。」我心神彷彿...口窒窒咁回應...
因為我而家一樣係望住阿媽...望到實一實...有種好奇怪嘅感覺...。
「...你地兩個做咩呀，定哂形咁嘅?.?」阿爸見到我地呆左，於是叫一叫我地。
我同阿媽定一定神之後，阿爸就為我地互相介紹啦。
「...er...依個就係我成日提起果個阿宜啦，阿宜牙...佢就係我女朋友金喜...。」阿爸微笑住咁講。
「…你...你好!!!」阿媽首先開聲，怕怕醜醜咁同我打招呼...。
「…你好...。」我亦都點一點頭禮貌回應。
之後我地就一齊行左入大廳坐啦。
「咦...金喜...離左牙...?」阿嫲一見到阿媽就好開心咁講。
「...係呀...伯友...好耐冇見啦，等我幫你手煮飯啦!!!」阿媽好有禮貌咁答阿嫲...，
之後佢地兩個就好有默契咁一齊行左去廚房果邊啦，睇離阿嫲真係好鍾意阿媽喎。
而我同姑姐就繼續無無聊聊咁喺度行行企企...，
至於阿爸呢...就走左去幫阿爺手做野....。
「...覺得點呀?」姑姐忽然問我。