<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter １７　郊遊（中）

Chapter １７　郊遊（中）
 
既然自強會決定了走進元朗，抗議新任鄉郊會韓軍無理殺校的決定，為了顧及大家的安全，我們與萬喜、元朗天水圍民主戰線的主席沈建業商討一些關於遊行的細節，作為區議員的沈建業一早已收到警方發出的不反對通知書，並且他再三向我派定心珠，這次的遊行集會很和平，要我不用過於擔心。
 
與萬喜初次見面，瞧見他建碩的身型、一身古銅色的肌膚，加上他又是原居民，於是我先入為主以為他是那些典型的圍頭佬，因為享有丁權這種不平等的待遇，是一名飽食終日、無所用心，每天把心神都放在嫖賭飲吹的紈絝子弟。
 
可是與萬喜深入交談後，才知道他與Humphrey同是港大的同學，不過他不是唸醫，而是唸法律的，而且他還對我說他的大伯是獻世派的議員萬歷，由於萬歷沒有子嗣，所以把萬喜這姪兒視如己出。
 
我不禁訝異道：「但係你有丁權，反而讀law…我仲以為你會讀bba添。」
 




萬喜臉上展現出一個爽朗的笑容，道：「我知你想講乜，我同屋企人享受緊依個不平等嘅待遇，去讀law好諷刺，之前都有人笑我係咪因為享有依個與生俱來嘅特權，所以就繼續去鑽研法律嘅漏洞，希望喺依方面得到好處，唔怕老實同你講我無用到原居民嘅福利，甚至好想政府廢除依樣已經過時嘅不平等待遇。」
 
我聞言有點錯愕，同時亦對萬喜生出好感。
 
萬喜續道：「其實我好欣賞成皇志你同埋自強會，初時我喺吳林紫娣嘅校園報得知你嘅事跡，後嚟又從Humphrey口中知道你更加多嘅野，我好欣賞你嘅重情重義，同埋不畏強權，你面對黑社會依啲惡勢力嘅打壓，無畏無懼敢於同佢地鬥智鬥力，作為會長嘅你又會先顧慮到其他人嘅安全，然後先考慮到自己，你係一個值得信賴嘅領袖，我覺得你同自強會都好適合我。」
 
萬喜的誇讚讓我有點不好意思，我道：「之前聽陳依官講，上次倒數晚會多得你袖元朗帶二百名學生嚟支持我，真係唔該晒你。」
 
萬喜道：「上次嗰二百名學生都係你嘅支持者，我只係同佢地講你需要人去撐場，或者你自己唔知道，你嘅事跡已經喺中學裡面流傳緊，成為學生嘅傳奇。」
 




或者是我臉皮嫩的緣故吧！每次聽見這種程度的讚賞，我總是會感到不好意思。
 
萬喜續道：「其實我覺得你啲歌幾好聽，你幾時會再出ＣＤ，到時我會買十隻，唔係呃你啊！你第一隻碟我都買咗十隻，自己要兩隻，其他派晒出去。」
 
我想起現在停滯不前的事業，苦笑道：「依層…我諗都唔會咁快喇！」
 
萬喜有一位妹妹叫萬黛，萬黛今年十五歲，一身健康的小麥色肌膚，臉上有些雀班，以女生來說，她的身型算得上高挑，樣貌亦稱得中上，當然與楊鳳瑤等人有一段距離，所以當她瞧見楊鳳瑤等人很是雀躍。
 
萬黛牽著管佳莉的手，喜道：「妳係咪管佳莉姐姐啊？估唔到妳真人咁靚。」
 




直爽率真的萬黛發自心底的由衷讚嘆，讓臉嫩的管佳莉兩頰昇起了一片紅暈。
 
萬黛用雙手握著布正麗的手，興奮道：「妳係咪布甸姐啊？我一直視妳為偶像，雖然聽啲人話妳又食煙又講粗口，但係妳又靚又勇敢，我真係好崇拜妳啊！今日見到妳我真係好開心，其實妳係咪好鍾意食煙同講粗口架？」
 
布正麗莞爾道：「我戒咗煙架喇！粗口都講少咗好多。」
 
萬黛一一握過布正麗、呂靜宜、楊鳳瑤、宛琳珊的手，最後她道：「聽講吳林紫娣葵涌校有吳林六美，但係點解得五個嘅？柳豔，佢喺邊啊？」
 
我聞言神色有點傷感，布正麗道：「柳豔佢去咗台灣生活，之前我撞過佢，佢生活得唔錯。」
 
萬黛噘起嘴巴，道：「真係可惜喇！仲以為有機會可以見晒吳林六美添。」
 
萬喜摸了摸萬黛的頭，道：「吳林六美裡面其中五個都畀你摸過手仔，妳講出去實羨慕死好多人啊！」
 
萬喜轉向宛琳珊五人，道：「唔好意思啊！我個妹聽咗妳地嘅事跡，好仰慕妳地，所以見到妳地就熱情咗啲，希望妳地唔好怪佢啦！」




 
五人對萬黛這熱情的小妹妹並沒有任何反感。
 
萬黛儼如開籠雀一樣，繼續道：「嗰日你地入嚟元朗，我帶你地周圍去食，周圍去玩吖！」
 
阿興的態度與吳林五美相反，他瞧見萬黛只是遇他們初次見面，便裝作很熟絡似的，不禁有些不高興，戲謔道：「聽人講你地元朗入面有好多牛嗰喎，妳係咪騎牛返學架？」
 
萬黛想了想才道：「我住嗰頭都有牛架，不過我無騎牛返學，乜你識啲元朗人騎牛返學咩？」
 
正當阿興打算繼續嘲諷的時候，萬黛問道：「小朋友，睇你年紀好少仲細過我，你點稱呼啊？」
 
萬黛喚阿興作小朋友，阿興不禁有點氣結，他用拇指指向自己道：「我係現役自強會第二高手，未來穩坐自強會頭號猛將嘅寶座，我叫…奔雷虎…成家興。」
 
中二學生的阿興無疑有一點中二病，蔣天誅喚他作老虎仔，他覺得不夠霸氣，於是自封一個較霸氣的外號。
 




萬黛聞言大喜，立時握著阿興的手，道：「你就係成皇志嘅細佬阿興？我有睇自強會嘅校園報，兩年前嘅八座事件，你仲係一個小六生已經敢同啲黑社會對抗，真係好英勇啊！換著係我，如果遇到啲咁惡嘅黑社會一定嚇死啊！」
 
除了媽媽和阿婆這些長輩外，阿興從未牽過女孩子的手，萬黛這麼親熱地握著他的手，讓他有種異樣的感覺，心跳為之加速、耳根亦有點發燙，臉孔紅得宛如一個紅蘋果一樣，他的視點稍為上移，仰視萬黛的臉蛋，萬黛淺笑盈盈的瞧著自己，剛才對她的煩厭感一掃而空，取而代之是一種他難而言表、朦朦朧朧的感覺。
 
＊＊＊
 
儘管沈建業一再向我強調這次遊行是非常安全，可是我還是有些憂心，於是致電給房侍農，希望他可以提供協助。
 
我致電給房侍農，對他說明了這個狀況，他給了一個在元朗執勤姓許的警員的電話給我，說有什麼疑難可以去找他。
 
最近我與房侍農較少聯絡，因為有事情困擾著他，如果不是有事，我也不想去打擾他，他有個同屬梨木樹警署叫阿仁的同袍在執勤時被槍殺，直到現在仍未能把兇手捉拿歸案，他與阿仁的感情很要好，所以直到現在他還是很難過。
 
我從未來的２０１６年回到這個世界，我知道那個槍殺阿仁的兇手，就是被稱為魔警的秦漢滔。
 
當時，我以睡仙報夢的方式，向房侍農透露殺死阿仁的兇手就是魔警秦漢滔，於是房侍農立時把秦漢滔帶回警署調查，房侍農質詢對方在阿仁被殺的時候在什麼地方？秦漢滔說當時自己獨自在荃灣一間卡啦ＯＫ作樂，於是房侍農前往上址調查，翻查了閉路電視，當時秦漢滔在案發時候果真在那所卡啦ＯＫ消遣。




 
之後抽取了秦漢滔的ＤＮＡ做化驗，並與遺留在兇案現場口罩上的ＤＮＡ作出對比，發現兩者的ＤＮＡ並不吻合，亦即是沒有證據證明秦漢滔就是殺死阿仁的兇手。
 
當我得知這個消息時，我心裡的震驚可想而知，秦漢滔怎麼可能不是兇手？當時傳謀一致口誅筆伐，冠以他魔警的稱號，又說他愛嫖愛賭，又喜歡出風頭，把他塑造成一個十惡不赦的大魔頭，這是因為我引起的蝴蝶效應改變了原來的結果？還是秦漢滔根本就不是殺死阿仁的真正兇手？在我那個時空，秦漢滔所涉及的三宗案件均存在著不少疑點，加上死無對證，究竟真相是怎樣一回事？
 
其實我對秦漢滔的印象都是透過報紙、電視得知，而且這三宗案件的訊息量太豐富，我連這三宗案件發生在何時何日也不記得，不然我一早便向房侍農提及阿仁被殺的子，讓對方可以及早防範，避過一劫。
 
雖然我也很替房侍農感到難過，但是既然秦漢滔有不在場證據，我對房侍農的幫助有限，查案一事還是交由他們警方去調查吧！
 
＊＊＊
 
今天，在自強會新的大本營裡，我與一眾吳林紫娣的舊會員聚集一起，傾談前往元朗的事宜。遊行的日子定在星期日，由正午十二點開始，整個過程大概兩至三個小時，之後的時間萬喜與萬黛會帶我們到處去吃吃玩玩，所以自強會的成員大都把這次遊行視為郊遊。
 
朱思遠擦拭著相機，自語自言道：「我身為自強會校園報嘅特約記者，遊行嗰日一定要影多啲靚相，放上校園報上面。」
 




朱思遠看到矮仔文把玩著手中的魚杆，不禁問道：「喂，矮仔文，你做咩啊？」
 
矮仔文道：「之前萬喜話元朗有好多魚塘，魚塘裡面有好多魚，我諗住帶定枝魚杆去釣魚，之後去酒樓食晚飯嘅時候，叫酒樓蒸咗佢。」
 
朱思遠愕然，道：「但係魚塘裡面啲魚係啲村民養嗰喎！你捉咗佢地啲魚，真係唔驚佢地打你咩？」
 
矮仔文強辯道：「個魚塘咁多魚釣佢幾條鬼知咩？加上啲魚有得式認嘅咩？」
 
朱思遠瞧見飯桶武在組裝氣槍，不禁好奇心起，問道：「嘩！飯桶武，你仲咩啊？」
 
飯桶武把氣槍瞄在空處，道：「依把係生化２嘅沙漠之鷹，我用咗幾年利是錢先買到，星期日入元朗，實有好多蛇蟲鼠蟻可以畀我練靶。」
 
萬季常打量了四周，突然道：「我地自強會嘅勢力發展得越嚟越快，越嚟越多人才加入我地自強會，文光義同埋萬喜都係可以獨當一面嘅人才。」
 
矮仔文聞言瞧著萬季常，道：「嗯，嗰個文光義好有腦、同好有眼光，自強會用咗佢嘅提議，即刻有飛躍性嘅成長，我地之前就係缺乏咗依一類型食腦嘅軍師，所以就算有我同飯桶武依啲萬人敵猛將喺到，都係無用武之地。」
 
萬季常訝然道：「食腦嘅軍師？陳依官唔算咩？」
 
矮仔文搖頭道：「之前自強會畀湯仲謀搞到亡過一次黨，陳依官最多都只係孫乾、麋竺咁嘅水準，搞下外交都仲可以，但唔係丞相嘅材料。文光義就唔同喇！佢識好多野、啲橋又得，自強會包括陳依官在內，好多人都好服佢。」
 
萬季常續道：「等等，你頭先話自己係萬人敵？你當你地係關羽、張飛啊？」
 
飯桶武點頭道：「自強會未成立嗰陣，會長已經同我地情同手足，我地對會長都係一條心，忠心不二。」
 
萬季常指著自己道：「你地係關羽、張飛，咁我咪係趙子龍？」
 
飯桶武搖頭，道：「尚興國先係趙子龍，萬喜依啲可以獨當一面嘅人才就係錦馬超。」
 
萬季常訝道：「咁五虎將咪得返黃忠畀我揀？」
 
矮仔文提議道：「或者你可以揀做魏延。」
 
萬季常搖頭道：「魏延係反骨仔嚟，我對會長嘅忠誠一定唔輸畀你地兩個，我唔要做魏延。」
 
矮仔文道：「一係就老餅、一係就反骨仔，兩個畀你揀一個。」
 
萬季常想了想，恍然道：「等陣先，仲有姜維畀我揀，我就做姜維啦！姜維依啲文武雙全嘅人才同我好似，做姜維都唔錯喔！」
 
我從２０１６年的時空回到這裡，經歷過數次大型社運，自估應該比在座的人，更認識一個公民應有的權利，於是我問道：「你地其實對今次嘅遊行有咩意見同睇法？」
 
管佳莉瞧了瞧眾人，然後道：「我地今次唔係好似同之前嗰幾次遊行一樣，舉住啲標語一邊行一邊叫口號咩？」
 
我道：「如果我地走出嚟之後，當權者都係扮聽唔到，又或者無視我地嘅訴求呢？」
 
管佳莉聞言為之語塞，片晌才道：「咁樣我地都係無辦法架！」
 
Humphrey道：「我喺大學都參加過唔少不同形式嘅集會同遊行，正所謂羅馬都非一天可以建造，唔可以祈求一次嘅遊行示威，就可以令對方作出好大嘅改變，應該持之以恆繼續堅持落去。」
 
我道：「如果一直堅持依種抗爭方式，當權者可能會覺得你地威脅唔到佢，嚟個充耳不聞，咁又應該點呢？係繼續用依種方式堅持落去？抑或將行動升級？」
 
楊鳳瑤聞言，倒抽一口涼氣道：「行動升級？即係要去硬碰？之前我睇外國啲關於示威嘅新聞，啲示威者又用武器同啲警察打、又去放火燒車胎，我隔住個電視睇到都覺得驚，如果我喺現場實嚇死啊！」
 
呂靜宜插言道：「我喺英國兩年，都參加過嗰邊嘅示威遊行，第一次見到依啲場面都好驚，但事後啲示威者同我地講返，放火只係防禦，如果啲防暴警察衝到埋嚟會見人就打，對其他示威者造成危險。其實相比起示威者嘅暴力，政府使用嘅制度暴力仲恐怖得多，佢地一個錯誤嘅政策隨時會害咗成千上萬嘅市民，而佢地做出依啲決定係唔需要負上法律嘅責任，最多都係下台，而示威者就唔同，示威者作出依啲激烈抗爭，係要負上法律責任架。」
 
我聞言心想：「呂靜宜喺英國依個民主國家生活咗兩年，自然對普世價值與公民嘅權利有更深入嘅認識，眼界亦都變得寬闊。」
 
布正麗點頭附和，道：「初時我去到台灣，睇電視見到啲議員喺議會到打交，都嚇咗一跳，因為議會一直畀我嘅印象都係一啲著到好斯文嘅人去開會嘅地方，之後了解多咗，我覺得一條惡法嘅通過，雖然無打交嚟得咁有…依個視覺嘅衝擊，但係佢嘅禍害比起打交要嚴重幾萬倍。」
 
楊鳳瑤搖頭道：「我去咗日本讀書咁耐，啲人都唔會講政治，可能日本人一向都係較為拘謹。」
 
經過一番詳談，我對他們的政治取態已經有初步的了解，我道：「當然我就唔贊同主動去使用暴力，但當受到攻擊，我地就無可避免用到依啲方式去保護自己同埋身邊人。」
 
布正麗問道：「成皇志，你覺得我地今次去元朗遊行會有危險？」
 
我安撫道：「你地放心啦！沈建業沿途安排咗糾察隊，房侍農畀咗當區警員嘅聯絡電話我，有咩事可以搵佢幫手，而且我地只係去遊行，又唔係入去做啲咩。韓軍話晒都叫做鄉郊會主席，有頭有面，佢最多唔聽我地講，如果佢明目張膽去對付我地，對佢都唔會有好處。」
 
陳依官點頭同意，道：「我地遊行嘅人數有成千人以上，又有警察維持跌序，韓軍就算唔滿意我地反對佢，都未至於公然撕破臉皮去對付我地。」
 
我道：「嗱！唔單止我咁講，依家連陳依官都咁樣講，你地可以放心啦！」
 
話雖如此，但其實我對星期日進入元朗遊行一事感到憂心忡忡。
 

=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl