<第叄期實體書,經已有售>今年我三十三歲,回到了1998年 (校園、穿越、奇幻): Chapter　２６　生財之策（上）

Chapter　２６　生財之策（上）
 
午飯時，陸泳祥向林海原抱怨道：「哎呀！依家返上校雞份工真係辛苦，每日五個鐘係廚房又要執雞、又要炸雞、執頭執尾，真係想死，人工又少，得廿蚊一個鐘。」
 
姚智風冷笑道：「嘿，咁唔滿意，你咪唔好返囉！」
 
陸泳祥怒道：「你講咩啊！我返唔返關你鬼事啊？」
 
「咩啊？你話份工辛苦，咁我咪同你諗解決方法囉！你駛咩起晒鋼嘖？」
 




陸泳祥冷哼了一聲，道：「我知你諗咩啊！你以為我唔做，你可以追到宛琳珊喔嘛？你發夢啦！憑你副專容？宛琳珊會受你？」
 
的確姚智風濛豬眼、朝天鼻，以相貌論，陸泳祥要比姚智風優勝；再以體形論，陸泳祥身高比姚智風高出一個頭，而且他是學校足球隊的成員，身形要比姚智風壯碩；至於論家境，陸泳祥的父母是公務員，加上三個姐姐亦已經出身，姚智風又再次大敗。由於我與姚智風均是鋤ＤＥＥ會的四大長老，所以我是偏向姚智風那邊，但我搜索枯腸一番，仍難以找到姚智風比陸泳祥優勝的地方。
 
姚智風怒道：「依家你玩埋人生攻擊添？當初我鍾意宛琳珊先架，你明明鍾意楊鳳瑤，依家你擺明撬牆腳。」
 
「痴線，撬咩牆腳嘖？你又唔係佢條仔，況且男未婚女未嫁，之前你講到好大方，咩公平競爭架？依家又玩小氣。」
 
「你又叫小西杰同盛衣貝幫你，咁叫公平？」
 




我們見他們兩人爭論越趨激烈，連忙道：「大家friend嚟架嘛！一人少句啦！」
 
兩人臉如玄壇一瞬不瞬地盯著對方，整頓飯兩人均默不作聲，沒有交談半句，雖然我們暫時壓下兩人之間的進一步衝突，但難保日後他們會因為宛琳珊而大打出手。
 
今天是星期一，捱過了被物流界形容為地獄超級星期六。而我在星期天，亦首次用自己的錢請了阿婆阿公飲了餐下午茶，本來星期一對於學生還是打工仔來說，星期一就是一星期中最被討厭的日子，因為它離周末是最遠的一天，可是現在一周七日裡，我最喜歡的就是星期一。
 
上完物理堂，應該是說睡完了物理堂才對，我朝著男厠的方向走去，瞧見布正麗與譚慧詩許詠欣在走廊裡嬉鬧。
 
布正麗指著許詠欣笑道：「放心，我將來做咗皇后，哀家封妳做『石梨夫人』。」
 




譚慧詩忙道：「咁我呢？」
 
布正麗笑道：「哀家知道譚愛卿妳為人咸濕，就賞妳一百個精壯嘅男人嚟服侍妳。」
 
許詠欣指著譚慧詩笑道：「咸濕妹。」
 
布正麗笑道：「兩位卿家仲唔謝恩。」
 
許詠欣與譚慧詩笑道：「謝娘娘。」
 
她們開的這番玩笑，讓我想起了布正麗之前在禮堂對陳慧琼所說的話，那個譽滿中外的轉世活佛說布正麗的命是像文德皇后一樣。但我想不起誰是文德皇后？而在我原先的世界裡並未曾聽過有港人成為某國的皇后，只聽過有位叫文雅麗的中英混血兒成為了丹麥王妃，而且在那個時空，我對布正麗的印象只停留在中五階段，她之後的人生，我是一無所知的。
 
今天是星期一，難得今天放學後不用去上班，柳豔學姐在圖書館替我與楊鳳瑤補習中國文學，呂靜宜則在自修她的附加數。
 
我問道：「係呢！我依排做兼職，唔係成日嚟圖書館，妳地係咪都係照嚟啊？」




 
柳豔搖頭道：「依排我好忙，學生會同辯論學會兩邊走啊！」
 
呂靜宜亦搖頭道：「我要去出面練琴、又要去補習附加數，都係間唔中嚟同鳳瑤補下數學咋！」
 
楊鳳瑤道：「我雖然得羽毛球依樣課外活動，但我發現成日嚟溫書，好多時候都入唔到腦，所以最近都少嚟咗。」
 
我點頭，道：「都係嘅，溫唔入腦坐係到都無用，去打波輕鬆下都好嘅。」
 
呂靜宜道：「係呢！你份工做得慣唔慣啊？」
 
「暫時都可以，啲同事見我係細蚊仔都無恰我。」
 
楊鳳瑤嘲笑道：「唔知醜，明明你就成個阿叔咁款，扮晒細路仔。」
 




我沒有理會楊鳳瑤，向柳豔和呂靜宜道：「之前我咪應承過妳地嘅，出咗糧，就請你地食飯，尋日我出咗糧，不如聽日我請妳地食lunch喔！妳地想食咩？」
 
柳豔道：「吓！成皇志，你講真架？」
 
「當然啦！學姐，妳幫我補中國文學，勞苦功高啊！依餐我晨早要請妳啊！」
 
呂靜宜道：「成皇志，你請學姐啦！唔駛請我。」
 
我道：「咁又唔得喎！我要請埋妳喎！因為我要妳幫楊鳳瑤補習，畀咗唔少麻煩妳，所以我係爭妳一餐。」
 
我打量著楊鳳瑤，道：「至於妳…」
 
楊鳳瑤有點羞赧，道：「我知你實記住之前我話你份工返一日就畀人炒咗喔嘛！我仲話過我唔希罕添！」
 
我笑道：「哎呀！妳誤會喇！我係問妳幫手諗下食啲咩野好啊？」




 
楊鳳瑤冷哼了一聲。
 
我道：「喂！畀下面喔！我請妳食飯，妳唔好喺咁多人面前請我食檸檬得唔得先？」
 
呂靜宜亦笑著幫腔道：「係啊！鳳瑤，妳唔去，我地都唔會去架！」
 
楊鳳瑤擺出一副勉為其難的樣子，道：「咁好啦！我畀面靜宜，唔請你食檸檬啦！」
 
「嘩！真係皇恩浩盪，我駛唔駛謝主降恩啊！」
 
翌日，回到學校，黎早強告知我一個消息，就是昨晚陸泳祥與姚智風在上校雞上班時大打出手，最後被上校雞的經理即時辭退。
 
「吓！最後邊個打贏啊？」
 




「咁我就唔清楚！尋晚姚智風打畀我，問我撐唔撐佢？」
 
「吓！佢唔係諗住同陸泳祥嚟真啊？」
 
「咁我就唔知喇！」
 
以我認識的姚智風，他是一個很沒有所謂，膽子不大、極少動真火的人，但當男人涉及到女人的問題便很難說。
 
午飯的時候，姚智風問道：「大鳩志，一齊去８座到食喔！」
 
「吓！今日我唔得啊！」
 
姚智風聞言臉色一沉道：「你同陸泳祥食？」
 
我連忙表明立場道：「唔係，我今日約咗楊鳳瑤、呂靜宜同柳豔食晏。」
 
黎早強口賤道：「嘩！一王三后，勁！」
 
姚智風提高聲線道：「你要溝囡，我會識做嘅！唔似一啲人，專撬兄弟牆腳。」
 
與林海原、霍去登、郭左杰站在一邊的陸泳祥冷哼了一聲。
 
郭左杰見狀，立時推著陸泳祥離去，道：「我地上去安蔭酒樓食，快啲去攞位，如果唔係會無位。」
 
在我們的朋友圈裡，現在因為陸泳祥與姚智風的決裂分成了擁陸與擁姚兩大陣營，林海原、霍去登與陸泳祥較熟絡，所以成了擁陸派，而本身是鋤ＤＥＥ會的四大長老之一的郭左杰因幫助陸泳祥追求宛琳珊，所以被姚智風視為擁陸派。黎早強與姚智風同屬四大長老，所以二人關係密切，而最近轉校生何敏傑與姚智風走得很近，雙方很投契，所以成為了姚粉，至於『世界仔』陳依官並沒有明確表示自己是陸營、還是姚營，今天他選擇與成敏研方詠珊吃午飯，沒有申明立場。
 
楊鳳瑤提議到寶石吃飯，但寶石沒有位；之後我們轉去金風，金風也滿座；我提議去和宜合道的海達。
 
柳豔道：「吓！海達成三十幾蚊一個快餐喎！」
 
「欸！我請得妳地食飯，就唔怕畀多十蚊八蚊啦！」
 
我們到了海達，海達的餐飲模式是像大快樂那種買票自己捧餐的自助模式，
 
柳豔要Ａ餐，楊鳳瑤要Ｄ餐，呂靜宜看著餐牌，有點羞赧道：「我要Ｂ餐，不過野飲我想轉紅豆冰，不如我畀番六蚊你喔！」
 
我道：「傻啦！話明依餐我請，就全部人轉晒紅豆冰啦！我去買飛，你地搵位坐住先。」
 
如果是２０１６年的話，我請女生到茶記吃三十多元的午餐，她不上she.com或鄉土把我臭罵成死cheap精、無用的男人才怪，究竟是這個年齡的女生較容易知足，還是我遇上了三個願意去捱麥噹噹的女孩呢？
 
我走去收銀處排隊，快要輪到我的時候，有人突然插隊，我與他打了個照面，那人年約四十、中年發福、髮形宛如『鮑魚刷』、蓄著二撇雞、模樣猥瑣，整體來說，有七分吳孟達的神韻。
 
他揚了揚掛在頸上的PASS，道：「『靚仔』，阿ＳＩＲ維護緊香港治安，唔係排先都唔得啊？」
 
我瞧見這個頗像吳孟達的男人，原來是隸屬梨木樹警署刑事偵緝科的沙展，最令我著意是他的名字，居然叫房侍農。
 
房侍農對收銀阿姐道：「豆腐火腩飯，多豆腐、多火腩、多飯，熱啡多奶，另外畀杯冰我添！」
 
收銀阿姐嘩然道：「又多豆腐、又多火腩、又多飯，你不如叫兩碟啦！熱啡，另外加杯冰，你不如轉做凍飲啦！都係加兩蚊嘖！」
 
房侍農雙手扠腰，瞪大眼睛，道：「家陣阿ＳＩＲ鍾意啊！你吹得我漲咩！」
 
在水吧調製奶茶的老闆，道：「阿姐照落畀佢啦！」
 
老闆轉向房侍農，道：「房侍農，你食得晒先好啊！」
 
房侍農道：「食唔晒咪打包囉！阿ＳＩＲ，我不嬲食得唔好嘥嘅！」
 
阿姐一邊打飛一邊細細碎碎道：「人叫房仕龍，你叫房侍農，人地搵幾億美金，你就係到買個三十幾蚊碟頭飯都多多要求。」
 
「娛樂圈嗰個房仕龍，佢拍戲就扮警察；我依個房侍農就係貨真價實嘅警察，保護你地啲升斗市民，就係我地喇！」
 
看來這位房侍農應該經常來光顧這間餐廳，與餐廳的員工和老板混得挺熟。
 
我買完飛後，聽見楊鳳瑤與人發生爭執，別過頭瞧去，發現有三名穿著猩猩猿校服的金髮ＭＫ與楊鳳瑤爭論，其中一位居然是貓仔。
 
楊鳳瑤向三名金髮ＭＫ道：「喂！個邊有人座架，你地坐去第二度啦！」
 
其中一名金髮ＭＫ淫笑道：「嘿嘿！唔夠位坐，你咪坐我大髀囉！」
 
貓仔瞄著柳豔的胸部與另一位金髮ＭＫ道：「嘩！中間條女好大波，夾腸一流啊！」
 
柳豔怒道：「你地把口乾淨啲喎！」
 
貓仔笑道：「唓！原來係大陸妹嚟架，廣東話都未講得正。」
 
此時，我問道：「發生咩事啊？」
 
其中一名金髮ＭＫ指著我道：「死光頭仔，點啊？做架兩啊！」
 
楊鳳瑤道：「我地同佢地講咗有人，佢地係都要坐落嚟！」
 
我轉向那名金髮ＭＫ，道：「喂！我地霸咗位先架，你地都要夾硬坐埋嚟，你邊度鄉下架？識唔識規矩？」
 
那名金髮ＭＫ瞪著我，貓仔指著我道：「哦！我認得你，嗰陣我兩個阿哥打過你一鑊金啦！」
 
「係啊！你同你阿哥係邊度話！」
 
貓仔自豪道：「我地石蔭真技安嘅！」
 
「ＳＯＲＲＹ！聽唔到，大聲啲得唔得啊？邊度話？」
 
貓仔提高音量，道：「我地係石蔭真技安啊！死ＫＩＮＤ子。」
 
貓仔的話，讓他成為了全間餐廳的焦點，而那名隸屬梨木樹警署刑事偵緝科的房侍農亦打量著他，我喚道：「阿ＳＩＲ，依度有人自稱三合會成員，你係咪應該要處理下呢？」
 
房侍農把餐盤放下，拿起了夾在腋下的方向報，在貓仔三人的頭頂上狠狠拍打了一下，罵道：「三隻野，毛都未出齊，學人撻朵，都唔知死字點寫嘅！」
 
三人瞥見他掛在胸前的ＰＡＳＳ，均不敢造次，房侍農喝道：「你地三隻野仲唔走係咪想搏拉？」
 
雖然三人敗走海達，但我對房侍農的處理方法有點不滿，道：「阿ＳＩＲ，佢地自稱三合會成員，點解你放佢地走啊？」
 
房侍農沒好氣地白了我一眼道：「阿ＳＩＲ做野，駛鬼你條塞豆窿教咩？」
 
我走了去取餐，嘀咕道：「超！死差佬咪又係懶，唔想做野，頭先就唔好講到自己成個ＢＡＴＭＡＮ咁啦！」
 
我逐一取餐回來，發現房侍農老實不客氣地坐了一邊卡位，柳豔三姝坐在另一邊卡位，看她們的樣子並不敢對房侍農的行為作出干涉。這亦難怪，傳統智慧便經常說民不與官鬥；民心如鐵，官法如爐；閻王易見，小鬼難纏等話，對於這些有選擇性執法的有牌爛仔，一般人均敬鬼神而遠之。
 
我坐在房侍農的那邊卡位，瞧見他邊扒著豆腐火腩飯，邊打開方向報的波經參詳，他喃喃道：「今晚歐冠巴塞對曼聯，兩隊爭出線，巴塞主場讓半球，上次曼聯主場都係踢成三比三，作客實輸緊啦！」
 
聽到曼聯的消息，我不禁搭訕道：「係咪曼聯輸咗就出唔到線啊？」
 
房侍農把焦點從報紙轉向我，道：「依組拜仁榜首，巴塞同曼聯爭第二，輸咗就出唔到線。」
 
「咁依場買下盤穩陣啊！曼聯今年會係三冠王。」
 
房侍農哈哈一笑道：「三冠王？原來你係死獌狗，今年無咗簡東拿，曼聯唔降班都偷笑啦！仲三冠王？」
 
我道：「如果依場巴塞贏咗，曼聯就出唔到線，咁曼聯下盤真係好穩陣喎！」
 
「超！你條塞豆窿教阿ＳＩＲ賭波？阿ＳＩＲ開始賭波嗰陣，你仲係你老豆個春袋度游下游下咋！」
 
這個時候，馬會還未推出足智彩，那麼說房侍農是賭外圍，我道：「阿ＳＩＲ，咁你即係賭外圍，乜差人可以賭外圍波咩？」
 
房侍農頓時臉色一沉，道：「細路，你講咩啊？唔好砌阿ＳＩＲ生豬肉喎？」
 
「阿ＳＩＲ，我無其他意思，我只係想知道邊到有外圍波賭嘖？」
 
房侍農嚴肅道：「如果你再亂講野，信唔信我拉你返去差館坐番四十八個鐘？」
 
「我犯咩事，你要拉我，如果你亂嚟，我實去pprb到投訴你架！」
 
房侍農臉有異色，向老闆要求打包豆腐火腩飯走，臨走時，嘆道：「我依啲都係辛苦命嚟，想安安落落坐低扒啖飯，都要畀個死靚仔去pprb投訴。」
 
他應該想不到我這十五歲的中學生會這麼難纏，加上那個時候的pprb對警察有實則的規管作用，並不像２０１６年時，pprb如同虛有的擺設一樣。
 
我們離開海達，步行回校，楊鳳瑤笑道：「成皇志，你頭先係咪特登引嗰三條友講自己係黑社會啊？」
 
我點頭道：「係啊！嗰啲死臭飛成日覺得自己係黑社會好威，驚死人地唔知，周圍同人講，咪等佢喺差佬面前認屎認屁囉！之但係頭先個差佬無鬼用，就咁放三個臭飛走。」
 
柳豔道：「但係你頭先同嗰個差人頂到咁行，你唔驚咩？我聽人講，有啲警察係攞正牌嘅爛仔，隨時捉你去後巷打完你一輪，再拉你返差館。」
 
「差人不嬲極黑暗、極醜惡架啦！賊就唔敢捉，最叻就用警棍打學生同埋市民！」
 
柳豔訝道：「吓！乜咁衰架！」
 
我續道：「但係頭先嗰個豬腸粉就擺明係傻仔啦，只係識欺善怕惡，妳唔好驚佢，要係佢面前表現你係識野，咁佢就唔敢亂嚟，好似頭先咁，我質疑佢賭外圍波，佢即刻震過貓王啦！」
 
楊鳳瑤笑道：「頭先靜宜妳唔出聲，係咪好驚啊？」
 
呂靜宜羞赧一笑，道：「我頭先真係嚇咗一嚇，都唔知點解成皇志可以咁大膽？飛仔又唔驚、警察又唔驚。」
 
楊鳳瑤笑道：「佢頭先咪持住有警察喺度，佢先敢串嗰三個飛仔嘖。」
 
我笑道：「死妹釘，妳調轉晒嚟講，如果頭先唔係死差佬喺度阻頭阻勢，我將嗰三個死臭飛打到入ＩＣＵ啦！」
 
我手舞足蹈地打出才子銷藥員在直播節目裡打出的銷氏伏虎拳，道：「先嚟一招黑虎偷心，打低一件；再嚟一招猛虎硬爬山，再掃低一件；最後一式虎落平陽被犬欺，打低晒三件。」
 
她們三人樂不可支地捧腹大笑，楊鳳瑤笑道：「哈哈哈！成皇志，你好似啲晨運阿叔打太極咁。」
 
「死妹釘，唔識野，正一法西斯。」
 
此時，我瞧見對面馬路的麥噹噹出現了一條長長的人龍，不禁問道：「吓！今日老麥免費咩？咁多人排隊嘅？」
 
柳豔道：「唔係啊！佢地應該係排緊『小鹵味』啊！」
 
我訝異道：「嘩！老麥依家連鹵味都賣埋，咁做擺明頂爛市啦！扼殺小店嘅生存空間嘖！」
 
楊鳳瑤糾正道：「唔係『小鹵味』，係史露比啊！」
 
我笑道：「哦！史露比。」
 
瞧見這長長的人龍，我不禁問道：「係呢！老麥有得換史露比係幾時嘅事？」
 
呂靜宜道：「今日先係第一日，一共有二十八款史露比，每隻代表不同嘅國家。」
 
我喃喃道：「嘅然係第一日，咁即係有排炒喇？」
 
此時，一個生財的計劃漸漸在我腦海形成，但這個計劃只有我一人參與是實行不了，必須有其他人分擔部分的工作。



=15.6000003814697px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl