[信不信由你] 青少年經歷: 21

返到屋企之後又係大覺訓
期間我記得都無乜特別野發生 因為日日都係返學放學
不過好撚開心

有次同小莉出街 好似係復活節假期
點解同佢出就唔記得啦
我記得係出tst

我:「點解你成日行呢幾個地方都唔撚厭既」
佢:「又係你話出黎既 我先陪你出咋喎」




我:「唔好意思要你陪我揀野」
佢:「是但啦 反正我得閒」

至於係揀咩呢 就係我老母既生日禮物啦
老豆畀撚左錢叫我買 買完有剩我既 但係又郁都唔撚郁
算係有d外快賺下咁

佢:「你想買咩畀你阿媽呀」
我:「買平d 因為我可以多d水腳賺下」
佢:「死市儈仔但係點解搵我出黎」




我:「大家女人揀野差唔多」
佢:「咁...咁你又唔搵阿影」
我:「屌佢揀既野件件都貴到老母都唔認得買完我都無幾多剩啦」
佢:「哼 原來係咁」

跟住就開始同佢行下街啦

果日同小莉差唔多行晒成個tst
行撚到腳都斷佢仲要好似無乜野咁
有幾樣野係特別記憶深刻





首先係去凱講乘既名店
班仆街sales真係好狗 見到我地兩個係中學雞真係眼尾都唔撚望你
見到大陸佬就即刻水已出 表面係中女 實際係老舉
我叫老舉sales做屌先

我:「小姐呢個銀包幾錢」
屌:「銀包入面咪有個價錢牌囉 但係呢個好貴喎」
我心諗真係屌你老母 忍一忍你 睇完幾錢先再打算

點知一見到--->
仆你個街成五千蚊嚇到我尿已賴

屌:「送畀女朋友定係買畀人架」
小莉:「我先唔會買咁貴既野呀我地去第二間睇」




我:「佢係我朋友不過都係行下先 好貴」
屌:「你女朋友未駛用咁成熟既款住 揀個平既用住先啦」
我:「都話唔係買畀佢唔該你」

跟住出到去問小莉:「做乜你咁撚大反應」
佢:「你唔覺佢好睇唔起人咩 激死我」
我:「事實上我係無錢嘛」
佢:「點會有人咁細個用咁貴既銀包喎 佢咁講即係話我唔係正經女仔啦」
我:「雞咪用囉 你唔見a班果條女用緊呢個牌子咩 聽人講佢好似有個好有錢既男友」
佢:「咁我唔係佢呀嘛有錢都唔買佢呀」
我:「痴撚線 無啦啦咁炆」
佢:「無野行啦」

第二係同佢買果d雪糕車雪糕 
其實點解咁多人鍾意食呢 又唔撚抵 去阿波羅好過啦 




佢:「食哈密瓜味啦 好好食」 
我:「乜撚味黎 不過唔關我事 你話得好食一定係淡/甜到仆街」 
佢:「你試一啖先啦」 

果陣同佢係用同一條匙羹 但係又唔覺得核突 
可能同佢都慣左掛 而家有時都會 

我食左一啖已經覺得呢種係乜鳩味黎 
點解會有味咁撚戇鳩 好似食屎咁 

我:「你自己食啦 難食到仆街」 
佢:「係咩 我覺得好好食喎」 
我:「你口味不嬲變撚態 個人亦都好奇怪」 
佢:「幾時有 口味個個人唔同架嘛」 
我:「所以你自己食啦」 





跟住就同佢行行行行行行行行啦 

第三係同佢行無咁貴既鋪頭 

入到去班人都無咁差態度 起碼見你係中學雞都招呼下你呀屌 
見到佢有支個香水set係幾平 連好撚麻煩既小莉都覺得唔錯 

我:「呢支點睇 價錢中等 款式上品」 
佢:「你聞下咩味先啦 陣間你又話隻味難聞搞到你打乞痴」 
我:「你條粉腸有陣時都幾細心」 
佢:「又咁講」 

跟住搞左一輪終於買左 都係果句 好彩有油水 
佢個set係有送條好似手巾既野 我豪左畀小莉 因為佢陪我行左好撚耐 




佢好開心咁收左 畀著我都開心啦屌你 唔駛錢 

最後同佢食左砂爹皇做晚飯 其實間仆街野真係好撚熱氣 成間得煎炸野食 
去到最後我都忍唔住要行一陣 因為好撚飽 好多餐廳以前既份量真係合理 例如以前佢炸雞軟骨係成個盤仔都係
我屌佢老母而家夠膽死擺一半蝦片係下面上面鋪張紙放雞軟骨 真係把撚火 屌柒佢都無結果 

我:「今次終於到我做狗啦屌 不如行一陣啦屌 個肚脹到就爆咁」 
佢:「死無聊友 等我帶你散下步啦狗仔」 
我:「戇撚鳩 咁勉強你可以返去先」 
佢:「你話人就得人地話你就唔得 行啦」 
我:「講咁多咪又撚係行」 
佢:「咁你想行邊呀」 
我:「唔撚行海旁 你同肥影永遠咁無新意 今次行下呢邊啦」 
佢:「行去果邊做乜呀」 
我:「等我帶你去見識下啦屌你」 

係狗聾工圓最上面類似酒店果邊有個位有望遠鏡果度 
個風景係好撚好撚正 我覺得果度係九龍區窮人都可以將成個海景一覽無遺既地方 
無論有無拍拖都好 做野做到無目標果陣我都會去下果度 因為可以話畀自己聽如果有錢就可以日日睇一個咁靚既海景 

夜晚狗聾工圓其實幾雜 好撚多黑人mk人無家可歸既慘人都係果度 
小莉條撚樣勁撚細膽 成程黐到幾埋 
因為佢有少少怕黑

行左一陣終於去到 個肚都覺得無咁脹 

佢:「呢度邊度黎架 真係黎都無黎過喎」 
我:「屌你我諗大陸人都黎過啦 不過呢個鐘數無咁多人就真既」 
佢:「真係好靚呀 香港夜景真係好靚」 
我:「所以你同肥影話睇燈 呢度就可以睇晒九龍香港既燈啦傻仔」 
佢:「咁你又唔帶我地黎」 
我:「我本身出都唔想出 做乜要同你地黎」 
佢:「今次算啦 因為個景真係好靚」 
我:「最前面仲靚呀 有望遠鏡畀你望出去」 
佢:「咁行啦」 

最頭係最正 因為你會感覺到海風一陣一陣吹埋黎 就算凍到仆街都抵 
果個位夏天都唔熱果下先神奇 

佢:「有...有少少凍呀」 
我:「梗係啦 不過凍都抵」 
佢:「等我睇下個望遠鏡先 」 
我:「你有散紙咩」 
佢:「要入錢既咩」 
我:「屌你係咪咁戇鳩呀 見唔到有個入錢位係度既咩」 
佢:「唔知呀嘛 等我睇下先」 

等佢入左錢果下我一野撞開左佢霸撚左黎睇 

佢:「好賤呀你 快d走開」 

跟住佢就係咁推開我 我老西都唔走開 
最後佢自己左腳kick右腳差少少仆街 我扶返佢條腰費事佢仆到應一應 

佢:「唔..唔該」 
我:「有無人咁柒呀 畀返你睇啦」 
佢:「好...好呀」 

佢睇睇下就無左 計時架嘛屌你 

佢:「做乜矇查查既」 
我:「計時架嘛柒頭 睇完快d搭尾班車返上去啦 夜左無車搭呀」 
佢:「一齊啦 返上去無伴好悶」 
我:「識串返轉頭喎 有進步」 
佢:「多謝喎」 

跟住我就同佢坐低左傾陣計先走 

其實果晚真係無乜同小莉傾特別野 
都係傾下同學之間既八掛野同學業野 

其中一樣八掛野係我問佢知唔知肥兔對佢起痰 

我:「有無人話你知肥兔好似想溝你呀」 
佢:「阿影講過下既 不過都唔知係咪真 同埋我唔鍾意佢果類型」 
我:「點解呢 照計你應該無拍拖架喎」 
佢:「唔鍾意就唔鍾意架啦」 
我:「你個人都幾撚奇怪 女仔有人溝應該好撚開心 反而你成碌木咁」 
佢:「點解要開心呢」 
我:「起碼有免費飯食 仲有私人保鑣 你睇下阿西就知啦」 

阿西係我中學堆入面出名既姣西 佢無寶不入 多既就黐你兩三千 少既都食你三幾百 
不過佢好撚狗 至多請你食下波餅 

佢:「我點同佢 我又唔係d咁既人」 
我:「我以為係女仔都差唔多架啦 有著數喎 邊個唔要」 
佢:「你都傻傻地 阿媽話做女仔要做有內涵既女仔」 
我:「你呢種思想我諗同紮腳果個年代係差唔多 好撚封建之餘仲好守舊」 
佢:「舊有乜唔好 識將舊既好處保留就得啦」 

屌你果下我即時無聲出 因為佢呢句真係好撚有道理 

我:「你條羚羊把口利左好多」 
佢:「咩羚羊」 
我:「撚樣呀屌你」 

佢  --->  

佢:「做乜咁話我 成日講埋呢d野」 
我:「唔講唔得 因為你係」 
佢:「你都傻既 如果我唔知你講笑實嬲死你」 
我:「邊撚個同你講笑 我認真架」 
佢:「咁我咪認真咁嬲囉」 
我:「屌 你已經無賴過我啦」 
佢:「你唔問我點解唔鍾意肥兔既」 
我:「唔鍾意就唔鍾意架啦 有得解既咩 正如你咁撚鍾意食甜野係咪都有得解」 
佢:「咁你又岩喎 鍾意就係鍾意 無得解」 
我:「痴撚線 屌你九唔搭八」 
佢:「你就痴線 走啦 有少少凍同埋好黑呀」 
我:「我都覺」 
佢:「呢度真係好靚 得閒再黎行下啦」 
我:「屌 大陸同胞真係見識少」 
佢:「咁你帶我見識下囉」 
我:「你真係變左呀小莉 唔係以前既柒咕碌」 
佢:「行啦無聊友」 

跟住我就同佢走啦 

果晚返去係點都唔係好記得啦 因為無乜特別野發生 

果排值得一提既係我班會自發既班會bbq 
其實鎚仔真係幾有號召力 佢搞一陣已經大半班話去 好撚勁 
地點係沙灘 邊個沙灘你地自己諗啦 

由於天氣都仲係涼涼地 大家都唔會點落水 
當然 我係唔識游水 小莉更加飲水都哽親果隻 唔好話落水 
肥影佢識游 但係都無落到 

我果日係遲到 反正都唔係學校搞 遲都無撚所謂 
行去車站果陣肥影打黎:「喂 柒頭係邊」 
我:「咪行緊黎囉 打黎做乜鳩」 
佢:「差唔多到齊啦 快撚d啦」 
我答都費事答 一野收佢線係最好 

去到車站真係見到男男女女都到齊晒 同埋好似又得我係街坊look 

小莉:「做乜咁遲呀」 
我:「訓晏左咋嘛 反而點解你地咁早就真」 
肥影:「好耐無bbq啦 等你個柒頭等左勁耐」 
我:「咁撚唔耐煩可以走先」 
小莉:「等你仲要咁講野」 
我:「我諗應該無人到啦 走得未呀」 
小莉:「內臟好似未到喎」

係呢度要講一講 內臟係我班怪怪地既人 
即係有少少似而家既毒撚 好似唔屬於班入面咁 一放學即走或者搵埋盒仔班既怪人一齊去卡鋪玩卡   

我:「邊個咁撚大面子請得郁佢」 
肥影:「肯定係鎚仔個仆街陷家產啦 請撚埋d怪人」 

肥影呢句個印象係深到入骨 究竟鎚仔前世係咪殺佢全家再姦埋佢隻狗呢 
點解鎚仔係人都覺得佢無乜野而肥影係咁撚憎佢 

我:「屌你你無份搞就收皮啦屌 做搞手好撚難架屌你」 
肥影:「咁係呀嘛 佢都唔出聲叫佢去到食風咩屌 無人同佢玩卡架喎」 
我:「你陣間同佢打下排球囉 反正鎚仔教你 又可以多個朋友 你知你份人咁撚煩無乜朋友架啦」 
肥影:「屌你呀仆街 同佢兩個玩我返屋企訓陣好過」 
我:「咁你走得啦」 
小莉:「你唔好咁衰得唔得呀」 
我:「屌你又關你事」 
小莉:「咁...咁係呀嘛」 

一見到佢整呢d死人樣就 

我:「唉... 咪整呢d樣啦 殺你全家咩屌」 
肥影:「我就黎殺你全家呀屌 成撚日柒下柒下」 
我:「你老味 算 費撚事理你 等我同班仆街仔玩下先」 

果班仆街仔即係第一話大大聲講我無拉褲鏈果個仆街仔仲有佢周圍既人 
佢地好撚搞笑 一講野就笑到你仆街 
唉 而家就好少見面啦.... 

果下大家都等左內臟好耐 點知條仆街真係唔撚黎 
屌那星最撚憎人話到又唔到 又撚要夾埋佢果份錢呀嘛仆街 

大家搭車果陣都一如小學雞咁撚嘈 
肥影同小莉唔知點解有位坐 明明係禮拜六既中午竟然都有得坐 
一班狗公既威力真係 

去到目的地大家都幫手起爐 
鎚仔個仆街起都起左肥影個爐先 真係好狗 
如果係而家實拍片放上黎高登 

我:「不如你叫鎚仔放個頭去燒下睇下佢制唔制」 
肥影:「燒都燒你先啦仆街」 
我:「屌你 你鋤dee叻唔叻 少隻腳」 
肥影:「一般啦屌你 同你比就梗係勁啦」 
我:「哈 睇下點」 
小莉:「你地賭錢架」 
我:「唔知班撚樣點 不過肥影你輸左就落水浸下返上黎先啦」 
小莉:「傻左咩 凍冰冰點落水呀」 
我:「海獅落到肥影一樣得」 
肥影:「仆街啦 搵我同海獅比」 
小莉:「咁我睇你地玩啦 反正我都唔識」 

跟住就同班撚樣玩啦 

果下肥影真係同我仲有兩個仆街玩 
不過我對鋤dee都有少少研究 
所以肥影果次係輸到仆街