救爸行動1986(穿越)(愛情)(親情): 6
~依度呢...好多人好熱鬧，周圍都喺射燈...
五顏六色咁...仲播住啲快歌，就好似落左d咁....。
我同姑姐跟住家良同阿晶佢地行到去counter度借鞋，幾錢我就唔知啦...姑姐搞掂，
度完腳之後我地就一人拎住對roller鞋行埋一邊坐低換鞋啦。
換完鞋...我同姑姐就步入roller場啦。
因為阿文自己有鞋所以一早已經唔知溜左去邊，
而心急到爆嘅家良一早已經換好鞋拉住阿強衝左出去，
所以而家又係得返我地三個女仔。
「…救...救命呀!!!好難呀!!」一入到場，姑姐已經叫哂救命咁拉到側邊個扶手實一實
，而阿晶亦都係一樣拉實扶手，睇離佢地兩個真係完全唔識。
而我已經冇理到佢地，自己溜左出去試吓難唔難玩先。
er...雖然我就未踩過roller，但係呢...有排都成日會同阿燕佢地去太古踩冰嘅，
雖然兩樣野有啲唔同，但係踩落又好似分別不大咁，兜左幾個圈之後我都開始掌握到技巧啦。
「…咦...阿宜你踩得唔錯喎，練左好耐牙?」兜兜吓...阿文無啦啦跟左埋離同我傾計....。
「...吓....我...第一次玩咋。」我口窒窒答。
「…吓...第一次???無理由玩得咁好架喎，我頭先見你又後溜又交差腳咁...無可能架喎。」
阿文好疑惑咁望住我講。
「...er...其實係因為...我之前有玩過溜冰，咁所以...易上手啲姐...哈哈!!!」我笑得好尷尬咁回應...。
「…溜冰...???唔平架喎!!!，你之前成日玩???」死啦...阿文眼都定埋...
唔知諗緊咩咁...答又死唔答又死...唉...都唔知點好...。
~Cha Cha Cha
Cha Cha Cha
Cha Cha Cha~
歌聲突然響起，周圍嘅燈光亦都變得昏暗...，唔知發生咩事呢。???
「....離啦...阿宜。」阿文忽然喺我背後雙手捉住我條腰...。
「…喂...做...做咩呀???」我好緊張咁問佢。
「…拉龍時間呀，快啲跟住前面龍尾個女仔啦。」阿文好鬆容咁講，
我為有即刻踩快兩步追去龍尾搭住個女仔嘅膊頭啦。
~Hi ！ Cha Cha Cha ？ OK~~~
廳裡面 蠟燭在燃 長夜似把黑紗扇
輕撥著 使地球忘掉這刻幾多點~
歌聲繼續播放，其實我都唔知依首係咩歌離架，
歌詞係咁cha cha cha咁，但係唱果把女仔聲就好熟咁....。
所謂嘅拉龍呢，其實就係有一個領袖負責帶頭用後溜嘅方式拖住一個人，
之後其他人就一個跟一個咁搭住膊頭或者搭住條腰咁拉成一條長龍咁兜圈，
但係其實我睇睇吓覺得似玩緊人肉貪食蛇多啲囉....。
阿文搭住我條腰跟喺我後面，比一個識左唔夠半日嘅男仔搭住條腰...
個感覺真係好尷尬....，我不斷嘗試偷望，但係阿文就係正我背後，
所以根本就無可能望到阿文嘅表情或者反應...。
一首歌嘅時間好快就過左，音樂停低之後...
所有人又會好有系統咁慢慢散開喎，個畫面真係幾搞笑。
散開之後我踩返過去姑姐同阿晶度，佢兩個依然係企左喺原位郁都冇郁過，
而阿強同家良呢...就跟住我同阿文尾一齊返到埋離。
「...喂...阿宜，點解你咁犀利架?」一返到埋去，阿晶即刻好驚訝咁問我...，
而姑姐亦都o左咀咁...，啱啱返到嘅家良同阿強就似乎唔知發生咩事咁。
「...嘻嘻...邊係呢!!」我笑笑口回應。
「...咩事呀?」家良問。
「...頭先...阿宜跟左阿文出去拉龍呀!!!」阿晶講。
「...吓...!!!」
「…吓...!!!」家良同阿強都吓左一聲，好似唔相信依個係事實咁，
喂...大佬...識踩roller姐...洗唔洗咁大反應呀...而家我識揸飛機咩!!!
就係咁阿文同家良就對我更加有興趣啦。
家良全程就痴到我實一實咁，係咁聊我傾計，而阿文呢...雖然冇家良咁誇張，
但係我都䏜到佢踩緊roller嘅途中不斷偷望我...，而我就全程保持低調，
明明識後溜或者轉圈都唔敢再展露出離。
「…喂...大佬良，唔記得左下面好似有(幪面超人black)精品會喎!!!」
踩踩吓...阿強突然好緊張咁走左埋離同家良講。
「…唔拿係掛...你依家先講!!」家良一聽到當堂嚇左一跳。
「...咁仲...仲唔快啲行，唔好意思呀...阿宜...我轉頭返離。」講完之後家良就面都青埋咁推走左阿強啦。
嘻嘻...好野...去耐啲啦...小個人煩我不知幾咁爽，但係...仲有個阿文係度喎，
家良走左之後，阿文就好似有意咁慢慢向住我方向溜緊埋離，
...我緊係繼續加速係人群中穿插，希望盡量同佢保持距離啦，
但是我越要走佢就越要跟，我不斷加速但係點都甩唔開佢...終於。
「...吖...!!!」
~...嘭...。~
終於...我失控自炒左埋牆，撞完牆之後再反彈...成個人向後攤左喺度....。
「...吖....嗚....好痛呀!!!」因為真係好痛呀，所以忍唔住...喊左出離，
現場太嘈啦...而且又暗，所以只係得附近嘅人見到我...，
啲人企哂喺度...好似唔知點做咁，場入面又冇工作人員喎，
好似真係死左都未必有人會救你咁囉。
「...阿宜...你冇事吖嘛???」阿文好快就溜到我面前，而家跪左喺我隔離。
「...嗚...好...好痛呀!!!」我繼續爆喊。
「…訓喺度好危險架，我扶你返出去先啦。」阿文一邊講一邊抱起左我，
之後就慢慢咁抱住我行左出去場出面啦。
「...邊度覺得痛呀???」到場邊...阿文扶左我埋張長櫈度坐低之後問我。
「…er...依...依家好似好啲啦...唔...唔該。」我收哂聲...面紅紅咁答阿文。
「...拿...攞住啦。」阿文喺褲袋度拎左條手巾仔出離，
抺一抺我眼邊嘅唳水，再遞左比我。
「…吓...er...唔該。」我比條手巾窒左一窒，之後順手接住。
「...係啦...頭先做咩踩咁快呀??」回過神後...阿文忽然問我。
「...er...。」我都唔知點答佢好，唔通話你追我...所以我走咩。
「…其實頭先我都留意到你對鞋個剎制有啲問題架啦，
仲諗住過離提提你叫你小心啲唔好踩咁快添，點知...
話口未完你就失控啦。」阿文...一邊講一邊好無奈咁擰哂頭...。
「…吓...乜...係咩???」原來...佢頭先係咁追住我就係因為咁牙...
早知就唔走啦...咁咪唔洗撻生魚咁囉...唉...。
休息左一陣之後，我地就行返入場。
家良同阿強睇幪面超人睇到仲未返離，而姑姐同阿晶呢...
就完全察覺唔到我地曾經離開過咁，之後我都唔敢溜咁快啦，
只係扶住姑姐慢慢咁沿住側邊兜圈，隔左冇耐之後，連阿強同家良都返埋離。
話咁快就已經玩到四點幾，大家都踩到腳跛咁濟啦，
於是大家都好滿足咁還鞋離場。