救爸行動1986(穿越)(愛情)(親情): 序
~序「…嚇....吁....嚇...。」依啲係我嘅呼吸聲，點解會咁架...
明明頭先經過左依度...點解又返返原位嘅???
我好攰呀，好似已經跑左個幾鐘，但係四圍除左高高密密嘅大樹之外，
就咩都見唔到，我...係咪要死喺依度呀?
「...呼....嚇...呼....。」我坐左埋一棵大樹嘅樹底...周圍漆黑一片。
「...~哧~.....。」我喺背囊度拎左我部htc butterfly2出離，
哈哈....同我預期嘅一樣...真係一格都收唔到...。
「...唉...。」我嘆左口氣，唉...早知就唔咁任性啦...。
吖...未同大家自我介紹添，大家好呀...我叫做鄭泳宜，十六歲...吖...唔係，
過左十二點我而家十七歲啦，祝我生日快樂啦。不過...生日可能都係我嘅死忌...
因為我而家身處喺西貢嘅山上面，而且...已經徹底迷失....。
其實我平時真係好小行山，一個人行更加係第一次。係咪覺得我好天真好傻呢....，
即管笑啦...我抵死嘅....。嗚嗚...但係...我真係好掛住...阿爸呀，五年前...阿爸就喺依度失蹤...，
雖然啲人話阿爸已經死左，但係我一直都唔相信。
本來我同阿爸阿媽，三個人生活得好開心，阿爸係警察，而阿媽就喺老人院度做看護，
我地可以話係一個小康之家，但係...就係因為五年前嘅一日...阿爸離到依度行山之後，
就一直都冇返過離，從此之後...我嘅人生就改變左。
雖然警察果邊對我地母女有一定嘅照顧，加上阿媽繼續打工搵錢，所以經濟上冇需要擔心，
但係因為阿媽成日掛住返工，我同阿媽嘅關係就一日比一日疏離...，只係每晚我臨訓前，
阿媽先會問候幾句，我同阿媽已經再冇共同話題，我嘅性格亦都變得孤僻。
雖然我唔算好靚女，亦都冇咩身材又瘦，但係學校間中都會有男仔追我，
不過我都會好決絕咁拒絕對方...，我身邊啲朋友都話我成個孤獨精咁...
叫我多啲出去同佢地玩吓，但係我一直都冇乜點理，連今日我生日...
佢地話同我慶祝我都放飛機...神推鬼擁咁走左上離西貢...哈哈...我諗真係天意。
今日係星期六，所以唔洗返學，阿媽一如以往喺我訓醒之前就出左門口返工，
我訓醒之後就一個人戇居居咁對住一間空屋，望吓部電話...咦...幾個未接來電，
全部都係我best friend阿燕打離。
~…嘟...嘟...。~於是我就打返電話比佢。
「…喂...阿宜...訓醒拿。」阿燕好快就接聽左電話。
「…...係呀，唔好意思聽唔到。」我好尷尬咁答。
「…傻啦...衰妹，生日快樂...祝你一年靚過一年!!!」嘻嘻...都係阿燕好...。
「…嘻嘻...多謝...。」我答。
「…唔好講咁多啦，一陣晏啲一於出去shopping再同你食飯慶祝，
搵埋司徒同阿瑜兩個八婆先。」阿燕好興奮咁。
「...er...是...是但啦。」其實我唔係太想去，不過既然阿燕咁有心，就即管去吓啦。
收左線之後，我就起身疏洗...刷牙洗面咁，嘩...原來已經下午兩點幾架啦，唔怪得咗肚餓啦。
於是疏洗完之後，我就一個人落左樓下茶餐廳度食左個下午茶，
食完之後就百無聊賴咁繼續坐左喺茶餐廳度...等阿燕電話。
而家茶餐廳入面個電視播緊互動新聞台，忽然聽到一單報導令我目不轉睛。
係一單關於台灣山區行山人士失蹤嘅新聞，我一邊睇...不禁想起...離開左我五年嘅阿爸...，
雙眼通紅...唳水不由自主咁流出...。
「…小姐...你冇野吖嘛?」一個男侍應遞左張紙巾比我...，個樣好尷尬咁。
「…唔...唔該...，我冇事。」我一邊答一邊接過紙巾，抺過眼淚之後我就埋單走左啦。
我急急腳咁行左返屋企，為嘅唔係同阿燕出去慶祝，而係心血來潮嘅衝動，
一個念頭...一個好想搵返阿爸嘅念頭。我換過行山裝束，帶上基本裝備，
就一個人膽粗粗咁咩住個背囊，走左去阿爸當年失蹤嘅地方....西貢。
我要去阿爸失蹤嘅地點蛇石坳一探究竟。我由嶂山，經石屋山行去蛇石坳，
雖然我平時真係好小行山，但係因為依條係阿爸嘅失蹤路線，所以我都同朋友行過離幾次。
沿途山路唔算難行，大樹唔多，兩旁盡是野草，加上日間陽光充沛，
好難想像咁寛闊嘅山嶺阿爸會無緣無故失蹤。
行左無耐到達蛇石坳嘅十字路口，情況開始變化，依個路口四通八達。
唔知點解...喺深山遇上十字路口，內心難免忐忑，加上太陽開始落山，
天色開始昏暗，深怕錯揀冤枉路。就喺依個時候，
一個二十歲左右嘅男仔手持兩支行山杖喺榕樹澳方向走離，並且開口問我。
「喂...頭先行左去邊呀？」男仔衣著古怪，面露笑容咁向我走近，
仲開始越行越近，而且雙手有所動作，好似想張我抱住咁....。
「…喂...你唔好亂離喎，我都唔識你。」我下意識一手將佢推開。
「...吓...。」男仔向後退開兩步，之後好疑惑咁望一望我。
「…er...唔好意思，可能暗得濟我認錯人。」幾秒之後，男仔口窒窒咁講，
講完就急急腳咁走左，都唔知係咪專登想非禮我架。
男仔走左之後，我就坐左埋一邊休息左陣，之後沿住分叉小徑繼續前進，
唔知行左幾耐，天色已經全黑，伸手不見五指...我拎左電筒出離幫助照明，
再行左一段路，開始行到一條小徑，小徑兩邊草叢較密，遠處更傳離溪水潺潺聲，
我再沿斜坡往下走，就見到灰黑色、表面凸出彎曲蛇紋嘅蛇石，攀下果塊約一米半高嘅蛇石，
再發現另一塊高三米嘅蛇紋巨石。喺依一刻我發現我根本就過唔到去...我停左落離，
拎出手機睇睇，發現手機接收信號已經一格都冇，係完全收唔到，唔...唔通...阿爸就喺附近失蹤嘅？
我挨住舊石坐左喺度，望住個星空...真係好靚....，
諗諗吓...死喺依度都唔錯吖，可以同阿爸一齊...嘻嘻。
「…嗚嗚...阿爸...我真係好掛住你呀!!!」我又喊又笑咁...好似痴左線一樣。
咦...係流星雨喎，估唔到臨死都比我見到咁靚嘅畫面，個天都算係咁啦...。
從來都未見過流星嘅我，呆呆咁坐左喺度仰望住咁靚嘅星空，
一粒粒流星...由左至右咁...不斷飛過....就好似嘉年華會嘅燈飾一樣...閃爍燦爛。
~…嚓....。~
就喺我想放棄嘅時候，忽然聽到附近傳離物件擦過樹葉嘅聲音。
「...冇事吖嘛?」隱約聽到一把女仔嘅聲...，唔知點解呢...把聲好似好熟咁。
但係聲音好快就消失於空氣當中。好奇心驅動下，我企返起身...
帶住疲倦嘅身軀開始嘗試找尋聲音嘅來源，我用盡九牛二虎之力，
成功攀過頭先果舊一米高嘅蛇石，但係之後嘅景象，令我覺得匪夷所思。
雖然唔係見到恐龍咁誇張，但係見到嘅景物同我印象中頭先經過見到嘅時候有好大嘅出入，
冇哂果啲蛇纹石，山路亦都變到寛闊...，我一邊行一邊四周圍望，大約再行多半個鐘左右，
天色開始變光，嘩...原來已經朝早架啦，乜我上左山成晚架啦咩，但係點解感覺只係去左一陣咁嘅...。
我一邊行一邊喺背囊度拎左部電話出離睇，咦...但係電話明明話係零辰三點架...
點解呢?好...好肚餓呀，行左咁耐個肚開始打鼓啦，早知帶定幾條energy bar離啦。
「…咦...前面...係咪有人呀。」離遠見到一個男人嘅背影，大約同我只有一百米嘅距離。
「...喂...等...等埋呀!!!」我一邊大叫一邊跑向背影，由一個黑影...
慢慢變成清晰嘅線條，到完整嘅影像...，冇錯呀...係一個身形瘦削嘅男仔...，
而家佢聽到我叫停左落離，擰左個頭過離望住我。
「…小姐...你...你...叫我牙?」個男仔口窒窒咁，望落去個樣好似廿歲左右，
好鬼瘦...著住件灰色t恤...淺籃色牛仔褲帶住副李小龍烏蠅眼鏡，
再加頂賊仔帽，仲要著住件淺啡色阿伯風褸添...，懷舊之夜咩大佬....。
「...緊係叫你啦，知唔知依度係邊度呀?」我行左埋去個男仔身邊問。
「...依度...咪香港仔水塘囉。」男仔呆左一呆之後答我。
「…吓...點會係香港仔架???」琴晚明明喺西貢架喎....，
條友係咪見我女仔專登玩野架...。
「…咪吹喎，講真啦。」我有小小唔耐煩咁再問。
「…吓...吹，我冇吹氣呀...。」男仔一臉疑惑咁...。
「...叫你講真呀...咁都聽唔明。」我嬲嬲地咁講，最憎人mean我架啦。
「...吓...我冇講大話架，唔信你自己睇吓個牌啦。」
男仔指一指側邊嘅一個告示牌講，於是我就慢慢行左埋去啦。
「喂...依個牌咩意思呀???」我指住個牌好疑惑咁問。
「…咩意思...你唔識字架...咪不准隨地吐痰囉。」個男仔口窒窒咁答我。
「...我係問下面果幾隻細字寫住香港仔市政局係咩意思呀!!!」我好激動咁再問。
「…吓...唔通係非法入境者，點講呢...市政局即係香港嘅公安果類野呀。」
男仔好大動作咁解釋我聽，但係我...而家根本就冇理到佢，
而係神不守舍咁周圍望離望去，完全唔相信我眼前所發生嘅一切咁。
「…小...小姐...你冇事吖嘛。」男仔見我六神無主咁，所以拍一拍我膊頭叫我。
「...吖...你做咩呀!!!」比個男人拍一拍嘅我，嚇到成個彈起，退後左兩步。
「…小...小姐，你冷靜啲先，我冇惡意嘅。」男仔亦都比我嚇一嚇同樣彈後左兩步，手上嘅報紙仲跌左落地添。
「...星島晚報...一九八六年三月十九日，今日係一九八六年三月十九???」
我拎起地下嘅報紙，讀完之後再望住個男仔問佢。
「...係呀...虎年吖嘛。」男仔繼續微笑住咁答我。
…吓...唔通我真係返左去30年前，點...點會咁架!!!!