<第叄期實體書,經已有售>今年我三十三歲,回到了1998年 (校園、穿越、奇幻): Chapter　５２　最愛是誰

Chapter ５２最愛是誰
 
今天，我如往日一樣跑步後回到家中沐浴。
 
更衣後，手機響起，我奇怪究竟是誰在大清早致電給我。
 
於是我按下了通話掣，道：「餵！邊位？」
 
彼端傳來了楊鳳瑤的聲音，道：「餵！成皇志，起身未啊？夠鐘返學喇！」
 




「著緊鞋，準備出門口，妳打嚟咩事啊？」
 
「咩事？我喺你樓下啊！」
 
我訝異道：「妳喺我樓下？等陣先，妳點會知我住喺邊架？」
 
「盛衣貝話畀我聽架！」
 
我心想：「盛衣貝唔會知我住邊，但係郭左傑就知，一定係條友仔同盛衣貝講，盛衣貝再同楊鳳瑤講，等陣先，郭左傑知道楊鳳瑤問我住喺邊，一定會將依件事周圍同人講。」
 




「喂喂，成皇志，你聽唔聽到啊？」
 
「聽到喇！依家出門口，再講。」
 
到了樓下，看見了楊鳳瑤，我道：「唉！妳嚟依度仲咩啊？」
 
楊鳳瑤怒道：「我今日六點鐘出門口，專誠嚟你屋企門口等你一齊返學，你居然講啲咁嘅野？」
 
我聞言亦覺得自己有點不對，歉然道：「ｓｏｒｒｙ囉！我唔係咁嘅意思，喇！最多我請妳食早餐喇！」
 




其實有位女生專誠前來等候自己一同上學，我應該是很感動、很慶幸的，如果在２０１６年，有楊鳳瑤這樣的女生待在我身邊，我相信我不會自殺，但不知為何，我的感覺並不太強烈。
 
我們吃過早餐，便步行回學校。
 
途中楊鳳瑤不只一次，有意無意以手背碰著我的手背，我知道她的用意，便道：「我都想拖妳，但係沿途咁多吳林紫娣嘅同學，妳都唔想畀人睇到啩？ 」
 
楊鳳瑤臉上一紅，啐道：「痴線，邊個話畀你拖嘖！講到我好幸咁，你唔好手多多添啊！」
 
未幾，楊鳳瑤又道：「成皇志，究竟你…鍾意我啲乜啊？」
 
我思索了一會，才道：「我覺得妳嬲嗰陣好似管佳莉。」
 
楊鳳瑤聞言臉色一沉，道：「咁你即係當我係管佳莉嘅代替品嘖？你咁掛住管佳莉，你不如去追返佢啦！」
 
楊鳳瑤話畢，便氣沖沖走了。




 
我佇立在原地，暗責自己魯莽，這些真心話只會惹怒對方，不過話說回來，我亦覺得呂靜宜在某方面亦有著管佳莉的影子，不只她倆，甚至是宛琳珊和學姐或多或少亦有著管佳莉的一些元素，是否因為她們與管佳莉有著某些共通點，我才對她們產生了情愫呢？
 
一走進班房，郭左傑便搭著我的肩膀，道：「餵！大鳩志，楊鳳瑤問盛衣貝，你住邊喎？你地究竟發生啲咩事嘖？」
 
我戲謔道：「哦！原來真係你條仆街周圍同人講我住邊，我爭楊鳳瑤十萬八千七，諗住唔還走數，依家你同咗佢講我屋企喺邊，我唔理啊？依條數你幫我還啊！」
 
「嘿嘿，你就算爭佢嘅都唔係錢啦！情債緊係用情嘅還啦！依家阿祥都轉咗目標鍾意宛琳珊咯！就算你同楊鳳瑤一齊都唔怕啦！」
 
其實陸泳祥並不構成我與楊鳳瑤發展的障礙，最重要的問題是連我自己亦不知有多喜歡楊鳳瑤？
 
呂靜宜約了我今天吃午飯，而我亦相邀楊鳳瑤和柳豔一同前往。
 
楊鳳瑤與呂靜宜各坐一邊卡位，兩人同樣向我瞧來，正當我不知道選擇坐在那一邊的時候，柳豔已經一屁股坐在楊鳳瑤的那一邊，我「只能」和呂靜宜一起坐。
 




柳豔道：「成皇志，下個禮拜五就係同安邦嘅辯論比賽，我地要開始預備下。」
 
「係嘅，學姐。」
 
整頓飯，我大部份時間和學姐相討辯論比賽的事宜，很少與呂靜宜和楊鳳瑤交談。
 
回到學校，午飯時候快要結束之際，楊鳳瑤道：「成皇志，依本中國文學嘅筆記借畀你，你記住睇完好還返畀我喎！」
 
我翻開了筆記簿，瞧見楊鳳瑤寫道：「放學，天台見。」
 
放學的鐘聲響起，我依照楊鳳瑤的約定，步上前往天台的階梯，不知她有什麼事要和我談呢？
 
我與布正麗、呂靜宜和楊鳳瑤都曾在學校的天台相討過不同性質的事情，好像這地方具備某種特殊意義，吸引我們選它作為談論的舞台。
 
楊鳳瑤與上次一樣，都是比我更早一步來到天台。




 
她皺著眉道：「你又遲到。」
 
「ＳＯＲＲＹ，去咗厠所小個便，係呢？有咩事又要上嚟傾啊？」
 
「仲有咩事嘖？咪係我地兩個人之間嘅事囉！」
 
「係，咁妳想傾啲咩喔？」
 
不知為何我們說的是男女間的事情，楊鳳瑤要以類似談判的形式去相討，不能大家甜甜密密、卿卿我我地說些私密事兒嗎？
 
「其實你係咪真係鍾意我？」
 
我被楊鳳瑤這單刀直入的問題嚇了一跳，但我自問是喜歡楊鳳瑤，於是我爽快地點頭，道：「係。」
 




「咁你有幾鍾意喔？ 」
 
楊鳳瑤這個問題讓我踟躕，我為難地道：「我好難將依一種野量化。」
 
「咁你真係唔夠鍾意我囉！」
 
我苦笑道：「小姐，我地都未叫做正式開始，大家對彼此有感覺，咪試下發展先，其實感情係要時間去培養架！」
 
楊鳳瑤反應甚大，道：「咩叫試下發展啊？你…錫我之前唔係已經諗住係一生一世嘅咩？」
 
我愕然道：「嚇！咁樣會唔會誇張咗啲呢？」
 
「咩誇張啊？嗰一個係我嘅初吻嚟架？我諗住留番畀我…老公。」
 
楊鳳瑤在這方面的思想，真的不知算叫做忠貞，還是叫做固執？
 
「咁妳都同樣攞咗我嘅初吻，大家打和啦！」
 
「你想就咁算？唔得，你要…負責任。」
 
我嘆了一口氣，道：「唉！都唔知妳點解咁頑固，我地鍚個嘴仔嘖！妳好似講到我對妳做咗啲咩野咁？」
 
「你咁講，你即係唔想…認帳嘖？」
 
「妳不斷係咁要求我點點點，又不斷畀壓力我，咁樣其實會令我對妳嘅好感會慢慢變成煩厭，只會阻礙我地嘅發展。」
 
「我只係為咗我地嘅將來，如果你真係鍾意我，你就會為咗我地嘅將來去努力。」
 
我搖頭道：「兩個人嘅將來靠一個人嘅努力係唔夠架！而且我地係依家已經咁多分歧，仲講咩將來嘖！依家你同我都係十六歲，將會嘅野邊個知？」
 
「依家我地一齊無耐，你就咁對我，遲啲我地耐咗，你一定蝦死我，哦…我知喇！
你…你一定鍾意咗第二個，係咪？」
 
我聞言微微錯愕，事實上除了楊鳳瑤外，我亦對幾名女孩有 同樣的一份情愫。
 
楊鳳瑤冷哼一聲，道：「你鍾意嗰個係靜宜？抑或係學姐？」
 
無可否認楊鳳瑤猜對了，但我並不會對她坦誠，如果我向她說出除了她外，我還喜歡呂靜宜和柳豔兩人，這會破壞她們之間的友誼。
 
我搖頭道：「係…布正麗。」
 
楊鳳瑤詫異道：「布正麗？你地啲男仔，都只係見邊個靚啲就去鍾意嗰一個，你知唔知布正麗係個隨便、唔正經嘅女仔？你以為佢鍾意你？除咗你之外，佢仲會鍾意好多人啊！」
 
此時，我們身後傳出一陣輕咳聲。
 
我與楊鳳瑤別頭回望，赫然發現布正麗居然站在天台的門口處。
 
布正麗邊走過來，邊道：「原本我係無興趣幹預你地之間嘅事，但係你地提起我，咁我又無辦法置身事外喇！」
 
楊鳳瑤瞪著逐漸步近的布正麗，問道：「妳…妳想點？」
 
我瞧見楊鳳瑤有點心慌，我亦害怕性格剛烈的布正麗，會因為楊鳳瑤的話而對她動粗，於是我便上前一步，欄在她們二人之間，辯說道：「布正麗，妳聽我講先，其實楊鳳瑤佢…」
 
布正麗微微一笑，逕自道：「『靚妹』，妳自量下啦！妳睇妳副身材，成副洗衫板咁，邊有男人鍾意架？」
 
楊鳳瑤滿臉通紅道：「妳…發曬姣，唔知醜。」
 
布正麗嘿嘿一笑道：「妳話我唔正經，發姣喔嘛？我依家就姣畀妳睇。」
 
布正麗單手挽住我的頸項，然後她把頭仰上，吸吮著我的嘴唇。
 
楊鳳瑤瞠目結舌，氣得溢出淚水，道：「你地…你地…成皇志，我憎死你啊！」
 
楊鳳瑤走後，布正麗把我推開，她神色自若，而我則滿臉通紅。
 
我羞赧地問：「妳…嚟咗好耐？」
 
「嗯，本身打算上嚟整番飛，就見到你地講數。」
 
這豈不是她已經把我與楊鳳瑤的對話全都聽見，我連忙解釋道：「我頭先話鍾意妳，其實…」
 
布正麗斷言，笑道：「呵呵！本小姐天生麗質，你都唔係第一個迷戀我架喇！我頭先嘴你都係幫你解圍，你又欠我一個人情喇！」
 
「嗯，係啊！我又欠妳一個人情喇！」
 
「呂靜宜係一個好女仔，你唔好辜負人，不過頭先嗰個靚妹，睇落好似真係鍾意你。哼！講到尾，一日最衰都係你地依啲見一個鍾意一個嘅臭男人，你地依啲只係識用下面諗野嘅臭男人，閹咗你地，世界會少咗好多麻煩。」
 
我心想：「如果我地男人個個都無…用，妳地女人同樣會少咗好多樂趣。」
 
我剛剛承了布正麗的情，這句心底話當然是沒有說出口。
 
片晌，布正麗也走了，我輕撫著嘴唇，回味剛才與布正麗的那一吻。
 
為了應付距離不足一星期的跨校辯論比賽，辯論社的全體成員正在四樓的活動室裡，舉行緊急的策略會議。
 
其實辯論社的全體會員連同導師董老師，不過只有四名成員：當會長的何康誕、社幹事柳豔，以及剛加入成為辯論社的其中一員的我。
 
以拉雜成軍，湊夠三人參賽，不至讓比賽取消的前題下，看得出董老師對我們並沒有什麼期望，不竟對手是BAND 1的安邦中學，我們輸是必然的事。
 
董老師道：「我講下聯校辯論比賽嘅流程先，比賽會定出一個題目，題目係評判團到時安排嘅，基本上兩間學校都唔會知道，評判會以抽籤形式去安排雙方扮演正反兩方，之後有五分鐘時間預備，然後雙方共六名成員各有三分鐘時間進行個人辯論，跟住有十二分鐘畀雙方進行質詢，再之後有三分鐘時間去預備總結，最後雙方會各有三分鐘時間進行總結，你地都清楚明白成個辯論比賽嘅流程啦？」
 
我們三人均點頭以示明白，董老師續道：「咁到時比賽，何康誕你就係主將、柳豔妳就係第一副辯、成皇志你就係第二副辯啦！我咁嘅安排，你地有無意見？」
 
我們再次點頭，董老師道：「成皇志，你剛剛加入無耐就要你參加比賽，可能對你嚟緊係一件好有挑戰嘅事，喺你印像中辯論係咩一回事？」
 
其實我並沒有參加過任何辯論比賽，與辯論比賽的性質最接 ，可算是中六七那時的中化科小組討論。
 
我想了想道：「即係吹水？」
 
董老師哈哈一笑，道：「都類似，不過一場認真嘅辯論就唔只停留係吹水嘅層面，起碼我地唔可以講粗口、人身攻擊、誹謗等，辯論講求反應、洞察力、口才、邏輯思辯嘅能力，當然要提升依一類嘅能力，需要長時間嘅訓練，唔係可以係短時間裡面一蹴即就嘅，不過我可以講一啲基本嘅技巧畀你聽。」
 
「首先，要清楚題目，明白自己應該嘅立場，你係正方就立場要企係正方，立場要明確，切記畀人覺得你模稜兩可；其次，除咗講之外，你都要聽，聽己方有無啲未提及嘅立場，可以加以補充，同埋對方立場有無漏洞、矛盾，有就記低，等機會就進攻，死纏爛打，咬住對方唔放，等對方花時間去拆招，打亂對方陣腳；第三，辯論比賽係無辦法說服對方，對方亦唔可能向你認低威，但你可以說服觀眾、說服評判，以上就係我 嘅心得，依家你同何康誕練習一下。」
 
其實董老師的話，對我的參考價值不大，並不是董老師的話不對，董老師所說的話絕對正確，但那隻是近乎人盡皆知的事，並沒有什麼獨特性，就算他不提，我亦會留意到。
 
不知何康誕是否因為在之前的歌唱比賽敗在我與呂靜宜的手上，他對我的態度挺不友善，抱怨道：「我地嘅對手係band 1嘅安邦中學，都唔知點解要搵連會考都未考過嘅中四生做隊員？」
 
其實我是考過會考，而且還考了兩次，但我當然不會告訴給對方聽，我道：「如果你地搵到其他人，我唔介意退出架！」
 
何康誕立時語塞，只能夠乾瞪著眼。
 
董老師道：「好喇！好喇！開始辯論，我出題目…嗯，就討論下香港應否食狗肉合法化，邊個做正方？」
 
何康誕舉手，董老師道：「成皇志，咁你做反方啦！你地有五分鐘時間預備，跳過咗各自敘述，一個人開始另一方可以對對方進行質詢」
 
五分鐘過後，何康誕開始述說他的觀點：「我贊同食狗肉，首先，我唔認為狗嘅地位比豬牛羊雞更加高貴，點解我地一邊可以養狗，一邊就將豬牛羊雞當成蛋白質嘅來源？因為人類主觀覺得狗係比豬牛羊雞更加可愛，所以狗嘅地位超然於佢地？當我地一邊話狗狗好可憐唔應該食佢地，但係我地就對其他動物就亳無憐憫，咁去食佢地，依個係偽善，依個係唔公平嘅！」
 
我道：「我反對食狗肉，狗係自古以嚟已經同人類建立咗一個無形嘅契約，狗係以前嘅時代，功能上嘅角色就係看門口、打獵，人類平時除非到咗萬 得已，生死存亡嘅時候先會殺狗果腹…」
 
何康誕斷言道：「咁你即係贊成食狗肉啦？」
 
我搖頭道：「我講嘅係古時，人遇到絕境嘅時候，嗰陣唔好話狗喔！就算人食人都時有發生，就好似中國，遇到飢荒，易子而食都時有發生，但依家題目係香港，我諗香港發生飢荒嘅機會係微乎其微啩？」
 
何康誕道：「你頭先講緊功能上嘅角色，咁牛夠幫人類耕田啦！咁人類夠食佢。」
 
「其實人類嘅一生，為咗生存會令無數嘅動物死亡，既然我地人類係萬物之靈，好應該係去儘可能減少傷害多一個物種，而唔係去將所有動物『一視同仁』咁殺害。」
 
「你都未答我個問題，點解狗先有依個權利？唔係豬牛羊雞？」
 
「我無口話狗先有依個權利，之但係大部份嘅國家都唔食狗肉，我地可以先易後難咁去推廣，先唔食狗，然後豬、牛、羊、魚，其實到咗今日，都仍然 好多地方嘅人無野食，用等同地方嘅面積去耕作，比起用等同面積去飼養牲畜，可以提供更多嘅糧食，而且牲畜排放嘅甲烷係做成溫室效應嘅主要因素之一，所以唔食狗、唔食豬牛羊，唔單止解決你嘅疑慮，仲可以環保救地球。」
 
何康誕聞言，然出錯愕的神色，這個年代應該還未有碳排放這樣的觀念，他道：「咁…植物唔係生物啊？水入面夠有微生物咯？唔通茹素就唔殺生咩？」
 
「我之前講過，人類為咗生存無可避免會殺傷其他生物，孔子講過：『幼吾幼,及人之幼。老吾老,及人之老。』因為我地成日同貓狗接觸，建立咗一份感情，我地唔忍心睇到佢地受傷害，依一種惻隱之心，再推廣到豬牛羊雞嘅身上，從而令佢地得到同樣嘅對待，至於你話植物同微生物，喺生物嘅分類學上，同我地人類太過南轅北轍，為咗生存我地無辨法唔去傷害佢地，但我 地要尊重佢地為我地延續我地嘅生命，所以我地要珍惜食物。」
 
「你…嘅想法係偽善，你…」
 
董老師搖著頭，斷言道：「你地離曬題喇，不過我大約知道你地嘅長處同不足嘅地方，今日就嚟到依度，下次再練習過。」
 
練習完畢，我與柳豔步行前往巴士站，柳豔道：「成皇志，雖然頭先董老師話你離題，但係我覺得你嗰番說話好有道理，唔係偏愛任何一種動物，而係由嗰一種動物開始，以先易後難嘅方式，將愛推廣出去，最後對所有動物都兼爰，依番說話你係喺邊到聽翻嚟架？」
 
「嚇！依啲論點我只係有感而發，我覺得何康誕話點解食豬牛羊雞，又唔可以食狗，我覺得難得人類對某一種動物有惻隱同愛，唔應該將依種值得推崇嘅情操抺殺，咁樣反而係一種道德同文明上嘅倒退，我亦都同意所有動物都應該得到尊重，希望啲愛狗之人，可以將依份愛推廣到其他動物身上。」
 
「嗯，成皇志睇唔出你咁有愛心嗰喎 」
 
「嘿嘿，講係咁講嘖！但係我都有食肉，係多菜少肉嘖！我阿婆唔食牛，所以我都唔食牛，食肉我都係食雞同魚多，係生物上嘅分類，我地人類係哺乳類，雞係鳥類、魚係魚類，以我頭先嘅生物分類嘅差異說法，我咁做都唔叫自打嘴巴喔！」
 
「嗯，你都幾奇怪，好少男仔鍾意食菜多過食肉嗰喎！」
 
我嗯了一聲，話題一轉，問道：「學姐，點解個辯論社好似咁少人咁嘅？之前呂靜宜唔係辯論社嘅會員嚟嘅咩？」
 
「其實辯論社初初都有差唔多十個會員，但係之後啲人覺得悶，加上有幾個會員同何康誕不和，一個接一個退會，至於靜宜，係因為佢出面定時定候要學音樂，兼顧唔到，選擇退社。乜靜宜無同你講咩？我仲以為你地…」
 
其實最近因為楊鳳瑤的關係，我已經很少與呂靜宜單獨見面了，所以她退出辯論社一事我絕不知情。
 
「我地嘅…關係唔係你諗到咁嘅。」
 
我不願向柳豔說出我和呂靜宜是契約情侶的關係，因為我不知道呂靜宜是否願意讓別人知道？
 
「哦！原來你同靜宜無野嘅？咁鳳瑤呢？佢同我講咗你地之間嘅野！鳳瑤係個好女仔嚟！你鍾意人就著緊啲啦！」
 
「學姐，妳可唔可以唔好提佢啊？妳一提起佢，我就覺得有壓力喇！」
 
柳豔訝異道：「嚇！點解啊？」
 
「佢話希望我搵廿萬一個月，買間二千幾尺嘅屋同佢全家人一齊住，仲話係半島或者文華擺五六十圍…」
 
我將楊鳳瑤對我的期望與要求和盤托出，柳豔聞言笑道：「哈哈，依啲說話鳳瑤以前都有同我講過，佢希望將來個老公可以有咁嘅條件，佢居然將佢兒時夢想同你講，緊係嚇親你啦！唉！都叫咗佢唔好睇咁多小說同電視劇架啦！」
 
「唔係喎！佢當時同我講依番說話好認真嗰喎！」
 
「鳳瑤唔係一個拜金嘅女仔，佢鍾意你，就算你統統達唔到佢講嘅要求，佢都係會鍾意你。」
 
我聞言亦同意柳豔的說話，楊鳳瑤並不像一個拜金的少女，只 是她未曾踏出社會工作，受到電視、小說茶毒，以為賺錢很容易，所以才把歪曲了的想法錯誤投射在我身上。
 
柳豔又道：「雖然你話同靜宜無野，但我睇得出佢對你有份情愫喺度，靜宜同鳳瑤都係好女仔，感情嘅野都係決斷啲好，快啲揀定一個，你越拖得耐，你地三個受嘅傷害越大，究竟你鍾意邊個多啲啊？」
 
面對柳豔這問題，我真的很傷腦筋。
 
我道：「其實我分唔到我鍾意邊個多啲？兩個我都咁鍾意，唔係應該話除咗佢地之外，我仲對另外兩個女仔都有同樣嘅感覺。」
 
柳豔詫異道：「嚇！乜仲有兩個啊！成皇志，你真係呢…你真係呢！我都唔識講喇！仲有兩個係邊個嚟架？」
 
我瞧著柳豔，踟躕了一會，猛一咬牙道：「一個係布正麗，另一個就係…妳啊！學姐！」
 
柳豔聞言全身一顫，未幾她便用手掩著嘴巴狂笑，道： 「唔好玩我啦！成皇志，我係一個大陸妹，廣東話都未講得好，二十歲人仲讀緊中六，你有咩可能鍾意我喎？」
 
「學姐，我講真架！呂靜宜條件太好，我有壓力；楊鳳瑤對我有期望，我有壓力；只有同學姐一齊，先係最輕鬆，而且學姐妳唔好妄自菲薄，妳先唔係一無是處。」
 
柳豔搖著頭，眼泛淚光道：「我唔值得…你鍾意，我唔配！」
 
柳豔說畢，剛好她等候的巴士已埋站。
 
我茫然地瞧著載著她駛遠的巴士，良久我才回復過來。
 
究竟我在做什麼呢？我好像把事情弄得越來越糟？現在我有點明白到為何我要回到唸中四這一年，因為我處理自己的感情問題完全是不合格，我要在這個情竇初開的年紀好好地補上一課。


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl