<第叄期實體書,經已有售>今年我三十三歲,回到了1998年 (校園、穿越、奇幻): Chapter　７８　結黨（中）

 
Chapter　７８　結黨（中）
 
「我地真係好有誠意想你做我大佬架！請你收我地做靚啦！」
 
飯桶武和矮仔文本來是牛辸明的兩大頭馬，後因我伏擊拳佬嫁禍給牛辸明，牛辸明害怕拳佬等人報復，最後要搬家退學。之前有牛辸明罩著，至少數字幫的其他同門，念著大家都是自家人，只是恥笑二人，可是現在牛辸明不知所蹤，其他同門對二人便不留情面，把他們當作出氣袋般玩弄，他們急著找強者庇護他們，恰好各種傳聞渲染下，我取代了朱斌仔，成了吳林紫娣的大阿哥，這樣我便成了他們的終極目標。
 
「哎呀！乜你地咁煩架！你地識唔識聽廣東話架？講極都唔明咁，我講多最後一次，我得一個細佬咋！仲有我唔係黑社會，唔收靚，你地走啦！」
 
矮仔文道：「哎呀！大佬，我地有眼不識泰山，之前唔知你咁猛料，夠膽打朱斌仔，依家唔跟你，我地真係唔知跟邊個喇！」




 
飯桶武附和道：「係啊！依家我地成日畀人恰，好慘架！有你照我地，無人敢再恰我地。」
 
我瞧了兩人一眼，如果他們成為我的手下，我只是多了兩個包袱，我沒有那麼多閒情與時間去照料他倆。
 
我道：「你地畀人恰，點解搵老師求助呢？我真係幫唔到你地。」
 
飯桶武訝道：「吓！同老師講，好樣衰架喎！會被人笑到面黃架！」
 
我搖了搖頭，沒好氣地道：「依啲野隨得你地啦！我仲有好多野做，無時間招呼你地，再見，啊！唔係，都係唔好再見喇！」




 
我把兩人拋在身後，布正麗迎面走來，她先瞥了飯桶武和矮仔文一眼，然後笑道：「我聽到你地頭先嘅對話喇！成皇志，你依家威啦！有人爭住嚟認你做大佬喇！」
 
我嘆了一口氣道：「唉！依家啲人真係睇古惑仔睇上腦，以為加入黑社會好威，做大佬前呼後擁好風光，戲嚟架咋！現實就係經常出入醫院同差館，做黑社會邊到有前途架！唔好彩得罪咗人畀人斬開幾碌扔落海餵魚都有份啊！」
 
布正麗笑道：「不過話時話收嗰兩條友做靚，真係牛辸明先做得出，佢地嗰樣咁 KAI ，做佢地大佬實畀人指住嚟笑。」
 
「咁又唔好咁講，正所謂一張紙巾同一條底褲都有佢地嘅用處。」
 
布正麗哈哈笑道：「你依啲壞鬼書生，滿腦都係諗住點樣整人嘅詭計，鬧人都兜個圈。」




 
「吓！依句說話係出自陞爺啲戲，唔關我事嗰喎！」
 
布正麗話題一轉，道：「係喎！講開又講喔！你打咗朱斌仔一拳，你唔驚佢報復咩？」
 
「驚架！不過唔打都打咗咯！咁可以點喔？」
 
「其實你爸爸識得咁多人，如果可以搵個猛人照你，加上你依家個朵響晒，你真係可以取代朱斌仔，到時…」
 
我斷言道：「痴線，我最憎就係黑社會，妳叫我加入黑社會然後再收靚，咁我同朱斌仔條粉腸有咩分別啊？」
 
布正麗歉意道：「ＳＯＲＲＹ！我只係諗如果你建立到同朱斌仔同樣嘅勢力，佢地就唔敢搞你。」
 
「我明白妳嘅好意，爸爸坐緊監，得番我同阿興兩兄弟喺度，朱斌仔喺附近都叫有啲勢力，要搞我唔係一件難事。」
 




布正麗道：「你話如果唔係黑社會，但係收靚咁得唔得喇？」
 
我聞言怔了怔，道：「布甸，妳可唔可以講多次啊？」
 
布正麗見我神情異樣，她訝異道：「吓！我隨便講吓咋！唔係講下笑都唔得啊？」
 
「唔係，唔係講笑，妳講得好啱！唔係黑社會都可以收靚，而且收靚唔單止唔駛偷偷摸摸，仲可以光明正大咁進行，合情合理合法，連學校都贊成允許。」
 
「吓！成皇志，你傻咗啊？學校點會贊成你晌度收靚啊？」
 
我搖頭笑道：「當然唔係話打正旗號去收靚啦！如果我入紙向學校申請成立一個新嘅學會，搵到負責嘅導師支持，咁就可以晌學校裡面光明正大咁成立一個組織，招募會員。」
 
布正麗聞言先是一呆，然後用力拍打我的肩膀一下，道：「都話你係壞鬼書生嚟架啦！滿腦子都係啲詭計。」
 
我想到成立一個新組織，並不是率領人馬與朱斌仔硬碰爭地盤，目的純粹是自保，我結集的人夠多，讓朱斌仔想對付我的時候多一分忌諱，而且人數夠多，我在校內的耳目會更加靈通，得到更多的情報，更有效預防朱斌仔的小動作。




 
這天，我與呂靜宜、楊鳳瑤、柳豔四人到了金鋒吃午飯，相隔了三個多月，我們再次相約一起吃午飯。
 
呂靜宜向四處打量一眼，訝道：「嘩！因乜事今日咁多同學嚟幫襯啊？」
 
楊鳳瑤道：「靜宜，妳無睇學生會報告板咩？由即日起只要穿著吳林紫娣校服嘅同學光顧金鋒或者寶石都可以得到優惠，之前嗰啲同學仲話學姐做唔到野，學姐就即刻用行動證明畀佢地睇，學姐做依個學生會主席係實至名歸，有能力為同學爭取到權益嘅！」
 
呂靜宜流露出讚賞的目光，道：「學姐，妳真係好厲害，尋日我聽鳳瑤講，話其他學生會嘅幹事同妳唔啱，但係點知今日妳已經幫我地爭取到午餐優惠，學姐，妳尋日自己落嚟搵金鋒同寶石老闆傾架？」
 
學姐的視線轉向我，道：「其實…」
 
我向學姐打了個眼色，示意她不要提及我。
 
我道：「楊鳳瑤今次就講得啱喇！學姐，妳係掂嘅！唔好懷疑自己嘅能力。」
 




呂靜宜點頭道：「講得無錯，我地以凍檸茶代酒，為學姐為我地成功爭取到午餐優惠飲杯。」
 
四杯凍檸茶碰在一起，一些飲料從杯中濺出，楊鳳瑤的手不慎被濺中。
 
楊鳳瑤埋怨道：「死人成皇志，咁大力撞人著杯。」
 
「哈，唔好意思，一時開心得濟，大力咗。」
 
呂靜宜遞了一張紙巾給楊鳳瑤，楊鳳瑤拿來抺拭。
 
我問道：「學姐，妳參加過咁多學會，我有啲野想向妳請教啊？」
 
「哦！你想問我咩啊？」
 
「如果要係學校成立一個得到學校認可嘅新學會，除咗搵一位負責嘅導師，仲需要啲咩野啊？」




 
楊鳳瑤訝道：「成皇志，你諗住成立一個新嘅學會咩？」
 
呂靜宜亦道：「係囉？我之前無聽你講過嘅？」
 
一時之間，我亦不知怎去解釋。
 
柳豔道：「成皇志，你諗住依家成立啊？但係依家都就嚟五月咯！」
 
「吓！唔得嘅咩？」
 
「咁又無話唔可以嘅！不過通常成立學會係由啲老師主導，佢地決定學會嘅性質，然後就係搵其他有興趣嘅同學幫手，成立咗學會嘅老師要對個學會負責，定時定候寫報告畀校長，我就未聽過由學生成立一個學會再去搵老師，另外，一個學會最少要有七名學生參加，依家差唔多學期尾，有興趣加入學會嘅同學一早就參加咗啦！依家要招募會員會好困難，唔夠七個同學參加，個學會唔會得到校長批准，校長唔批，個學會就得到學校嘅資助，亦都用唔到學校嘅設施。」
 
楊鳳瑤插言道：「係啊！之前李老師打算成立中國詩詞學會，但係最後只得一個同學參加，
最後都搞唔成。」
 
「唔，原來成立一個畀學校認可嘅學會比我想像中複雜。」
 
柳豔道：「由於作為學會嘅指導老師需要對個學會負責，所以如果個學會同會入面嘅會員發生啲咩事，佢地都要上身，曾經舞獅學會，有個同學係練習嘅時候跌斷腳，最後搞到好麻煩，舞獅學會被迫解散，轉為飛行棋學會。」
 
呂靜宜問道：「成皇志，你諗住成立咩學會啊？如果有危險性，無老師會肯做你地嘅指導老師架喎！」
 
這個問題我事前亦沒有考慮過，初時我還打算成立一些類似詠春學會、拳擊學會的團體，好讓這個組織有一定對抗性，如果真的成立這些涉及武力的學會，一定沒有老師願意當這個學會的指導老師，難道要成立鬥獸棋學會、大富翁學會？
 
柳豔又道：「況且就快到期終試，啲老師都忙住出考試卷啦！邊有老師會得閒同你成立新學會啊？」
 
楊鳳瑤勸道：「成皇志，你都係放棄吧啦！你要搵個得閒、有熱誠、唔駛兼顧其他學會嘅指導老師，仲要搵到七個人成立學會，邊到有可能啊？」
 
其實對指導老師的要求我還說漏了一點，就是要夠蠢，這些看似苛刻的條件，偏偏有一人完全符合以上的要求。
 
我回應楊鳳瑤道：「唔係喎！我真係諗到一個適合嘅人選喎！」
 
楊鳳瑤訝道：「吓！乜學校裡面真係會有依個人嘅咩？」
 
「咩無啊？我地班主任李老師咪係最好嘅人選囉！」
 
柳豔微微點頭道：「李老師的確好有熱誠，而且佢又唔需要兼顧學會，但係你諗住成立類似中國詩詞學會嘅組織啊？就算李老師肯做學會嘅指導老師，我都驚你都搵唔夠七個人成立學會喎？」
 
我掃視了她們三人一眼，道：「我預埋妳地三個架喇！加埋我四個，再搵多三個都唔係好難嘖！」
 
柳豔歉意道：「我唔單止係學生會會長，仲係紅社副社長，仲參加咗其他學會，成皇志，我諗我真係幫你唔到喇！」
 
楊鳳瑤亦道：「我係羽毛球校隊嘅成員，成日要練習同比賽，我都無咩時間可以參加到其他學會架喇！」
 
呂靜宜道：「成皇志，其實我地都未知你諗住成立咩學會，點樣應承你呢？」
 
我道：「嗯！咁我去搵李老師商量一下先。」
 
之前聽過柳豔的意見，我知道成立一些較為動態的學會，學校應該不會允許，而且亦沒有老師願意支持；但如果成立那些詩詞歌賦學會，我相信亦難吸引到同學參加，要在兩者當中取得平衡是很困難的，所以我另有打算，我的計劃以八個字來概括「欺上瞞下、偷天換日」，這就是為何我看中了李老師的原因，順帶一提這計謀我是受到特區政府說要發展資訊科技為藉口，在港島南區興建數碼港，整個項目最後淪為地產項目的事例啟發。
 
這天放學後，我到了教員室找李老師，請他成為新學會的指導老師，我道：「李老師，之前你諗住成立中國詩詞學會，最後唔成事真係好可惜，我明白你成立依個學會嘅用意係希望提升同學嘅文化修養，同埋可以畀我地學識欣賞中華文學真正嘅底蘊。」
 
正所謂千穿萬穿馬屁不穿，就算李老師本來的目的不是這樣，相信他亦不會否認，這時中國收回香港不久，大多數人都是大中華膠，一同做著中國夢，那些中文科老師更不用說。
 
體形魁梧的李老師，不知是否天生睪丸酮分泌不足，他的聲線和波多野志鈴一樣，都是雞仔聲，瀝瀝鶯鶯道：「無錯啊！成皇志同學，不過最後因為學生人數不足，所以中國詩詞學會都係未能成立。」
 
「李老師，其實你嘅出發點係好，不過依個世代咩都講究包裝，好似依家啲ＣＤ咁，唔再可以淨係一隻ＣＤ加兩頁歌詞就推出市面，至少都要整本歌手嘅相集，再加個精美嘅紙盒，有時仲要送埋ＶＣＤ先吸引到人買。」
 
李老師皺著眉頭，道：「成皇志，你意思係要派ＶＣＤ，先會有同學參加中國詩詞學會？」
 
李老師，你真的有夠蠢鈍，不過不要緊，我就是看中你這一點。
 
我笑道：「打過比喻嘖！我嘅意思係以我依一輩嚟講，聽開四大天王、伊申清依啲流行歌手，你叫我唸古文、之乎者也嗰啲，可能我地連個字點讀都未識，就算識晒所有字，成句加埋又一知半解，而且啲詩詞對於大部分後生嚟講都好老土。」
 
李老師訝道：「係咩，乜原來係咁啊？你講嘅情形，我之前真係無諗到喎！咁你覺得應該點做好呢？」
 
「首先唔好叫咩中國詩詞學會喇！個名太過學術性，啲人會反感架！就叫…就叫自強不息促進同學德智體群美培養孝悌忠信禮義廉恥品格協會啦！個名咁長咩都有，總有一瓣開中嘅。」
 
李老師點頭讚道：「好名，有我地校訓自強不息喺裡面，個學會叫自強不息促進咩會話？」
 
我道：「係自強不息促進同學德智體群美培養…欸！就簡稱自強會啦！」
 
李老師再點頭讚道：「好名，自強會，簡而精！但係…同中國詩詞有咩關係呢？」
 
我搖著頭道：「李老師，其實嗰名叫咩係唔重要嘅！乜你無聽過莎士比亞講過：『玫瑰不叫玫瑰，亦無損其芳香。』中國詩詞學會唔叫中國詩詞學會，唔通就可以講中國詩詞咩？」
 
李老師再三點頭：「有道理，有道理，係我太墨守成規喇！」
 
我亦讚道：「李老師，你真係喺依間學校難得嘅開明老師。」
 
李老師問道：「嗯，改完個新名跟住點啊？」
 
「我認為應該全面革新，我地唔可以再用返以前嗰套啦！太過學術性啦！因為我地依個學會係課外活動嘅一種，我地應該生動啲，加入多啲運動元素入去。」
 
李老師訝道：「吓！詩詞學會點解要加運動入去呢？」
 
「李老師，古時岳飛、辛棄疾、曹操，佢地除咗係文人外，都係傑出嘅軍事家，我地唔可以因為佢地係出色嘅文人，就否決佢地其他方面嘅成就，而且我地加入依啲元素都係希望吸引同學參加嘅手段，我地嘅最終目的係提升同學嘅文化修養，就好似洋務運動咁，中學為體 西學為用，李老師，你明唔明我嘅意思啊？」
 
李老師點頭道：「我明白。」
 
「你真係明白？」
 
其實我開始不明白自己的說話，但不要緊，李老師明白便可以了。
 
「嗯，洋務運動，中學為體，西學為用，我完全明白啊！」
 
我指著李老師，讚道：「李老師，你真係呢…你咁開明，吳林紫娣有李老師喺度，真係同學嘅福氣，但係李老師，我有一樣野要提醒你，向其他同學推廣中國詩詞，從而提升同學嘅文化修養，係一條好艱辛而漫長嘅道路，喺途中我地可能遇到好多困難同挫折，甚至開始互相懷疑，但係請你相信我同埋相信你自己…嘅眼光，只要我地抱住『革命尚未成功，同志仍需努力』嘅精神，我一定可以克服重重困難，達到我地嘅目的嘅。」
 
話畢，我偷偷打量著垂首沈思的李老師，心想不知道我剛才那番話會不會太過火呢？
 
片晌，李老師抬起頭來，眼中迸射出鬥志，他緊握著我的肩膀，喜道：「成皇志，點解咁遲先畀我識到你啊？」
 
李老師握得我肩膀有點痛，我道：「吓！李老師，其實你中二嗰陣你已經教緊我中史，你無理由唔記得嗰喎？」
 
「你係我搵咗咁多年嘅知音，我一生嘅宗旨就係宏揚中華文化，但係我教咗咁多年書，發現依一代嘅學生係對中華文化完全無興趣，啲學生上堂寧願瞓覺都唔聽我講書，之後我都開始心淡，失去咗熱誠，依家我遇到你，係時候重拾我嘅夢想喇！」
 
其實學生在上李老師的堂睡覺，李老師授課方式的影響遠大於那一科本身的趣味，但這番話我當然沒有說出來啦！
 
談到這裡，李老師已經表明，他會當自強會的指導老師，並且會儘快向學校入紙申請，要我快去招募會員，籌謀創會事宜。
 
成功遊說了李老師當自強會的指導老師後，下一步就是湊足七人達到成立學會最低人數的門檻，如果只是剛剛符合七人的最低要求，即使自強會創會成功，亦未能實行我成立自強會的目的，我希望自強會可以成為校內最多同學參加的學會，所以我務必要讓一些有個人魅力的同學成為會內的一份子，這是一個吸引更多同學加入自強會的簡單方法，那些同學為之具有魅力呢？吳林六美便是一個好好的例子，從古到今，美麗的東西都是留住別人眼球的不二法門。
 
我先向同班的宛琳珊下手，她初時聽我要求她加入新成立的自強會，她是拒絕的，然後再問道：「加入你嗰個自強會有咩著數先？你係咪會畀返錢我啊？」
 
我啞然失笑，半晌才道：「唔會有錢，仲要交會費，而且仲要為依個學會做事。」
 
「超！我先唔會浪費錢同時間加入你嗰個咩自強會啊！」
 
「等陣先，妳做人唔好咁短視啦！我知道妳無參加其他課外活動，妳成為咗依個學會嘅幹事，到時中五張成績表起碼有啲野寫喔！」
 
宛琳珊疑惑道：「吓！依啲野有幫助嘅咩？」
 
「距離會考得番一年，妳中五都無時間去參加課外活動架啦！依啲經驗有好過無，話唔定對妳升學同工作上有幫助呢？」
 
會考是本地學生人生的分水嶺，這段中四至中五時期，人生路上出現了第一次關鍵性的選擇，出現在他們面前分別是就業和升學，兩條截然不同的道路，會讓一直依賴家人的年青人感到徬徨，面對突如其來的劇變，仍未清楚自己志向的年青人，對前路感到茫然，我曾經經歷過這個階段，相信宛琳珊亦會對未來的人生方向感到困惑。
 
宛琳珊一臉猶豫，道：「咁樣啊！但係我未必日日都可以參加到喎！」
 
「唔需要妳日日出席，妳放心啦！我幾時有點過妳喔！一於就咁決定啦！」
 
宛琳珊道：「咁你又真係無水過我，好啦！我入會啦！」
 
搞定了吳林紫娣校花榜上的第二名，於是我把目標放在第一名的布正麗身上。
 
我向布正麗提出了加入自強會的要求，她聞言怔了怔，道：「成皇志，你講笑咋？我好多野做架！邊有時間參加課外活動啊？」
 
「妳放心啦！唔駛成日出席，唔會阻妳好多時間嘖！」
 
「痴線，你當我ＫＡＩ架！畀人知道我布甸參加依啲課外活動，實畀人笑到面黃，我一定唔會參加。」
 
「唔得啊！妳一定要參加。」
 
「點解啊？」
 
「當初係妳叫我搞個字頭出嚟去收靚，依家我聽妳話搞咗咁多野出嚟，妳唔撐我，妳好無雷嘖！布甸。」
 
「哎呀！成皇志，你放過我啦！我叫你去收靚，點知你搞個興趣班出嚟，我唔參加你嗰個自強會啊！依個唔係我嘅風格。」
 
我握著布正麗的肩膀，堅決地道：「唔得，依家已經洗濕咗個頭，唔可以到咗依一刻，妳先話唔玩，出年會考，妳張成績表上面有啲野寫落去，對妳都有好處。」
 
我不待布正麗作出抗議，下了最後決定：「由依一刻起，妳就係自強會嘅社幹事，就算妳從今一次都唔出席自強會嘅活動，我都唔會收返依個決定。」
 
布正麗呆呆的瞧著我，過了一會，她才嘆道：「唉！ＯＫ，當我布甸衰女，導咗你搞咗個字頭出嚟，我陪你癲返次啦！」
 
ＹＥＡＨ！此刻自強會已經招攬了吳林紫娣的兩大校花。
 
我把李老師願意成為自強會的指導老師一事對呂靜宜說了，她當然亦成為自強會的社幹事，而管佳莉得知呂靜宜與布正麗加入了自強會，她亦很樂意接受了我的要請，加入自強會。
 
吳林六美中我已經遊說了四人，我向楊鳳瑤提出了要請，說不用她經常參加會內的活動，並且給她一個社幹事的銜頭，她考慮了一會，決定加入，成為了自強會其中一員。
 
現在吳林六美中只剩下柳豔，正當我以為以我和柳豔的交情，要說服她入會是一件很容易的事，但她居然堅決不允，她說我的原因是她是學生會主席，但奇怪的是她有參加辯論社及當了紅社副社長，我見她的態度這樣強硬，亦不想太過勉強，吳林六美已經有五位加入了自強會，我相信已經有足夠的號召力。
 
陳依官得知我成立了自強會的消息，他主動向我提出加盟要求，我當然求之不得啦！一個組織需要有像陳依官這種親和力強的人存在，讓組織內的成員更有凝聚力。
 
有了吳林五美作噱頭，又有陳依官這種深得老師和同學歡迎的成員在陣，自強會成立當天已經招收了五十名會員。


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl