<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５０－２　麻煩（下）

 Chapter ５０－２ 麻煩（下）

儘管謝家進那些相片已經清理得一張不餘，眾賓客亦對此事三緘其口，然而壽宴仍然在一片不太愉快的氛圍下結束。
 
謝金雄對尚興國剛才的表現十分滿意，褒獎道：「小朋友，你身手都幾好，如果頭先唔係你喺到就麻煩喇！」
 
受到四大家族的話事人表揚，尚興國一時間感到不知所措，我道：「謝老先生，佢叫尚興國，屋企係武術世家，仲拍過武打片，身手一流。」
 
謝金雄點頭道：「嗯，唔錯，尚興國，我記住依個名。」
 




一向不喜應酬的尚興國，想不到居然會結識了四大家族的謝金雄。
 
謝金雄道：「成皇志，你跟我車，我有啲野要問你。」
 
我要尚興國與姚智風、霍去登先行離去，然後跟隨謝金雄上車。車廂上只有我和謝金雄二人，不知道謝金雄有什麼話要跟我說，連謝家進也要乘坐另一輛轎車，有什麼是謝家進不能知道的？
 
置身在奢華的車廂內，勞斯萊斯已經行駛了一段時間，謝金雄依舊保持沉默，我沒有能耐從他臉上的神情判別出他有什麼想法。
 
片晌，謝金雄終於打破沉默道：「阿進雖然係長子，但係我覺得佢唔係太適合繼續帶領大細界。」
 




謝金雄臉色古井不波，口中卻說出更換集團主席這樣震撼的消息。　
 
我吃驚道：「謝老先生，係咪因為剛才嗰件事？其實只係男女間爭風呷醋嘅小事，唔需要嚴重到去換主席啩。」
 
「依件事只係導火線，阿進一直以嘅表現都令我好失望，有幾次退休後，我都要復出去主持大局，依幾年大細界嘅業績持續不振，唔好話同其他三家爭雄，隨時連個梗頸四都保唔住，我怕百年歸老之後，成份家業會俾阿進個衰仔敗光。」
 
謝金雄說到這裡，我的腦海浮現之前與文光義的一番對話。
 
文光義儘管有要事回去美國，但我們仍然保持聯絡，不時會通電話，兩星期前他致電給我，道：「成皇志，聽講你同大細界嘅謝家進行得好埋喎？」
 




「你喺美國都有留意我嘅新聞？」
 
「當然啦！我對你嘅事好上心，你做得幾好，如果你要以『車上對』作為戰略方針，有必要去搵棵大樹去遮蔭，四大家族入面，其餘三家都係由第一代掌舵人話事，個個老成持重、好有主見，外人好難入手。大細界嘅謝家進庸碌無為，外人笑佢係扶唔起嘅阿斗，你從佢入手就係最好不過。」
 
「車上對」這名字是我起的，是用來描述當時文光義在車上對我說出的一番鴻圖大計，之後我向文光義說出這名字，他還讚賞我這名字起得好。
 
「乜你講到要我食佢間公司咁嘅。」
 
「大細界依啲千億巨企，要蛇吞象就無可能，但趁機咬佢一啖嘅人就大把，我唔係要你做咬佢嗰個，係要你做保護佢嗰個，大細界依間公司對我地未來嘅大計，發揮好重要嘅作用，所以你要同佢地保持友好關係。」
 
「你真係睇得起我，我邊有能力去守護大細界？」
 
「大細界最大危機唔係外來，而係內在，謝家進雖然係大細界嘅主席，但係佢頭上仲有一個太上皇謝金雄，謝金雄有更換主席嘅權力，謝金雄其實對謝家進嘅能力一直都唔放心，你咁難得先令謝家進信你，如果謝家進主席個位無咗，你之前做嘅野就白費，所以如果謝金雄真係想換主席嘅話，你就照我說話去做……」
 
想不到真的給文光義言中，謝金雄有更換主席的打算。




 
謝金雄嘆道：「創業難，守業更難，家進因為係長子，之前我就將責任交俾佢，既然俾咁多次機會佢都唔掂，我不如換人啦！」
 
我道：「謝老先生，唔知你有無聽過明成祖朱棣依個人呢？」
 
謝金雄皺起眉頭道：「都知道係咩人嚟嘅，咩事啊？」
 
「當年明成祖都同你一樣煩緊繼承人嘅問題，長子朱高熾才能麻麻，而且行動唔係咁方便，二子朱高煦英武瀟洒、能征善戰，同朱棣好似，但係佢最後都係揀咗朱高熾做繼承人，謝老先生，你知唔知點解？」
 
謝金雄道：「皇帝繼承人依啲長幼有序，皇帝個位由大仔去繼承好應該啫！」
 
我搖頭道：「謝老先生，你個答案唔係最主要原因，最主要嘅原因係因為朱高熾有個好叻嘅仔，亦即係朱棣有個好叻嘅孫。」
 
一向喜怒不形於色的謝金雄聞言不禁眉頭一挑，我續道：「一個集團同一個帝國一樣，創業者睇嘅唔單單係佢嘅繼任人，亦都要考慮再下一任嘅繼任人嘅問題，謝仕光先生有無資格成為大細界嘅第三任掌舵人？我相信謝老先生比我更清楚。」
 




謝金雄點著頭，笑道：「阿進成世人最叻就係識投胎，第二叻就係生咗仕光依個仔。你講得無錯，阿進佢最多可以睇多大細界十年八載，就要退休交捧俾仕光，我對阿進無信心啫，但係對依個乖孫好有信心。」
 
看來文光義教我的說辭產生了效用，謝金雄已經打消了切換主席的念頭。
 
謝金雄搖頭嘆道：「阿進個衰仔好搞唔搞，搞著阿龍嘅女人，阿龍口頭上雖然原諒咗阿進，但係我知道佢心入面仲有條刺喺到嘅！」
 
在原來的時空，我沒有留意到謝家進與樓敬龍的感情糾紛，應該不會是我所產生的蝴蝶效應吧？經歷了這麼多，我漸漸對蝴蝶效應有一些想法，除非我是去直接親身去干預一件事，就如像八座事件那樣，結局才會有大副度的改寫；否則像投注那一隊球隊獲勝這樣的事，並非親身去參與，不會做成什麼改變，不過這只是我自己的推論。
 
我道：「其實睡仙同我講過樓生同羅婕妤依段係霧水情願，唔會長久，同佢走埋下半生嘅人啱啱先出現，佢地之後仲會好幸福咁生兒育女添。」
 
「乜神仙都會理埋依啲咁雞毛蒜皮嘅事咩？咁同阿龍生仔嗰女人係姓李定姓關？」
 
「樓生嗰真名天女唔係名人或者名星。」
 
「嗯，阿龍最近口味變咗，開始鍾意啲才女。」




 
原本氣氛都很輕鬆愉快，突然謝金雄嘆了一口氣，道：「唉，以前阿暉佢好叻仔、對我好有孝心，但係估唔到佢講一套做套，人心不足蛇吞象、人為財死，依啲就係講人為咗錢，可以變到無晒原則。」
 
我道：「謝老先生，覺得人唔應該貪心？」
 
謝金雄乾笑了一聲，道：「其實我又無資格批評阿暉，我唔貪心就唔會得到依家擁有嘅野，可能到咗我依個年紀，我睇錢無以前咁著緊，我啲錢都係留返俾啲兒孫。」
 
我試探道：「謝老先生，你打算點對付王耀暉？」
 
謝金雄搖了搖頭，道：「如果係以前，阿暉搞樣喺我大壽搞事，我唔會原諒佢，但依家我老喇！心軟啊！要我俾幾億佢東山再起，我無咁大量，保佢以後衣食無憂，就當係我對佢盡最後一番情義啦！」
 
謝金雄選擇原諒，可是此刻的王耀暉正在自己的遊艇裡懊悔自己剛才的行為，因為之前受的打擊太大，他沉迷酒色、毒品，掏空了身體，精神錯亂的他居然大鬧謝金雄的壽宴，為何自己這樣蠢？自己這樣做把唯一可以拯救自己的人都惹怒了，世上再沒有人可以讓他捲土重來。
 
謝金雄或者看在往昔情義不與自己計較，可是樓敬龍父子呢？還有其他債主呢？再退一萬步，只要自己申請破產，那些債主又放過自己，可以做回普通人，然而習慣了住最好的大屋、喝最貴的酒、睡最美的女人，他還可以打回原形當一個普通人嗎？
 




不，他寧願死也不要當一個下等人，一念及此，他把門鎖上，然後搬出火爐，把炭燒得通紅，他一邊喝著昂貴的干邑，倒數著最後的人生。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl