<第叄期實體書,經已有售>今年我三十三歲,回到了1998年 (校園、穿越、奇幻): Chapter　２５　嚴於律己

Chapter ２５嚴於律己
 
離開學校，我回家換上了阿爸的西裝，才前往吾萬達物流有限公司。
 
到達了吾萬達物流有限公司，周小姐為我引見老闆吾萬達，吾萬達與吳孟達的名字雖然是同音，但他們的樣子並不相像，吾萬達年約五、六十歲，長得一副慈眉慈目的模樣，個子很矮小。
 
周小姐為我們雙方介紹，道：「依個係我地老闆吾先生；依位係成皇志，victor。」
 
吾萬達友善地伸出手與我相握，然後聲如洪鐘道：「Venus講過你嘅事畀我聽，其實只要幫到手我都無咩所謂，嚟緊就係我地依行嘅旺季，夜更唔夠人，victor你就幫下夜更同事手，其他細節就Venus同你講啦！後生仔，畀心機！唔好怕蝕底！」
 




我跟周小姐到了會議室，她要求我不要穿校服上班；她會以現金支薪，每週出薪一次；星期一、四休息，星期二、三、五，上班時間由下午五時至十時，星期六則全日，星期日則返上午，有時可能要加班，加班亦是時薪五十。
 
周小姐補充道：「victor，仲有你唔好同其他同事講你得十五歲同幾錢人工，有人問起，你話你係我介紹就得喇！」
 
「係！多謝周小姐。」
 
「你幾時可以返工？」
 
「隨時可以。」
 




「咁你聽日開始返啦！」
 
晚飯時，我把這個消息告訴了阿婆阿公。
 
阿公道：「咩工嚟架！物流公司駛唔駛搬野架？」
 
「阿公，份工文職嚟架，唔駛體力勞動架。」
 
阿婆道：「好喔！做兼職幫輕嚇媽咪。 」
 




「等我出咗糧請你同阿公飲荼。」
 
阿婆笑道：「呵呵！咁阿婆同阿公多謝你先。」
 
其實阿婆開心的原因並非貪圖那一餐半餐的茶宴，而是那份孝心。
 
翌日放學時，在圖書館裡，柳豔聞得我今天就會去物流公司當兼職時，便道：「我睇新聞話今年有個叫金融風暴嘅東西，搞到出面經濟好差，我見有啲文員都係得五六千蚊，五十蚊一個鐘真係好高人工，成皇志，點解佢地會請你嘅？」
 
我開玩笑道：「咁又係，我啲十六歲都未夠嘅番薯識得啲咩喔？可能見我生得俊俏啩？」
 
楊鳳瑤冷笑一聲，道：「方唔係你對住人地講到天花龍鳳，話自己咩都識。你正式返工嗰陣，被人拆穿你原來只係講大話，到時就會趕你走喇！」
 
我指了指柳豔、再指了指呂靜宜，道：「本來我諗住出糧嗰陣請曬妳地三個食飯，依家可以請少個。」
 
楊鳳瑤冷哼一聲，道：「唔請咪唔請囉！我好希罕咩？」




 
我提早了十分鐘上班，由於我只是兼職，沒有自己的坐位，只好暫時借用還未上班的夜間同事坐位，待日間同事下班，再坐在日間同事的坐位上。
 
周小姐把我介紹給其他同事認識，然後叫一名男同事指導我，那名男同事叫RAY、二十出頭、身型有點胖、口有點臭，但樣子頗醒目。
 
RAY問道：「聽人講，你做過依行，你應該好熟手啦？」
 
我謙虛道：「做過下，不過每間公司都有唔同嘅做法，我要跟RAY哥你學野。」
 
RAY為我開啟了桌上的電腦，再輸入了password啟動了這間公司的system，這公司的大多數文件好像master waybill、house waybill等，均需要透過這個system編制。
 
RAY道：「你用住我個名入去個system度先，我教你用一次個system出單先。」
 
RAY在我面前示範了一次，我瞧見他是用兩隻食指（俗稱為螳螂拳的打字架式）在鍵盤上輸入資料。
 




他問：「你明唔明？」
 
我點頭，他給了我一單shipment booking和收貨紙，要我編制那shipment的house waybill、master waybill等文件。
 
我完成後給他檢查了一片，他點頭讚道：「有經驗，真係唔同啲，咁快上手。」
 
他續道：「睇嚟我今日唔駛點ＯＴ，有你幫我手。」
 
他話畢，把手頭上的部份工作分發給我，道：「你打住單先，有咩唔明就問我？」
 
時間過得很快，夜間同事陸續回來，我把位置還給了夜間同事，拉了一張空椅子坐在RAY的身旁。
 
七點正，吾先生和周小姐陸續離開，日間同事向夜間同事交待接手的工作，我聽見RAY離開時，道：「你地啲卡，我六點前幫你地打咗，我地啲卡你地幫我地打十點。」
 
我聞言已經對他們的一切了然於胸，他們日更的同事在夜更同事未回來，就替他們打卡；而夜更同事會在日間同事離開後的兩三小時後，才替他們打卡，這是空運界的員工慣常手法，用來騙ＯＴ錢的，就算公司高層知道，只要不太過分，大多也會睜隻眼閉隻眼的。




 
夜間當值的同事有三人，有見工那天替我開門的中年男人，他叫阿聰，其他同事喚他作聰哥，職位是supervisor；另外，有兩名同樣是二十多歲的男同事，一個叫ken，一個叫joe。
 
Ken的桌面上有一個由另一間空運公司HELP MEN所印製的坐檯曆，每一個月均有一張全裸的ＡＶ女優硬照，我認得的ＡＶ女優有小澤圓、直樹舞子、村島和津實，我相信這個坐檯曆陪伴了他度過無數個寂寞的晚上。
 
Joe的桌面上有一張他與一個手抱小女孩的女人合照，相信那應該是他的太太和女兒。
 
聰哥道：「victor有依行經驗，應該好快可以上手。」
 
Joe道：「咁就好喇，我唔想日日做到頭班車都無得走啊！」
 
聰哥把一疊文件交給我，道：「victor，你幫我地打框，同cut lot先。」
 
我接過那疊文件，便暫用RAY的坐位工作。
 




八點半時，聰哥說慶祝我今天第一日上班，他請我到附近的茶記吃晚飯。
 
吃飯時，我聽他們說，他們會每兩星期調更一次，由晚更變回早更。另外，Ken對我說要小心另外一更叫做米仔的男同事，說他很麻煩，經常在工作上佔人便宜。
 
連聰哥亦搖頭嘆道：「依條友都係麻煩友，同好多同事發生衝突，你自己小心啲啦！」
 
晚上十點，聰哥道：「victor，夠鐘喇！你啲野交返畀我地，你收工啦！」
 
Ken接收了我的工作，笑道：「今日進度理想，應該四點前可以收工。」
 
Joe道：「都係有victor係度，佢好熟手，地獄星期六就靠你喇！」
 
「嚇！星期六會好甘架？」
 
聰哥道：「你地唔好嚇親人，搞到佢唔做，到時你地自己受番咋！」
 
我由公司步行回家，途經石梨巴士總站，瞧見姚智風、郭左傑、宛琳珊與盛衣貝從３１Ｍ巴士走下來，我與他們打了聲招呼。
 
郭左傑牽著盛衣貝的手，護送她回家。
 
姚智風目送宛琳珊的身影走遠，道：「大鳩志，你可唔可以陪我行陣？」
 
「哦！好啊！」
 
姚智風向我抱怨道：「明明係我睇中咗宛琳珊先，嗰陣阿祥明明鍾意緊楊鳳瑤，依家佢仲叫埋小西傑同盛衣貝幫佢…」
 
姚智風不斷向我數說陸泳祥的不是，我亦很同情姚智風的遭遇，但歷史是曾與宛琳珊相戀的是陸泳祥，而不是姚智風。
 
我道：「你地唔係講過兄弟爬山各自努力，類似依啲說話咩？你鍾意宛琳珊，就去同阿祥鬥過囉！大家公平競爭。」
 
「但係依家有小西傑同盛衣貝幫緊佢，我得一個人，勢孤力弱啊！」姚智風倏然道：「咦！大鳩志，你會企喺我嗰邊嘅！話曬我地都係鋤ＤＥＥ會四大長老。」
 
「嚇！依家係溝囡，又唔係講數，我企喺你嗰邊幫你吶喊助威咩？」
 
「你坐係宛琳珊隔離，可以幫我收風架！等我可以知道多啲宛琳珊嘅野，阿祥有盛衣貝幫佢收風，我就有你幫我。」
 
我點頭：「依樣舉手之勞，我可以幫到你，但係你打算點追宛琳珊？有咩行動啊？」
 
姚智風搖頭，道：「未有部署。」
 
我聞言不禁搖頭，道：「坦白講，你覺得有咩地方比阿祥優勝？」
 
姚智風搖頭。
 
「咁你覺得自己有咩優點可以吸引到宛琳珊？」
 
姚智風認真地想了想，然後再次搖頭。
 
看見他頹喪的樣子，我拍了拍他的肩膀，道：「咁又唔駛成隻死狗咁嘅！其實溝囡嘅野，你有錢有樣固然無往而不利，你無都可以參考下傳統智慧，膽大、心細、面皮厚。」
 
姚智風苦笑道：「依三樣野，我好似都唔夠。」
 
我道：「咁你追女仔，係要大膽，唔怕醜架。其實你又唔係完全無優勢，阿祥住荔景，你同宛琳珊都住石梨，近水流台，你地收工搭嗰程車，都可以混熟下啦！再唔係你地住咁近，你可以約佢番學架！」
 
姚智風搲頭道：「嚇！咁樣好似幾麻煩下，我諗下先。」
 
我差點想一拳打在姚智風的臉上，現在是他追求別人，這樣又嫌麻煩，那樣又覺得不好，儘管在陸泳祥與姚智風二人中，我是較支持姚智風的（原因是陸泳祥的未來職業），但看到他這樣子，就是一個扶不起的劉阿斗，如果我是宛琳珊亦不會選他。
 
難怪日後姚智風會與何敏傑、黎早強為伍，齊齊組團北上尋歡，這種只需付錢買春，無麻煩的交易，才適合他。
 
看來他要我的幫助，只是圍爐取暖，找一個聆聽者，訴說自己的不幸與悲傷而已。
 
而歷史又會否重演，讓陸泳祥與宛琳珊「再次」相戀呢？
 
時光荏苒，歲月如梭，不經不覺我已在吾萬達物流有限公司工作了一個多星期，扳起手指一算，原來我回到了１９９８已經有個半月了，但細心一想，其實這個半月裡，我過得異常充實。由醫院出來；重遇遊大輝；選擇多修三科；認識了柳豔、楊鳳瑤、呂靜宜；與４Ｅ班陳志安衝突；進行了為阿興復仇的計劃；在吾萬達物流有限公司當兼職。
 
儘管我要上學、自修多三科選修科、當兼職，我還是每天堅持抽出時間來跑步及進行力量訓練。從前我的時間管理是很差的，常常混混噩噩讓時間過去，很多事情也做不好；而現在我為自己建立了一套規律的生活作息，按照自訂的時間表嚴格執行，例如每天，我堅持六點半起床，然後去跑步及進行重力訓練，七點半前回家洗澡，然後上學。另外，我又會選擇物理、中文、化學的課堂來休息；加上，每次溫習時，我均會定下目標進度來去強迫自己完成，不要對著書本發呆浪費時間。
 
這時候我才明白前人的一句話——時間就等於女人的胸脯，只要你願意用力擠出來，還是有的。
 
中文堂，李老師繼續以他那獨特的教學方式來授課，以自己朗讀及點名叫同學朗讀（通常都是那四五個同學）的形式來完成了歐陽修的醉翁亭記。
 
了解到時間管理重要的我，當然把握機會去補眠，每天我差不多一點才上床睡覺，每天六點半起床，睡眠時間不足六小時，只好每天找空檔去休息。老實說，如果是２０１６年的我相信是捱不了這麼長時間只睡六小時的生活，但我這不足十六歲的身軀，精力異常充沛，而且記憶力及學習能力，均比三十三歲時的我要高，難怪別人說，書要趁後生的時候唸，十多歲的年紀仍是一個學習的黃金時期，真後悔以前把時間浪費在其他地方。
 
下課的鐘聲把我從周公處喚回來，當我豪邁地以手擦拭著掛在嘴角的唾液，我察覺到坐在隔離披頭散髮的宛琳珊揉搓著一雙惺忪的睡眼，看來她亦與我一樣，也從周公處回來。
 
我打了一個呵欠問道：「妳好攰啊？」
 
宛琳珊點了點頭，道：「你都係喔！瞓到打曬鼻鼾。」
 
我有點尷尬問道：「好大聲啊？」
 
宛琳珊搖了搖頭，道：「唔係，只係我聽到嘖！」
 
「唔好意思。」
 
接下來的生物堂，面對一向嚴謹的老馮，當然全班同學亦要抖擻精神去應付，所以每次上完生物堂，我亦會感到很累。
 
下課後，我伸了個懶腰，道：「哎呀！嘩！真係好惡頂，頭先連喊路都唔敢打。」
 
宛琳珊瞥了我一眼，道：「我就話要番part time，所以咁攰嘖！你又唔駛，尋晚打機打到唔捨得瞓啊？」
 
我苦笑道：「其實唔係得妳一個有做兼職架！我都有架！」
 
宛琳珊訝異道：「你都有做兼職？做啲咩？」
 
「係打磚坪街一間物流公司到做空運出口文員。」
 
「嚇！文職咁好？幾錢個鐘啊？」
 
「五十蚊個鐘。」
 
宛琳珊雙眼發光，道：「咩話？成五十蚊一個鐘咁好，介紹我去做喔！」
 
我苦笑道：「要有經驗架，仲有份工雖然係文職，但係都好辛苦架！上個星期我就番咗三十二個鐘，個人返到好攰架！」
 
「嚇！你返咗三十二個鐘，加埋咪有成千六蚊，差唔多等於我一個月嘅人工，咁你返一個月，就有六千四？」
 
我笑道：「妳啲數口都幾精喎！」
 
「依家聽到你一個鐘有五十蚊，就唔想返我依家嗰份上校雞，又要企、又辛苦、人工又少。」
 
我道：「其實以妳咁嘅天賦，妳要搵更加多嘅錢，都好容易嘖！」
 
宛琳珊立時臉如寒霜，道：「你咁講係咩意思啊？」
 
瞧見她這樣子，我相信她誤會了我慫恿她去當那些不道德的交易，我連忙解釋道：「我無任何不軌嘅企圖，亦都無咩不堪嘅想法，只係想話妳咁靚女，依個世界又奉行『你的樣子如何，你的日子也必如何』嘅定律，你將來前途一定一片光明嘖。」
 
我直接讚美宛琳珊的樣貌，害得她雙頰昇起了一片紅暈，我又忙著解釋道：「妳應該知道陸泳祥同姚智風都明戀妳，我係唔會咁衰仔，做啲對唔住朋友嘅野，雖然妳的確好靚。」
 
我的話惹得宛琳珊發噱，她笑道：「你咁樣算唔算出賣兄弟啊？」
 
「咁佢地兩個擺到明係想追妳啦！不如妳快啲係佢地當中揀一個啦！佢地依家心裡面都有條刺喺度，妳快啲做決定啦！」
 
宛琳珊嗔道：「邊個話我一定要喺佢地裡面揀一個架？」
 
「咁妳兩個都唔揀都好嘅，佢地唔駛因為妳連朋友都無得做。」
 
「唔想佢地朋友都無都做，咁不如我揀你喔！」
 
「嚇！」我詫異地瞧著宛琳珊。
 
宛琳珊臉上漾起了一個甜美的笑容，道：「我幫你做場戲，扮同你一齊，咁佢地就唔會不和啦！不過做依場戲，我要收你二千蚊。 」
 
「嚇！二千蚊。」
 
「係啊！你之前講到咁為朋友著想，唔係二千蚊都唔捨得啊！」
 
我難以理解宛琳珊的行為，亦對她的說話感到有些氣憤，所以我亦戲謔道：「有靚女同我做場戲，二千蚊當然抵畀啦！但係做戲做全套，扮情侶當然要做情侶應該做嘅事，如果唔係佢地會唔信架，妳話係咪？」
 
宛琳珊霞燒雙頰，靦腆道：「最多拖手。」
 
「嚇！咁點得啊！平時我見到啲公公婆婆一個人過馬路，我都會拖佢地過馬路，咁唔通人地又當我同佢地係情侶咩？」
 
「咁你想點？」
 
「咁當然越親密越好啦！錫啊！摸啊！攬啊！依啲基本啦！不過拍戲都唔係一ＴＡＫＥ過，要排戲架嘛！我本身又無咩演戲天份，妳同我綵排番三五七個禮拜，我相信我勉強可以扮得似囉。」
 
宛琳珊怒道：「你當我係咩啊？我係咁隨便嘅咩？」
 
宛琳珊瞥見我在偷笑，知道我剛才是作弄她，她氣也為之消，臉上再次掛起了冰山融化般的笑靨。
 
 
 
 
 

=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl