<第叄期實體書,經已有售>今年我三十三歲,回到了1998年 (校園、穿越、奇幻): Chapter　１０９　陰謀（中）

Chapter　１０９　陰謀（中）
 
現在已經有六間學校成立了自強會的支部，當初我並沒有想過自強會會發展成現在的規模，而且還涉及到拉票站台的政治層面上。隨著時間過去，將來的自強會變成一個怎樣的組織呢？我也很期待。
 
自強會今後的發展道路還是容後再想，迫在眉睫的問題，還是四個月後的會考。我透過自強會得到了體育科的筆記和Notes。
 
昨晚我到了安蔭的文具店要他們替我影印，店員對我說因為他們差不多打烊，提議我明天再來，我把筆記和Notes交給他們，道：「不如我擺低，聽日中午嚟攞啦！」
 
午飯的時候，我沿著斜路向安蔭的方向走去。
 




當我走過迴旋樓梯，到達連接安蔭街市的天橋時，有五名把頭髮漂染成各種顏色的臭飛迎面而來，其中兩人是朱斌仔與湯仲謀。
 
當我瞧見他們時，他們同樣發現我。
 
沒有理由在他們發現我的情況下掉頭，這樣會顯得我害怕他們，而且在這麼多學生經過的地方他們沒理由對我不利吧？可是他們突然在這裡出現，目標好像是我？那麼還是逃走較好？
 
就在我三心兩意之際，他們已經把我包圍住。
 
湯仲謀現出得意的笑容，道：「ＨＩ，我地好耐無見喇！」
 




我環視他們一眼，最後視線回到湯仲謀身上，道：「你想點啊？」
 
湯仲謀瞥了橋下一眼，輕聲道：「依個高度，人跌落去，唔知會唔會死呢？」
 
我聞言一驚，道：「你咁講咩意思啊？依到咁多人。」
 
湯仲謀嘿嘿一笑，道：「你驚啊？」
 
此時，有人喊道：「喂喂喂！你地喺到做咩啊？」
 




我循聲看去，救星來了，來者赫然是房侍農。
 
房侍農走過來，推開了湯仲謀，道：「仲咩啊你？幾個圍一個，想打人啊？」
 
湯仲謀高舉雙手，笑道：「房沙展，我見到舊朋友，諗住聚下舊啫！唔係咁都犯法啊？」
 
「聚舊？同你有親啊？聚舊？」房侍農捏住其中一名臭飛的一束頭髮，道：「做咩將個頭染青色啊？」
 
「阿蛇，我依啲青頭仔，緊係染青色架啦！」
 
房侍農拍打了那名臭飛的頭一下，道：「你個死臭飛係青頭仔？講今日啊？」
 
朱斌仔道：「房沙展，依到咁多人睇住，你唔好郁手郁腳喎！」
 
「咩啊！咁多人睇住，你驚啊？位位身份證，無就全部跟我返差館。」




 
此時，陸續有人圍觀，房侍農拿著朱斌仔的身份證道：「你叫咩名？」
 
「房沙展，唔好玩啦？」
 
「邊個同你玩啊？阿ｓｉｒ依家問緊你。」
 
「朱—斌—仔。」
 
其他圍觀的人聞言忍不住笑，朱斌仔怒目而視，那些人便別過頭去。
 
房侍農道：「邊個賓啊？賓洲個賓啊？」
 
圍觀的人又不禁喞一聲笑了出來。
 




「係文武斌啊！阿ｓｉｒ。」
 
「點解你老豆幫你改過咁嘅名嘅？佢好憎你架？」
 
朱斌仔怒道：「咁你去問我老豆囉！」
 
房侍農冷笑一聲，把身份證交回給朱斌仔。
 
房侍農拿著湯仲謀的身份證查看，道：「湯仲謀，你老豆叫咩名啊？」
 
湯仲謀臉色一變，問道：「阿ｓｉｒ，仲咩要咁問啊？」
 
「唔同得人講架？」
 
「湯文臺。」




 
「咁你阿媽呢？」
 
湯仲謀臉色變得鐵青，道：「阿ｓｉｒ，依家我犯咗咩事？點解關我阿媽事啊？」
 
「唔駛咁激動嘅？只係我聽聞湯文臺有幾個老婆，想問下你係湯文臺邊個老婆生啫？」
 
湯仲謀睨了房侍農一眼，氣得嘴唇發顫，一言不發。
 
「你唔記得自己阿媽叫咩名，都唔需要咁樣嘅。嗱，還番張身份證畀你。」
 
房侍農把身份證交還給湯仲謀的時候，故意提早放手，身份證掉在湯仲謀面前。
 
「哎呀！乜咁唔小心啊？咁都攞唔穩？」
 




湯仲謀一言不發從地上撿起了身份證。
 
房侍農搭著我的肩膀離去，道：「阿志，去飲茶，我請。」
 
湯仲謀等人瞪著房侍農漸漸遠去的背影，朱斌仔道：「成皇志個仆街仔，有死差佬護住，我地郁唔到佢架！」
 
湯仲謀狠狠地道：「邊個話架？一個沙展仔，我怕佢有牙。死差佬，你玩鳩我？我整撚死你都得啊！」
 
我先到文具鋪取回筆記和Notes，然後我們到了安蔭茶樓品茗。
 
房侍農道：「如果唔係我咁啱嚟搵你，你都好大鑊喎！」
 
「都係啊！今次全靠你咋！咁依餐我請啦！當係多謝你幫咗我。」
 
「唔得，依餐話明我請架！」
 
「咁多謝喎！」我問道：「係呢！今日嚟搵我做咩啊？」
 
「無，咁耐無見，咪嚟搵下你囉！」
 
自從那次歐冠決賽後，我們差不多有半年沒有見面，我問道：「最近點啊？有無賭波啊？」
 
房侍農滿臉堆歡道：「有啊！我依家無爭人錢，個戶口變番正資產添。」
 
「嘩！咁真係恭喜你喎！唔怪知得咁好嚟搵我飲茶啦！原來你轉運。」
 
房侍農一臉神秘地靠向我，他壓低聲音道：「我夢見師父，佢畀貼士我買波，我先贏錢咋！」
 
我聞言愣住了，片晌才道：「你講咩話？」
 
房侍農重覆道：「我話我發夢見到師父啊！佢畀料我，我跟佢買，最後贏錢啊！」
 
這次我聽得很清楚房侍農的說話，我很懷疑他發現了我騙了他，現在裝瘋賣傻來報復。
 
房侍農見我默不作聲，他道：「咩啫！你好似唔信我咁嘅，我都係睡仙陳搏嘅弟子，淨係得你可以夢見師父，我唔可以咩？師父佢老人家擺明偏心啦！對你就波膽都講埋畀你聽；對我就淨係叫我買上盤定下盤，個賠率差好遠架！」
 
我瞧著房侍農，他應該沒有那樣的智慧去拆穿我的謊言後，再這麼有耐性在我面前裝蒜，我認為他精神失常和撞邪的機會會大一點。
 
我道：「係咪你最近唔夠瞓或者壓力大啊？不如放個假，出去散下心啦！」
 
房侍農有點惱怒，道：「咩啊！你做乜唔信我啫！我真係夢見師父架！佢除咗畀賭波貼士我，仲同我講咗好多野添！」
 
我打量了房侍農一眼，他的精神狀況並沒有異常，模樣也不像撞邪，還是順從他的意思較為好，誰叫我之前對他編了這麼大的謊言。
 
「我信，咁師父佢老人家同你講過啲咩喔！」
 
房侍農神色凝重道：「師父佢老人家，話我嚟緊有一個劫。」
 
我聞言獃了獃，道：「師父話你有一個劫，咁你頭先仲玩到朱斌仔同湯仲謀咁盡？佢地依家好似好疊馬，可能你嘅劫就係佢地。」
 
房侍農搖頭道：「佢地我就唔驚啊！我最驚係無咗份工，師父話我嘅仕途嚟緊有好大嘅波折。我好驚無咗份工，我知自己咩料，人又老，女又無，字又唔識多個，出到去可以做啲咩喔？唔通做食蕉畀人玩咩？」
 
瞧著房侍農，我感到他人到中年的困惑，到了他這個年齡，事業沒有突破、缺乏才幹、錢亦不多的單身寡佬。警察這份工作不單是維持他生計的職業，而且還付予他尊嚴和人生價值，如果失去了這份工作，他便失去一切。
 
我感到他的徬徨不安，拍了拍他的肩膀安慰道：「做咩啫？師父話你份工有波折，即係有低有高囉！之前師父佢同我講過話你膊頭有花架嘛！唔好自己嚇自己啦！」
 
房侍農點了點頭，道：「最近警署有人事變動，有個新總督察調咗過嚟，可能我諗多咗啦！」
 
「係囉！你諗多咗啫！」我試探道：「係呢！師父同你講咁多野，你係咪成日都夢見佢架？」
 
房侍農的神情有點尷尬，他道：「其實成件事係咁嘅…自從嗰次歐冠決賽後，我就無再夢見師父，直到差不多九月英超開鑼嗰陣，我想師父過啲料畀我，又諗起個人生大劫，聽朋友講有個識睇人查克拉嘅師父好似好準，於是我就…嗱，阿志，我知你想講乜，你覺得我搵第二個師父睇相，覺得我背叛師父…」
 
我斷言道：「嗰個幫你睇相嘅係咪白頭髮、平頭裝、肥肥地嘅老人家，佢仲係姓鄧嘅添！」
 
房侍農膛大雙目，道：「阿志，乜你都識鄧翁嘅咩？」
 
之前花蕊展後，我們一伙人去賀呂伯母新鋪開張，在場有一名叫鄧翁的老人說被活佛開了天眼，自稱可以看到人身上的查克拉，從而推斷那個人的運程。
 
我道：「之前有一面之緣啫，你繼續啦！」
 
房侍農續道：「鄧翁睇完我個相之後，佢話我身上嘅查克拉好暗淡，嚟緊應該有個劫，但佢又睇到我嘅眉心輪有另一股外來嘅查克拉護住我，身邊應該有貴人相助。之後佢將我嘅姓名同時辰八字抄低，嘗試聯絡活佛。一星期之後，佢同我講話活佛肯見我，要我盡快去泰國，咁難得活佛肯見我，我即刻攞三日假飛去泰國啦！仲順便去金魚缸嚟返個Body massage，嗰到啲泰妹正到呢！下次真係要帶埋你去。」
 
我再次斷言道：「等陣先，你話活佛肯見你？個活佛係咪西藏大喇嘛啊？」
 
房侍農愕然道：「除咗佢之外，仲有其他活佛咩？」
 
我搖了搖頭，道：「你繼續啦！」
 
房侍農道：「我見到活佛，當我想將我嘅情況同佢講嗰陣。佢將食指放喺嘴唇上面，然後示意我跪低。好奇怪喎！當時我諗都無諗就跪咗喺地，然後佢將隻手放喺我頭上面。無幾耐佢就笑咗笑：『原來係咁。』之後我感受到有一道力衝向我個頭到，我當時有啲頭暈，差啲瞓低，有好彩兩個喇嘛即刻扶住我，然後活佛同我講：『你有你自己嘅信仰，身邊有貴人相助，只要多啲行善，自然可以逢凶化吉。』」
 
說到這裡，房侍農呷了一口茶，再道：「之後我返嚟香港，無幾耐我就夢見師父佢老人家，師父佢同我指點迷津，我跟住佢嘅指示買波，真係場場都中。依啲都唔係最神奇啊！之前有個好耐無見嘅朋友，喺街撞返，我地去食飯，佢話喺端士搞緊隻專治千年蟲嘅杜蟲藥，叫我夾廿萬，每個月可以收番二萬蚊專利金。嗰晚，我發夢見到師父，佢叫我唔好信嗰個人，話佢係騙棍。過咗一排，聽其他朋友講條友呃呃埋埋，呃咗成五百萬，最後著咗草，搵唔到人。」
 
我聽畢有點哭笑不得，心想怎麼初時我用來欺騙房侍農的謊言，變成了現在的境況，那個睡仙陳搏只是我吹噓出來，現在居然經常在房侍農的夢中出現，為他指點迷津。
 
房侍農道：「阿志，你真係我命中嘅貴人嚟，唔知點解同你講完成件事之後呢！我個人真係舒服咗好多啊！」
 
「係咩！咁你得閒就多啲嚟搵我飲下茶囉！不過你請喎！」
 
＊＊＊
 
一向器量狹窄的湯仲謀對於被房侍農戲弄一事懷恨在心，他向王公覆要求出動刀手組把房侍農幹掉。
 
王公覆不允，道：「謀仔，殺警好大件事，我地依家係要侵佔數字幫嘅地盤，而唔係意氣之爭。」
 
湯仲謀暗恨，心想：「就算侵佔到數字幫嘅地盤，都係屬於湯伯符，對我一啲著數都無。」
 
湯仲謀找了好友阿謹訴苦，道：「個死差佬咁樣玩我，依啖氣我點都吞唔落，而且嗰個成皇志一日有個死差佬護住佢，我都唔可以搞到佢。」
 
阿謹想了想後，便道：「阿湯，你想報仇有好多方法，唔需要隊冧個差佬喔！好似整到佢調職或者停職，一樣可以達成你嘅目的。」
 
湯仲謀恍然，道：「係喎！哈哈，點解我之前諗唔到嘅。」
 
阿謹道：「唔係你諗唔到，而係有啲野令你蒙蔽；有啲人令你焦慮。」
 
湯仲謀明白阿謹的說話，道：「阿謹，我知道自己做緊咩？你放心啦，我唔會畀依啲野影響到正事嘅！」
 
阿謹道：「阿湯，從來感情方面最容易影響一個人嘅判斷。」
 
湯仲謀笑道：「阿謹，你唔係唔知我嘅工作做啲咩啊？從來只有我玩女人，無女人可以玩到我。」
 
「阿湯，善泳者溺啊！」
 
湯仲謀笑道：「哈哈，阿謹，我知你讀得書多，唔好再喺我面前拋書包啦！」
 
既然湯仲謀不願繼續談論這問題，他亦只好轉移到別的話題上，他道：「收到風最近嚟咗個新總督察。」
 
「佢叫咩名啊？」
 
「好似叫羅家環。」
 
湯仲謀聞言笑道：「哦！原來係佢。」
 
「你識佢？」
 
「之前喺出面幫蛀牙嗰陣，同佢見過幾面。」
 
「佢好麻煩架？」
 
湯仲謀點頭，然後嘴角上揚道：「佢同我地一樣，我地係無牌爛仔，佢就有牌爛仔。」
 
阿謹瞧見湯仲謀的笑容，不禁問道：「阿湯，你好似好開心咁嘅。」
 
湯仲謀笑得更加開懷，道：「房侍農同成皇志都就嚟死咯！我點會唔開心啊？」
 
阿謹詫異道：「你嘅意思係？」
 
湯仲謀笑道：「阿謹，你書就讀得多過我，但係我睇戲就睇得多過你，你有無睇過畫哥套吳磊落探長同跛浩啊？」
 
＊＊＊
 
正所謂新官上任三把火，羅家環總督察調任到新環頭不久，便領著一位心腹探員前往８座。
 
他聽聞數日前數字幫與真技安火併，數字幫獲勝，現在數字幫的聲勢蓋過了真技安。他親自前往要摸一摸對方的底蘊外，並且給予對方一個下馬威。
 
探員道：「大ＳＩＲ，其實探口風，我自己一個人嚟得啦！你唔需要親自嚟喎！」
 
「鍾仔，啲古惑仔好古惑架！我唔親自嚟，你搞唔掂架！」
 
羅家環兩人長驅直入數字幫的大本營，向在場的廿多名臭飛表明身份。
 
鍾仔喊道：「依到邊個話事架？」
 
在場的臭飛紛紛把視線轉到朱斌仔身上。
 
對於突然有兩名探員闖入，四肢發達的朱斌仔缺乏應對的能力，難道要下令其他人狠揍兩人一頓？先不說其他臭飛有沒有這種膽量，就算他們有種，後果都不是他們能夠承擔的。
 
朱斌仔把視線轉到湯仲謀身上，希望對方可以提供協助。
 
湯仲謀鎮定道：「兩位阿ＳＩＲ，有啲乜野可以幫到你地？」
 
羅家環覺得湯仲謀有點眼熟，他道：「你係依到話事人？」
 
湯仲謀瞥了朱斌仔一眼，才應道：「都可以咁講。」
 
涉及到幫中的地位問題，朱斌仔很想澄清他才是這裡的真正話事人，可是口才麻麻的他缺乏和警方打交道的經驗，他害怕自己稍一不慎隨時墜進了對方的圈套亦不自知，所以他樂得湯仲謀去替他出頭。
 
鍾仔喊道：「係就係，唔係就唔係，咩叫做都可以咁講啊？」
 
湯仲謀知道羅家環的地位比鍾仔要高，他沒有理會鍾仔的叫喊，他瞧著羅家環反問道：「兩位阿ＳＩＲ，唔知今日嚟有咩貴幹呢？」
 
羅家環打量了四周一眼，道：「睇依到都無攞酒牌架啦！聽講依到仲會開賭、有架步、附近仲有啲道友追龍。」
 
儘管羅家環說得兇狠，但湯仲謀思忖如果對方真的來拉人封艇的話，便不是兩個人前來說天說地，而是一隊人前來不由分說去行動。
 
湯仲謀道：「兩位阿ＳＩＲ，不如我地行入去傾下。」
 
鍾仔推了湯仲謀一把，道：「依家你話事啊？」
 
「鍾仔，我地係警察，唔係爛仔，文明啲。」羅家環道：「靚仔，阿ＳＩＲ要盤你，你最好老老實實回答阿ＳＩＲ嘅問題。」
 
湯仲謀把羅家環和鍾仔領到原本屬於孖腸的辦公室內，並把門關上。
 
湯仲謀一早已透過阿謹知道羅家環的底細，原本他還煩惱用什麼途徑與羅家環見面，豈料他會突然找上門。
 
湯仲謀知道每區的警察就如sales一樣，都要跑數，不過一般sales跑數是銷售額；而警察就是破案率。正直的警察就是在罪案發生後，積極去調查案件，尋找線索，再抽絲剝繭一番，把真兇繩之以法。可是有一類警察會選擇與黑社會合作，沒有罪案發生時，會叫黑社會製造罪案，並且交人出來破案；有罪案發生時，找不到兇手，亦會叫對方交人，務求儘快破案，而這類警察亦會包庇對方、提供情報作為交換的條件，形成一種互利共生的生態。
 
羅家環慣常的技倆是後者，他在駐守西九龍的時候，便經常與數字幫來個警黑合作，得到數字幫的協助，他的破案率很高，職位從而扶搖直上。可是當蛀牙被捕，數字幫元氣大傷，未能如往昔般協助他，他的破案率大幅度下降，最後因為各種問題，他被調到這不太受上頭重視的分區。
 
仕途受挫的他，很想向上級證明自己的能力，他很渴望能夠風風光光地回到大區的警署。
 
他沒有吸取教訓，去腳踏實地當一個好警察，而是去把之前在西九龍的那一套照本宣科搬過來這裡運用。
 
既然之前的那套可行，誰又願意這麼辛苦去查案，最糟的是付出那麼多汗水與心力後，最後一無所得。
 
羅家環裝凶作勢道：「靚仔，數字幫依到有咩架步、大檔、兵器庫，我要你統統話晒畀我聽？」
 
湯仲謀搖頭道：「羅ＳＩＲ，我會同你警民合作，打擊罪案，但係唔係依一種形式。」
 
羅家環聞言有點錯愕，湯仲謀耳語道：「我認為我地可以發展『可持續打擊罪案』，好似羅ＳＩＲ之前係西九龍嗰陣咁。」
 
湯仲謀的說話讓羅家環感到震撼，他詫異地瞪著湯仲謀。
 
辦公室外，朱斌仔與一眾臭飛均屏息以待，他們都不約而同把目光投在辦公室的那扇門上。
 
一向急性子的朱斌仔，在這說長不長說短不短的等待期間，對辦公室內的三人產生了很多負面的臆測，他擔心自己的椅子還沒有坐暖，便遭到警方的打擊。
 
正當朱斌仔因為等待而弄得焦燥不安之際，其中一名臭飛亦同樣缺乏耐性，他問道：「斌仔哥，你知唔知佢地入咗去咁耐傾啲咩野啊？」
 
臭飛的問題就像導火線一樣引爆了朱斌仔的情緒，他揪著臭飛的衣領，發飊吼道：「我都好想有人話畀我知佢地喺入面做咩啊！」
 
就在朱斌仔要毆打那名臭飛，用來宣洩自己惶恐不安的情緒之際，辨公室的門敞開了。
 
羅家環與鍾仔沒有停留，徑自走出了數字幫的地盤。
 
朱斌仔一臉疑惑地瞧著湯仲謀，問道：「阿湯，頭先你地喺房發生咩事啊？」
 
湯仲謀臉上漾出一絲得意的笑容，道：「嗰兩個差佬循例逗下我啫，無乜特別啊！」
 
朱斌仔聞言感到困惑，他覺得湯仲謀對自己有所隱瞞，可是既然對方這麼說，他亦不好意思再追問。
 
羅家環與鍾仔離開了８座，並沒有回到警署，而是到了荃灣的熊貓酒店，他們來到這裡的目的並不是為了查案。
 
他們按照湯仲謀給予的地址找到了一名叫bo bo的廿多歲女子，bo bo為兩人安排了房間。
 
羅家環等待了片晌，一陣敲門聲響起，他打開門，發現一名衣著性感的豔麗女郎站在門前。
 
他讓女郎進門，女郎把門關上，然後把身上的衣物一件一件脫下。
 
他躺在床上斜眼打量著一絲不掛的女郎在他面前扭動著身體，跳著極具挑逗意味的豔舞。
 
女郎走到床上，脫掉羅家環的衣物。
 
兩人玉帛相見，羅家環雙手放在腦後，享受女郎的溫柔款待。
 
他雖然已經成家，有老婆和兩個女兒，可是他並不覺得現在的行為是背叛太太和家庭。畢竟男人在外逢場作戲是天經地義的事情，只要懂得回家，便是盡了丈夫的責任。
 
這時一些往事在他腦海內浮現：
 
某年某月，他在掃黃組工作，在一次放蛇的行動裡，與一名妓女發生了性行為後，才把對方拘捕。他覺得這是搜集證據，證明對方賣淫，並不是只有他才這樣做，他知道有其他同事亦是這樣做。
 
另一次，他在旺角的架步尋歡，點了一名妓女，得知對方拿雙程來港賣淫，完事後便唬嚇對方，如果不在四小時內離開香港便把對方押回警署，結果他連三百元的肉金也沒有給予對方。這次「叫霸王雞」，讓他感到滿足，滿足並不是那區區三百元，而是明明他理虧在先，對方只能一臉無奈去接受，這是特權階級的福利。
 
旁人覺得警察需要比普通市民有更高的道德操守；可是他覺得作為執法者，承擔著這麼大的責任和風險，應該擁有更高的地位和享有更多的特權。
 
由入警校的刻苦操練，到當巡警經歷日曬雨淋、廿四小時輪班、連新年亦要上班的辛酸，除了那份穩定的薪金和優厚的福利外，他覺得警察的權力才是讓他堅持下去的動力。
 
他覺得從前警校教官的訓示已經落伍了。利用黑社會控制該區的秩序，才是有效維持治安的有效方法。這不是墜落，而是警方一直強調的警民合作。
 
他把女郎壓在身下發洩，女郎發出嬌喘呻吟，他不覺得現在是受賄，而是權力衍生出來的某種福利。
 
想到權力這個名詞，他便興奮得射了。

=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl