救爸行動1986(穿越)(愛情)(親情): 第一章1
~第一章
「…呼....。」冷靜啲...冷靜啲...，一定係發緊夢...，
係啦...係啦，除左咁冇第二個理由...。
於是我成個人攤左喺地下度，合埋雙眼大字形咁...開始數起數字。
「...好啦...一....二....三，點解你仲喺度架??」但係當我數完一二三睜開雙眼嘅時候，
果個男仔依然喺度，而家仲企左喺我旁邊俯視住我，個樣好疑惑又好同情我咁。
「...小姐...你...係咪落離果陣同屋企人失散左呀???」男仔繼續好疑惑咁問。
~…咕咚咕咚...~
遠處樹林入面突然傳離腳步聲，
於是我即刻企返起身，望向聲音來源。
腳步聲越離越近...越近就越大聲，聽得出應該係有兩個人一齊行，
就喺差唔多見到果兩個人身影果陣。
「...快啲走啦。」個男仔突然拖住左我，
好大力咁拉住我一隻手，一枝箭咁跑落山。
雖然我好想反抗，但係唔知點解望住佢嘅背影，再加上佢拖住我隻手嘅感覺，
唔知點解有種無形嘅熟悉感...，終於...我冇反抗到咁比佢拖住一直跑到落山腳。
「…嗄...呼...。」我同個男仔都一齊停左落離...一齊透緊大氣。
「…呼...做咩拖住人地走喎。」我一邊喘氣一邊好惡咁質問佢。
「...依啲時間，兩個人影九成係村巡隊勇哥同智哥離架，
我成日都行山知道哂架啦...。」男仔好自豪咁講。
「...勇哥...智哥?」我好疑惑咁講。
「...哦...佢兩個係差人離架，即係公安呀，見到你冇身份證實拉你返去架。」
男仔用心良苦咁講，睇離佢真係當正我係大陸偷渡落離咁...。
「...咁...你捨得放手未吖?」我望住佢...再望一望佢果隻捉到我實一實嘅手講。
「...吖...對...對唔住。」男仔好緊張咁即時鬆開手。
「…你咁樣喺條街度周圍走好危險架，不如...去我度休息吓先啦。」
男仔好認真咁講，講完之後我就望一望佢。
「...你唔好誤會呀，我係因為...覺得你...er...點講呢...好可憐咁...
睇吓有啲咩可以幫到你架咋...我冇其他企圖架。」男仔係咁揮手...好無奈咁講，
但係又唔知點解見到佢...我完全冇哂戒心...覺到佢係一個好人咁，而到最後...我又真係跟左佢返去添。
男仔帶住我...沿住香港仔大道慢慢咁行到出海旁，咦...喂...點解...個海賓公園唔見左嘅???
「..依度起緊個新嘅海賓公園呀...，過多幾年就起好架啦，到時呢...又多個地方可以消遣吓啦。」
男仔見到我望到笪空nelnel嘅填海地實一實，所以同我講。
「…係呢...你又話帶我去你度嘅...點解帶我離海邊?」我問個男仔，因為佢依家帶左我去海邊...。
「…就到架啦...前面就係。」男仔繼續行，邊行邊指住前面泊喺岸邊嘅住家艇講。
「...你住船架???」我問，因為男仔已經帶住我上左其中一艘艇屋上面啦。
「…er...唔係...依度我阿婆屋企離嘅。」行到上去...
個男仔就行左去...留低左我一個女仔喺度囉...。
於是我就自己坐左埋一邊嘅木梳化度啦。
無聊四圍望吓，原來依啲就係以前嘅漁民生活拿，雖然以前都成日聽阿爸講，
有時阿爺阿嫲都會提吓，但係親眼見嘅...真架第一次。
係啦...未同大家交待返添，其實小妹本身都家住香港仔，而且阿爺果代仲係漁民離添...
不過其實住香港仔嘅，以前十個有八個都係漁民離架啦...。
「...你係邊個呀?」突然間有第二個男仔走左出離，而家眼甘甘咁望住我講。
「...er...。」我口窒窒咁...都唔知點答佢。
「...哦...緊係偷野啦....!!!」男仔一邊講一邊衝埋離，雙手撳住我...壓左我落地...。
「…喂...好痛呀...放手呀!!!」雖然我都跟我阿爸學習過一啲搏擊技巧，
但係對方此終都係一個牛高馬大嘅男仔，而且佢仲開始對我摸手摸腳添...
我都唔知應該保護住重要部位定反擊好...，到最後...
我終於都用隻腳一野踢左落佢細佬度，成功掙脫...。
「...吖...呀!!!」而個男仔就訓左喺地下度，典離典去叫到鬼摙咁聲，
哼...抵你死啦...邊個叫你對本小姐無禮呀。
「…細佬...，發生咩事呀?」帶我離果個男仔聽到慘叫聲即刻衝左出離，
望完訓喺地下嘅色狼之後再望住我問。
「...個衰人非禮我...我咪踢佢囉。」我理直氣壯咁講。
「...做咩咁嘈呀...嘈醒凱瑩啦。」依家又多左個女人行左出離，
望落好似廿幾歲度，而且仲手抱住個bb添。
「...個賊上到船仲郁手打人呀!!!」色狼仲喺度惡人先告狀囉...頂佢。
「…明明係你無啦啦衝埋離...摸手摸腳...仲話我...!!!」我緊係據理力爭啦。
「...咪住先...你係咩人呢...妹妹，點解會上左我地隻艇?」
女人微笑住咁問我，點解好似熟口熟面咁嘅。
「唔係呀...大姐，係我帶佢上離架!!!」帶我離果個男仔即刻好緊張咁開聲講。
「…哦...你朋友離架...福頭。」女人繼續問。
「…er...點講呢...。」男仔er左幾聲，之後就將佢所知嘅野講哂比佢家姐聽啦，
不過當然係屈我係非法入境者啦，但係...我都唔知點解釋比佢地聽好，所以我繼續無言以對。
「...咁牙...會唔會唔係咁好呀...福頭，阿爸阿媽知道到時點搞呀?」女人臉有難色咁。
「...咁...佢咁可憐...我點可以唔理佢喎。」男仔無奈咁答。
「…唉...我唔知啦，等一陣阿爸阿媽返離你自己說服佢地啦。」女人講完之後就回頭入返房，
而色狼亦都好無引咁上左街，而家又係得返男仔同我兩個啦...。
「...我同你三唔識七你做咩咁幫我呀?」我問。
「...er...唔知點解...我...我覺得你好親切，第一眼見到你...就有種唔可以掉低你嘅感覺...，
我都唔知點形容。」男仔dup低左頭，面向左地下咁講。
「...多謝你...，係呢...我叫阿宜呀點稱呼你呀，...福頭?」我微笑住咁問佢。
「...er...福頭係乳名離架咋，你都係叫返我阿華啦...嘻嘻...阿宜。」阿華面紅紅怕怕醜咁講。
「...嘻嘻...好呀...華哥。」我亦都微笑回應。
「…放心啦，一陣老豆返離我一定會說服佢收留你架...只要唔上岸呢，啲警察就算見到你都耐我地唔何。」
阿華一邊講一邊行左埋櫃度除低佢一直都帶住嘅賊仔帽同烏蠅眼鏡，終於都可以見到佢嘅真面目啦。
「...er...係咪有啲咩野唔妥呀?」男仔忽然問我，因為我見到佢個樣之後呆左咁望住左佢，
...我開始留意到佢...好似一個人...一個我生命當中最重要嘅人。
「...你...你...係咪姓鄭架?」我好緊張咁問。
「…係呀...你點知架?」阿華好疑惑咁問。
「...咁...咁...全名呢???」我繼續追問。
「…吓...er...鄭...鄭利華囉。」阿華用啲奇怪嘅眼神望住我回應，
而我嘅唳水...已經忍唔住再一次流出離啦...兩隻眼紅哂咁...因為。
「…嗚嗚....嗚嗚....阿爸呀!!!」我撲左埋去雙手攬住左佢痛唳，
因為...原來佢...就係我阿爸...我千辛萬苦咁要搵嘅阿爸。