<第叄期實體書,經已有售>今年我三十三歲,回到了1998年 (校園、穿越、奇幻): Chapter １９ 犯我家人者，雖惡必誅（上）

Chapter　１９ 犯我家人者，雖惡必誅（上）
 
第二天，小息的時候，simon lee要我去找他。
 
於是我便到教員室找他，他把數份的中史工作紙交給我，道：「成皇志同學，你做完就交畀我，我幫你改。」
 
「係，唔該李老師。」
 
simon lee再問道：「仲有啊！你想唔想考中史嘅中期試？」
 




我頷首道：「好啊！考試係一個驗證自己係咪真係識嘅最好方法。」
 
simon lee道：「咁好喔！就揀中期試最後嗰一日，你考完最後一科嚟學校圖書館搵我，到時照樣兩小時作答，夠鍾就收卷。」
 
「好啊！唔該晒！李老師，不過依家先係十月，一月先係中期試，依家講好似好長遠咁。」
 
simon lee搖頭道：「時間過得好快，眨下眼就到聖誕新年，跟住就到中期試架喇！你要努力啊！」
 
「係！李老師，唔該晒！」
 




小息的鈴聲響起，我才回到班房，坐在我前方的成敏研道：「小志，頭先４Ｅ班嘅陳志安又嚟搵你，今朝佢早會前已經嚟過，不過你唔喺到。」
 
我感到有點奇怪，道：「咦！我都唔識佢嘅，佢嚟搵我做咩啊？」
 
成敏研憂心道：「佢嚟搵你嘅時候，個樣好惡架，你係咪同佢有咩過節？」
 
我沈思了半晌，才道：「嗯！無理由喎？我同佢都無交流，點會得罪佢啊？」
 
此時，坐在成敏研右方的宋蓮回過頭來，冷笑一聲，道：「有陣時啲野，唔係你直接得罪咗人，可能有人睇你平時嘅所作所為唔順眼？幫其他人出頭呢！」
 




我語帶譏諷道：「咦！依位同學好似知道係咩一回事咁喎？不過如果講到犯眾憎，同閣下比起上嚟，小弟真係甘拜下風。」
 
宋蓮聞言只是嘿嘿一笑。
 
瞧著宋蓮這副「食住花生等睇好戲」的模樣，我相信她一定知道內情的，想到她那句「…幫其他人出頭呢！」我心想：「幫邊個呢？我最多都係得罪咗陳慧琼嘖？陳志安無理由幫個死肥婆出頭架？咦！唔係喎！陳志安明溝阿布正麗喎，佢會唔會因為尋日禮堂嗰件事，嚟搵我晦氣呢？」
 
午飯時，我們的話題再一次圍繞著布正麗。
 
林海原問道：「喂！大鳩志，尋日你同布正麗係禮堂發生咩事啊？」
 
我把昨天在禮堂發生的事如實相告，林海原的反應挺大，道：「欸！好心你男人老狗，就唔好同啲囡計較啦？做人大方啲得唔得？」
 
我苦笑道：「對布正麗，我已經好忍讓；但係肥婆琼，我就真係忍唔到啊！大佬！」
 
郭左杰道：「真係睇唔出大鳩志咁好火同咁大膽，初初識佢成隻鵪鶉咁，啲囡同佢講多一陣野已經周身唔聚財咁款，依家牙尖嘴利屌到肥婆無聲出。」




 
姚智風點頭附和道：「小西杰咁樣一講我都覺，自從大鳩志『踩波車』跌親個頭之後，成個人變得古古怪怪，係咪畀鬼上身啊！」
 
他們再次提到這個問題，讓我不禁有點心虛，我和稀泥地嘿嘿一笑：「嘩！姚少你把口越嚟越似黎早洩，話我鬼上身，係啊！我個頭好似貓頭鷹咁１８０度轉去後面望到自己背脊添！講依啲？不如講返布正麗仲好啦！」
 
黎早強道：「大鳩志，你真係好似唔驚咁？你唔好睇布正麗人靚波大，就以為人地好易食，佢識好多黑社會架，靜間去８座食車仔麵，我都係唔坐你隔離。」
 
霍去登搖頭，道：「唔會架，我係８座住咁耐，都未聽過布甸會搵人打人。」
 
黎早強笑道：「凡事都有第一次，大鳩志你可能試到布正麗嘅第一次呢！」
 
「黎早洩，你出少句聲當幫忙得唔得啊？唔該！」
 
陳依官道：「不過陳志安好似因為尋日件事想搵你麻煩。」
 




我搖了搖頭，道：「依啲傻仔，以為搵我出氣，布正麗就會鍾意佢。」
 
飯後回到學校，下一堂是物理堂，我取出了不相干的中史工作紙，打算待會在物理堂的時候將它幹掉。
 
此時，走廊外一片聒噪，未幾有人在門口喊道：「成皇志，喺唔喺度？快啲同我出嚟！」
 
我聞聲瞧去，陳志安出現在４Ｄ班門外，他身後跟隨著幾名看熱鬧的同學，其中一人是陳慧琼。
 
宋蓮不懷好意地別過頭來，道：「成皇志，有人搵你啊！」
 
我在心裡操片了宋蓮的祖宗十八代。
 
經宋蓮一提，陳志安已經知道貨真價實的成皇志就坐在４Ｄ班房內，他指著我，嚷道：「你就係成皇志喇！你同我出嚟。」
 
「你叫我出嚟就出，依家我收你錢幫你打工啊！」




 
陳志安道：「好！你唔出嚟，我入嚟都一樣。」
 
陳志安走向我，我瞥見坐在我身旁的宛琳珊皺著眉頭，現出厭惡的神情，相信是嫌棄我會牽連到她。
 
我喊道：「得喇！唔駛麻煩你行過嚟，我出嚟。」
 
我走到黑板前，問道：「陳志安，你搵我咩事？」
 
「成皇志，我要同你隻揪。」
 
其他同學聞言，紛紛佔據有利的位置，露出一副「食住花生等睇好戲」的模樣。
 
我左手一舉，道：「等陣先，我又無得罪你，做咩無端白事同你打啊？」
 




陳志安指著我道：「你男人老狗去蝦布甸，我唔打過你都唔係男人啊！」
 
「吓！我幾時蝦佢？點蝦佢？不如你講嚟聽下，如果真係我唔啱，唔駛你郁手，我自己打自己。」
 
陳志安為之語塞。
 
我續道：「成件事就係布甸狂踢張凳，畀老馮捉咗出去，ＭＩＳＳ　ＬＯ仲想整多佢幾錢重添，你咁有正義感咁ＭＡＮ，話要為布甸主持公道，唔係應該去搵張凳隻揪、搵老馮隻揪、搵ＭＩＳＳ　ＬＯ隻揪咩？」
 
我這番話有節有理，贏得了幾名同學的鼓掌喝彩聲，陳志安臉上陣紅陣白，他冷笑一聲道：「咩啊！撩你隻揪淆晒底咁，都唔知你有無賓洲？驚嘅咪當住咁多人面前講聲對唔住，同扮狗叫囉！」
 
我繼續數落他道：「同學，淆底嗰個擺明係你啦！明明成件事，我又無出過手，又無屈過布正麗，問你我點蝦佢，你又講唔出，蝦佢嗰個係老馮、ＭＩＳＳ　ＬＯ同張凳，連張凳你都唔敢去揪，嚟依度搵我依個唔關事嘅人嚟攞尾彩，你就真係無賓洲嘞！快啲搵條衛生棉條塞住佢，啲Ｍ唔好流到一地都係啊！」
 
旁觀的同學爆出了一陣笑聲，文鬥陳志安已經輸得一敗塗地，他只剩下武鬥挽回面子。
 
陳志安其實犯了幾個大錯，第一，他在４Ｄ班的班房挑戰我，４Ｄ班房好歹也算是我的主場，除了宋蓮等少數份子，大多都是站在我的那一方；其次，他作客理應一鼓作氣，不由分說向我暴打一番，但他打著為布正麗主持公道的旗幟，打算站在道德高地拿光環，好待自己出師有名，豈料被我反過來數說一番，他要揍我的理由已經站不住腳。倒過來氣勢已經此消彼長，就好像黃易的武俠小說那樣，彼此實力接近的時候，講究的是雙方精神氣場，現在陳志安處處也落於下風，失去天時、地利、人和，如果還有點智慧，理應掉頭走人。
 
可是我還是高估了陳志安的智商，他怒道：「總之，我睇你唔順眼，依家同你隻揪。」
 
「無問題，約個時間地點啦，同你講聲，我依一兩年都唔係好得閒，三年後，決戰紫禁之巔，有無問題？」
 
陳志安掄起拳頭，猛喝一聲：「就依家。」
 
雖然我一直放嘴炮，但我暗地裡還是打醒十二分精神，瞧見他一有異動，我馬上向後一退。
 
陳志安穿的是ＹＯＲＫ喇叭褲和木底皮鞋，這樣影響了他動作的靈活性，他一擊不中，居然腳下一滑，被第一排的椅腳拌倒，整個人失去平衡，撞向正在近距離「食住花生等睇好戲」的宋蓮身上，兩個人撞成一團，推倒了第一排不少座位後，宋蓮倒在地上，不斷呻吟呼救，而陳志安則壓在宋蓮身上。
 
圍觀的同學反應不一，坐在前排的林海原道：「屌，我啲野啊！仆街！」
 
站在後排的霍去登抱腹大笑，道：「條友咁柒，打唔到人，自己仆埋街添！」
 
陳志安爬起身，漲紅著臉。
 
我安撫道：「嗱！同學唔關我事架，我無出手架，係你自己仆街，同宋蓮攬炒咋！」
 
陳志安大喊一聲：「我要屌撚死你！」便奔向我。
 
我瞧見他宛如暴走中手持雙刀的甜筒輝一樣，立時心中為之一怯，馬上掉頭走人。
 
我們在４Ｄ班房追逐了一圈，便跑出班房門口，他在我身後追趕。
 
他喊道：「你條戇鳩仔唔好走啊！」
 
痴線！你成隻顛狗咁衝埋嚟，我唔走真係戇鳩仔嘞！
 
眼看這一場追逐戰沒完沒了，布正麗出現在我的前方，她指著我身後的陳志安喊道：「喂！你顛夠未啊？」
 
這時陳志安才恢復理智，解釋道：「布甸，條友蝦妳，我幫妳出頭咋。」
 
布正麗並不欣賞陳志安的獻殷勤，掌摑了陳志安一巴，道：「邊個話佢蝦我，憑佢蝦到我咩？」
 
布正麗這一記耳光用力非淺，陳志安摸著臉上清晰可見的掌印，居然沒有生氣，和顏悅色道：「布甸，我咁做都係為咗妳嘖，你知我一直對妳都…」
 
布正麗又是一記力度十足的掌摑，冷冷地道：「你以為你係我邊個？唔好做埋啲白痴野，惹埋啲麻煩畀我，知唔知啊？」
 
陳志安雙手撫著兩邊臉頰，呆呆地站在一旁點頭。
 
眼見這情景，我才相信原來聖經的記載真有其事，這世上居然有人被摑了左邊臉，還會伸出右邊臉給人掌摑。
 
布正麗瞥了我一眼，冷哼一聲揚長而去，而陳志安則像跟屁蟲一樣，朝著布正麗的身影亦步亦趨。
 
這天的物理堂在實驗室進行，物理導師是一名姓董的男老師，為人憨厚害羞，女同學站近他一點，亦會臉紅那一種，教學水準僅比教化學那個科學怪人要好上一點點。
 
這一堂，董老師教那些衍射、折射、反射，由於我物理真的不行，要講射的話射波或者射精，我反而可以倒過來指點董老師一二。
 
物理、生物與化學堂均是分組上實驗堂的，我、成敏研、盛衣貝、方詠珊、郭左杰一組。
 
董老師刻板的聲線及乏味的教學手法，並未能引起同學的學習動機，我那組成員，話題亦離不開了剛才陳志安來挑戰我，最後敗興而回的事。
 
郭左杰笑道：「大…成皇志，你威喇，依家係大紅人，成間學校都知道你個名喇！」
 
可能礙於有女同學在場，郭左杰的用詞亦比較收斂，我道：「傻啦！我不嬲為人低調，啲傻仔同是非要衝埋嚟我都無法架。」
 
成敏研笑道：「你低調，最近你都好出位喎！」
 
「吓！咁我都係忠於自己，世俗嘅眼光咁睇我，我只可以講句no comment。」
 
同組的盛衣貝與方詠珊笑意盈盈，方詠珊位列吳林紫娣的校花榜上，漂亮是必然的；但原來盛衣貝笑起來的時候，亦很甜美迷人，我不禁暗讚郭左杰有眼光。
 
成敏研笑道：「小志，我之前仲以為你個人純純品品、怕怕醜醜，估唔到你頭先咁ＭＡＮ，鬧到陳志安粒聲都無得出，你幾時把口變得咁叻架？」
 
成敏研越坐越近，她的模樣儼如發情的貓兒一樣，我是從２０１６年回來，已活了三十三個寒暑，女人見多了自然懂得察言觀色，暗地裡叫聲糟。
 
我一直知道成敏研暗戀我，但她那副王一梅的身型和王一梅的樣貌，小弟實在無福消受，還是留給她那位未來警察老公吧！
 
我把椅子挪開了一點，瞧見隔鄰組的宋蓮額上貼著膠布，不禁道：「唔係我把口叻，我講嘅都係事實，你地頭先都在場，見到我相當克制，佢不斷挑釁我，我都係和顏悅色同佢講道理，佢主動郁手打我，我反而退避三舍，畀人話淆底，我份人呢！就係咁好人嘞，做好事、說好話、存好心。」
 
我這番自吹自擂的話，連身在另一組的陳依官和曾倩萍聞言也暗暗偷笑，我觀察到宋蓮的臉色本身黑如玄壇，聞得我這番話臉色變得陣紅陣白。
 
我續道：「人在做，就天在看，大家讀同一班呢！係緣份，係上世修落嚟嘅福氣，同班同學，本應該守望相助、相親相愛，之但係相由心生，有啲人呢，個樣生得奇醜無比呢！內心都寧舍厚黑歹毒，出賣自己人啲咁ＰＫ嘅野都做得出，古時要畀人拉去浸豬籠架，之但係，天有眼架嘛！我依啲善人嚟架嘛！我呢就咩事都無，打人同食花生嗰個呢！就好似打保齡咁撞埋一齊，依啲咪叫『食花生食著屎』囉！嗱！戴番個頭盔先啊！依番說話我並無針對任何人架，不過如果有人對號入座呢！就非我嘅能力可以控制喇！」
 
我的話讓曾倩萍很矛盾，她很想笑，但好歹宋蓮也是她的朋友，如果她笑出來，便很沒義氣，所以她憋笑憋得非常辛苦。
 
宋蓮聞言，臉色由黑轉紅再轉青再轉白再轉黑，她臉上顏色的變化比紅綠燈還要豐富，我見狀不禁大樂，忍受了十八年的烏氣，終於在回到１９９８後，自己為自己報回了一箭之仇。
 
放學後，我如常前往學校的圖書館溫習，步進圖書館，我瞧見楊鳳瑤、呂靜宜與柳豔。
 
我問道：「咦！呂靜宜，妳唔係話今日唔得閒咩？點解喺度嘅？」
 
呂靜宜道：「本來今日係要去學琴，但鋼琴老師今日唔得閒，我又見你地咁積極溫書，與其一個人喺屋企溫，不如一班人一齊溫，可以互相激勵下呀嘛！」
 
楊鳳瑤瞧見我，立時問道：「喂！聽人講你頭先同人打交喎？究竟發生啲咩事啊？」
 
柳豔聞言也吃了一驚，連忙問道：「咩話？成皇志，你同人打交？」
 
我平舉雙手，示意她們冷靜，我道：「我要澄清一樣野，當時我係絕對無出到手架！」
 
呂靜宜亦問道：「你無出手？但係我見陳志安好似畀人打完咁？其實頭先發生啲咩事嘖？」
 
看見三張求知慾滿瀉的臉孔，相信我講故事的時間又到了。
 
我巨細無遺把事情向她們說了一片，楊鳳瑤道：「超！都唔知你係咪吹水嘅，當時咁嘅情況下，你可以講到咁長篇大論嘅野？好難令人相信囉！」
 
「嘿嘿！唔信妳問下盛衣貝，當時佢都在場，如果我要吹水，就話自己英勇無敵，兩三下打到陳志安瞓低，而唔係同妳講畀佢追九條街啦！最後仲要布正麗昇佢兩巴，我先無事。」
 
柳豔流露出不好意思的神情，她道：「其實成件事最初都係因為你幫我出頭，先攪成咁…」
 
我斷言道：「學姐，妳唔駛唔好意思，依個世界通街傻仔，我年終都遇到唔少，更何況今次，我毫髮未傷不特止，條傻仔仲同宋蓮撞埋一堆。」
 
三人聞言想像到當時的情景，也忍俊不禁掩嘴偷笑。
 
瞧到吳林紫娣三位校花的巧笑倩兮，笑起來千嬌百媚，各人有各人的美態，這情景就是另一種花潮。
 
龔自珍在西郊落花歌中所說：「如八萬四千天女洗臉罷，齊向此地傾胭脂。」
 
我相信亦不外如是。
 
六點正，離開了學校圖書館，回去阿婆的家吃晚飯，還未打開門，門後已經隱隱傳來了一陣聒噪，敞開門後，我瞧見阿興在哭，而阿婆在為阿興塗上黃藥水，當阿婆的黃藥水塗在阿興身上的傷口時，他哭道：「好痛啊！」
 
阿公站在一旁責難，道：「都叫咗你放學返屋企，唔好去球場玩，球場多飛仔，你睇依家畀人打喇！我有無講錯？」
 
瞧見阿興口唇皸裂，身上多處地方瘀瘀青青，我立時問道：「阿興，點解你攪成咁啊？」
 
阿興哭哭啼啼地向我道出了事件的經過：
 
原來他今日放學與同學顧晉榮一起去猩猩猿隔鄰的籃球場玩，兩人在一旁打ＧＡＭＥ　ＢＯＹ時，遇到了另一名叫番獌的同學，雙方發生爭執，發生了推撞，而那名叫番獌的小孩不服氣，喚來他的兩名年近廿歲的哥哥，一名叫拳佬、一名叫牙佬，兩人打了阿興及顧晉榮一頓後，還摔爛了他們的ＧＡＭＥ　ＢＯＹ，顧晉榮傷勢較輕，他把阿興送回來。
 
聽完阿興的轉述及看見阿興的傷勢，我不禁大怒，回到了１９９８後，我在醫院向阿興保證，如果有人欺負他，我一定為他主持公道。
 
瞧見阿興的狀況，我問道：「阿興，你見點啊？」
 
阿興哽咽道：「我成身都好痛，部ＧＡＭＥ　ＢＯＹ仲爛埋添。」
 
我問道：「不如去醫院睇下啦？」
 
阿婆道：「皮外傷嘖，邊駛入醫院咁嚴重啊？查咗黃藥水，捽咗跌打酒，聽日唔好返學，抖番日就無事啦！到時無效先算啦！」
 
晚飯後，阿興留在阿婆家裡休息，他打電話向阿媽哭訴被人摔壞了ＧＡＭＥ　ＢＯＹ，阿媽答應了他下個月買一部ＧＡＭＥ　ＢＯＹ　ＣＯＬＯＲ給他，他立時擠出了笑容，對他來說，可算是因禍得福。
 
離開前，阿興拉我到一角，悄悄問道：「哥，不如將件事同爸爸講，叫佢幫我出頭，好唔好？」
 
我皺了皺眉，道：「同佢講有咩用？佢依家無野做，唔通佢同拳佬牙佬打咩？佢邊度夠人打喔？」
 
「有肥佬陞同青雲係度嘛！佢地三個加埋應該打得贏拳佬同牙佬，再唔係加埋我同你同顧晉榮囉！」
 
對於阿興天真的想法我不禁發噱，道：「阿興，肥佬陞同青雲都有工返，邊度會理你依啲小事喔！阿哥，同你講過要保護你，如果有人恰你，我實幫你，依單野交畀我，阿哥一定會幫你報仇嘅！」
 
阿興現出一臉不相信的神情，他道：「哥，拳佬同牙佬年紀又大過你，又大隻過你，你實唔夠佢地打架，你之前都畀佢地打到入醫院啦！」
 
阿興提到的那件事，發生在我唸中一的時候，那次，我和拳佬牙佬的弟弟貓仔在大窩口的五人足球場踢比賽，貓仔那隊被我們大炒六比零，他不服氣，和兩名哥哥拳佬牙佬，三人合力打了我一頓，就是這樣我足足在仁濟醫院睡了一晚。
 
拳佬、牙佬和貓仔三人是石蔭真技安秦代哥的手下，在石梨的聲勢足以與８座的數字幫分庭抗禮。
 
舊恨再添上新仇，他們暴打我那一筆帳我可以算；但阿興那筆帳，我一定要他們連本帶利歸還。
 
那管對方是天王還是老子，犯我家人者，雖惡必誅。



以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl