<第叄期實體書,經已有售>今年我三十三歲,回到了1998年 (校園、穿越、奇幻): Chapter １８ 文德皇后　

Chapter　１８　文德皇后　
 
布正麗平常的一舉一動均會成為全校焦點，而她被ＥＧＧＨＥＡＤ捉到帶煙回校的消息，一個中午經已遍傳吳林紫娣的每一個角落，我們在午飯的時候，同樣離不開這個話題。
 
布正麗的其中一個仰慕者林海原問道：「大鳩志，究竟當時發生啲咩事？」
 
「吓！我坐喺班房最後嗰排，你問下依官好啲，佢當時坐係附近喎，應該睇得清楚過我。」
 
陳依官道：「當時我見到嘅情況係咁嘅，座喺布正麗個位嘅管佳莉喺櫃桶攞個筆袋出嚟，可能唔小心拉咗布正麗包煙出嚟，咁就畀ＥＧＧＨＥＡＤ發現咗。」
 


姚智風道：「你地話會唔會管佳莉特登咁整鬼布正麗啦？ＥＧＧＨＥＡＤ擺明唔妥布正麗係人都知啦！管佳莉喺依個位要攪布正麗易過借火。」
 
我聞言有點惱怒，反問道：「玩陰謀論，咁做對管佳莉有咩好處？」
 
何敏傑道：「囡同囡之間有好多是非，表面睇就好地地，暗地裡可以鬥過你死我活，或者管佳莉妒忌布正麗靚過佢、身材好過佢、受歡迎過佢都唔奇。」
 
陳依官道：「咁你地又唔好諗到管佳莉咁厚黑，我相信佢係唔小心嘖，唔係專登害布正麗嘅！」
 
我讚道：「嗱！讀得書嘅，真係唔同啲嘅，思路清晰，講野都零舍有文有路，唔似得你地又話人有陰謀又話人厚黑。」
 


林海原憂心忡忡道：「總之依家布正麗就係受害者，唔知ＥＧＧＨＥＡＤ會點對付佢？」
 
黎早強道：「咁又唔好講到管佳莉咩事都無，曾倩萍話陳慧琼當場鬧喊管佳莉，話佢嘅唔小心害死布正麗。」
 
我怒道：「依條死肥婆，體胖心黑格衰脾氣臭自我中心，偷食肉不特止，仲係兩面三刀，賣友求榮嘅人，枉管佳莉同佢做朋友唔介意影衰自己，點知畀個良心佢，佢當狗肺，條肥婆喺朋友有難嘅時候，唔幫手不特止，仲要補多刀。」
 
郭左杰問道：「大鳩志，乜你唔係同管佳莉分咗手咩？仲咁幫住佢。」
 
郭左杰的話讓我有點窘困，我道：「咁咪代表我對事唔對人囉！」
 


林海原嘆息道：「唉！唔知ＥＧＧＨＥＡＤ會點罰布正麗呢？」
 
霍去登道：「帶煙返學，應該記兩個缺點至一個小過咁上下啦！」
 
林海原道：「吓！要記小過咁嚴重？」
 
陳依官道：「咁一個小過對布正麗嚟講又唔係啲咩大件事，以我所知佢好似已經畀人記咗兩個小過。」
 
我附和道：「係啊！對於吳林紫娣嘅大家姐嚟講，無返一兩個大過喺身，會畀人笑架。」
 
林海原瞪了我一眼，我道：「其實呢！出嚟搵野做，學校張成績表，鬼有人睇你咩？話知你有兩個大過又好、兩個大功又好，都唔會影響你見唔見得成嗰份工。」
 
何敏傑問道：「你又知？你出嚟見過工咩？」
 
我在另一個時空當然試過，但我並不能如實說出，我道：「我都係聽人講咋。」


 
郭左杰向一直一言不發的陸泳祥，問道：「阿祥，今日咩事咁靜啊？」
 
陸泳祥見自己成了所有人的焦點，只是嘆了口氣。
 
姚智風道：「令男人煩得兩樣野嘖！錢銀同女人，前者你一向唔愁，你屋企三個家姐都出晒嚟做野，每人每個月畀成千蚊零用錢你；至於後者，你仲未講星期六楊鳳瑤上你屋企發生咗咩事？」
 
陸泳祥瞪了我一眼，道：「唔好提喇！」
 
其他人把視線轉向我，林海原道：「係咪大鳩志勾二嫂啊？如果係嘅話，阿祥，我地幫你奄咗大鳩志。」
 
郭左杰道：「係呢！你地有無發覺自從大鳩志撞親過頭，係醫院出返嚟之後，成個人唔同晒，古古怪怪咁，放學又唔同我地鋤ＤＥＥ，成日痴埋去啲囡到。」
 
我聞言有一點心虛，道：「邊度係呢？你唔好疑神疑鬼先得架。」
 


陸泳祥搖頭道：「經過星期六件事，我先發現其實楊鳳瑤唔係咁適合我，但係話晒我暗戀咗佢成兩年，一時間唔可以話忘記就忘記。」
 
林海原道：「阿祥，你突然間有咁嘅轉變，係咪鍾意咗另一個人？」
 
陸泳祥點頭道：「都係阿原，你最明白我。」
 
霍去登問道：「阿祥，咁你依家暗戀嘅係邊個？」
 
陸泳祥瞧著姚智風，道：「我懷疑自己鍾意咗宛琳珊。」
 
陸泳祥此言一出，其他人均把焦點轉向一直暗戀宛琳珊的姚智風，姚智風撥了撥額上的頭髮，道：「哦！無咩野，我又無同佢喺埋一齊，大家咪公平競爭囉！」
 
陸泳祥道：「係囉！最後邊個得手都好，唔會影響我地嘅感情嘅！」
 
雖然兩人口裡說得大方，但飯後他們並沒有交談過一句話。


 
今天的最後一堂是週會堂，週會堂大多數是在七樓禮堂舉行，如果要說一樣最值得讓吳林紫娣學生感到自豪的地方，就是擁有這一個戲院式的大禮堂，這個大禮堂樓底極高，有五六層樓高；劇院式的固定椅子，每張椅子亦有軟綿綿的坐墊；而且擁有兩層式的看台設計，足以容納全校過千名師生有餘。
 
這天週會堂的主題是關於音樂，安排了不同同學在台上演奏不同樂器。
 
我入坐後才發現，布正麗與陳慧琼坐在我正後方。
 
陳慧琼道：「布甸，妳件事，最後點樣？ＥＧＧＨＥＡＤ好似想咬住妳唔放咁。」
 
布正麗道：「佢搵埋老馮嚟，本來話要記我大過，但老馮話件事唔需要去到記大過咁嚴重，最後記咗一個小過，同罰留堂一個月嘖。」
 
陳慧琼道：「對唔住啊！布甸，一日最衰都係莉莉，我已經鬧咗佢，我叫咗佢靜間放學後嚟搵妳道歉。」
 
布正麗道：「其實諗深一層，又唔關管佳莉嘅事，佢又唔係有心，都係我無記性，無收起包煙，所有事都係意外，唔怪得佢嘅。」
 


陳慧琼讚道：「妳真係明白事理。係呢！之前聽譚慧詩講，話妳會行大運喎！點解突然咁黑仔嘅，係咪個相士無料到啊？」
 
布正麗笑道：「譚慧詩講野唔清唔楚，妳口中個相士唔係話我行大運，係話我條命貴不可言，通常話人貴不可言嘅就係皇后嘅命。」
 
陳慧琼笑道：「咁個相士實係無料到啦？話妳做皇后誇張到死。」
 
「如果係第二個我都可能唔信，但係同我講依一番說話嘅係轉世活佛西藏大喇嘛」
 
「吓！究竟成件事係點架？」
 
布正麗道：「九月尾嗰陣，我同譚慧詩、許詠欣過澳門玩，見到賭王有間新賭場開幕，有好多明星去剪綵，咁我地當然去睇下啦！剪綵嗰陣，賭王帶埋佢孻女柯麗華上台，西藏大喇嘛剪完綵，賭王當場請大喇嘛幫柯麗華睇下個面相…」
 
陳慧琼斷言道：「依單野，我記得啊！Ｃ１做過頭版，大喇嘛當住咁多人面前話柯麗華條命大富大貴，將來會係皇妃。」
 
布正麗續道：「睇完啲明星剪綵，我地都諗住走，突然有個工作人員同我講話西藏大喇嘛想見我，咁聽到名人想見我，我當然應承啦！入到一間房，佢就同我講，話我條命貴不可言，好似嗰個文德皇后咁旺夫，幫個老公建立咗一個國家。」
 
陳慧琼詫異道：「布甸，咁妳條命咪仲富貴過賭王個女？」
 
聽到這裡，我差點忍不住笑，我要雙手捂住嘴巴才勉強止笑，我相信那個大喇嘛應該是假冒的精神病患者，現在是什麼年代？世上那有這麼多皇帝，同一日同一場合，便碰到了未來皇后與未來皇妃，不過更好笑的是布正麗居然相信，難怪世上仍然有那麼多騙子，根本是這世上存在著太多水魚了。
 
此時，第一位學生上台表演，原來是柳豔，她以二胡奏出了我不知道是什麼來歷的曲子，但旋律很清新，宛如珠玉落盤一樣。
 
布正麗讚道：「拉二胡幾特別，學生會主席又拉得幾好聽。」
 
陳慧琼一臉厭惡道：「死大陸妹，廣東話都未講得正，就學人上台表演，正一波大無腦。」
 
真是的，名字有慧琼兩字，無論姓陳、姓李均是這麼無恥賤格。
 
我聞言喃喃地道：「死肥西，成身咁多脂肪，對波都唔夠人大，睇嚟都係塞住晒喺個腦度，諗野咪唔經大腦囉！上台拉二胡，同廣東話未正有春關係咩？」
 
身後的陳慧琼踢了我的椅背一下，罵道：「喂！你鬧緊我啊？」
 
我立時光火，別過頭去，瞪著陳慧琼，道：「點樣啊妳！妳認嘅咪話妳囉！」
 
瞧見陳慧琼一臉愕然，相信她還以為我還是那個懦弱膽怯的成皇志，現在的我連樓也敢跳，還怕妳區區一個死肥婆。
 
我續道：「妳知唔知依個世界好多人無野食架，好心妳將買雞髀嘅錢損去畀非洲兒童，再食食到妳爆血管啊！」
 
一旁的布正麗瞧見陳慧琼的臉色陣紅陣白，又一言不發，於是她幫腔道：「喂！死光頭仔，你把口乾淨啲啦，講啲說話咁難聽嘅。」
 
我指著陳慧琼道：「咁佢死大陸妹前死大陸妹後，咩波大無腦依啲說話又好好聽咩？」
 
正所謂得些好意須回手，瞧見她們兩人語塞，我也住口了，繼續欣賞台上同學的表演。
 
柳豔演奏完二胡後，便輪到宛琳珊演奏小提琴，最後輪到呂靜宜壓軸在台上的鋼琴演奏，她以鋼琴奏出耳熟能詳的卡農。
 
在我身後的陳慧琼道：「喂！你個人咁高遮住咗我，我睇唔到台上呂靜宜嘅表演啊！你坐低啲啦！」
 
我冷笑一聲，道：「睇唔到？妳咁有要求，不如上台去睇啦？個VIEW一定最好啦！」
 
在旁的布正麗，用腳踢了我的椅背一下，道：「死光頭仔，由頭先開始，就窒頭窒勢，你坐低啲又有幾難啊？」
 
儘管是布正麗的要求，但如果我現在退縮，不是對布正麗作出讓步，而是向陳慧琼低頭，想到從前陳慧琼對我作出的種種惡行，我立時硬氣，我幹麼要向妳這死肥婆作出妥協？
 
我反而腰桿坐得筆挺，布正麗見狀大怒，猛踢我的椅背，邊踢邊罵道：「死光頭仔，死八公。」
 
我依舊坐得筆直，坐在我兩旁的同學，瞧了瞧我，再瞧向身後的布正麗，布正麗踢得累了，踢擊慢下來。
 
我道：「係啦！妳踢張凳出氣，張凳唔痛，妳隻腳痛咋！都係唔好再踢好啲！」
 
布正麗怒道：「邊個話我隻腳痛架？」
 
布正麗話畢，她的踢擊更加用力、更加密集，把椅背踢得呯呯作響。
 
她的舉動終於惹起了巡視禮堂的老馮注意，他喝道：「布正麗，妳做緊咩啊？出嚟！前面嘅成皇志，你都同我出埋嚟！」
 
我與布正麗跟隨老馮，走出了禮堂，老馮問道：「你地頭先做咩？」
 
我瞧了布正麗一眼，道：「馮老師，我都唔知發生咩事？」
 
布正麗瞪了我一眼，老馮道：「我頭先見到布正麗係咁踢你張凳。」
 
我道：「咁馮老師，你睇到件事係咁，咁件事就係咁囉！」
 
老馮轉向布正麗，問道：「布正麗，妳頭先做咩啊？禮堂嚟架，妳發咩顛？妳知唔知今日妳已經畀人記咗個小過喇！再係咁，妳係咪想畀人趕出校啊！」
 
此時，ＭＩＳＳ　ＬＯ亦從禮堂內走了出來，她指著布正麗道：「馮老師，我一早已經同你講咗要嚴懲佢啦，你睇下佢頭先犯咗錯，依家仲毫無悔意咁，喺禮堂攪事，佢喺出面識嘅唔係壊人就係黑社會，唔會改架！」
 
布正麗被ＭＩＳＳ　ＬＯ數落得雙眸微紅，她狠狠瞪著ＭＩＳＳ　ＬＯ以示不滿。
 
ＭＩＳＳ　ＬＯ見狀，向老馮投訴道：「馮老師，你睇下佢，佢依家犯錯，仲用咁嘅眼神望住我，妳睇佢用啲咩態度嚟對待老師。」
 
馮老師一臉嚴肅道：「布正麗，妳依家咩態度啊？快啲同ＭＩＳＳ　ＬＯ道歉啦！」
 
一滴淚珠滑過了布正麗的臉頰掉在地上，布正麗倔強地道：「佢侮辱我啲朋友，點解仲要我同佢道歉啊？」
 
ＭＩＳＳ　ＬＯ見狀氣炸了肺，轉向我道：「同學，頭先發生咗咩事？係咪布正麗欺凌你，依家有我同馮老師係度為你作主，你唔駛怕，照直講出嚟，我地一定會幫你主持公道。」
 
很明顯ＭＩＳＳ　ＬＯ以我作藉口，重罰布正麗，但我與布正麗昨日無仇今日無怨，我才不會被ＭＩＳＳ　ＬＯ利用。
 
我瞥了淚盈於睫的布正麗一眼，便道：「其實係我唔啱在先，我同另一位同學發生爭吵，布正麗調停我地，頭先都係一場誤會嚟。」
 
ＭＩＳＳ　ＬＯ對我的回覆大失所望，她道：「同學，你真係唔駛驚喎？我同馮老師喺度，你可以講真話，無人傷害到你喎！」
 
「ＭＩＳＳ　ＬＯ，我講嘅都係真話。」
 
馮老師道：「既然係咁，成皇志，你返埋位坐先。啊！ＭＩＳＳ　ＬＯ，妳放心，依件事我會處理架，唔需要擔心。」
 
放學後，我到了學校的圖書館，瞧見柳豔、楊鳳瑤與呂靜宜共坐一圍，我走向她們時，已經聽到她們的聲音。
 
柳豔讚道：「靜宜，妳頭先彈嗰首卡農好好聽，妳彈琴嗰樣好認真好型啊！」
 
呂靜宜讚道：「邊係呢！學姐，識彈琴好正常嘖！妳先厲害，識拉二胡，我都想學啲有中國風嘅樂器。」
 
楊鳳瑤一臉羨慕瞧著兩人，道：「妳地就好啦！我都想好似妳地咁型可以上台表演啊！」
 
我走到她們面前，故作認真地把食指放在唇上，殊了一聲，道：「三位同學，請在圖書館保持安靜。」
 
三人別過頭來，楊鳳瑤瞧見我，便問道：「成皇志，頭先老馮仲咩捉咗你同布正麗出去？」
 
「哦！小事一樁。」
 
於是我便將剛才的事完完整整地娓娓道來，柳豔聞言，臉上一紅，道：「成皇志，你因為幫我出頭，所以同陳慧琼布正麗嘈交？」
 
我聞言有些尷尬，立時解釋道：「咁陳慧琼啲說話係難聽嘛！如果佢用同一番說話講楊鳳瑤，我都會咁做架。」
 
楊鳳瑤笑嘻嘻道：「成皇志，今次你死喇！我聽人講布正麗識好多黑社會架，可能依家學校門口已經有一班黑社會等你放學喇！」
 
「妳個死妹釘，我畀人打，妳好似好開心咁？」
 
楊鳳瑤吐了吐舌頭。
 
柳豔聞言擔心道：「成皇志，鳳瑤講得啱啊！我聽人講布正麗係依間學校嘅大家姐嚟架，佢可能搵佢啲朋友搵你麻煩，你都係小心啲好。」
 
呂靜宜道：「咁又唔會，我同布甸同一班，佢雖然有啲朋友係…嚟自三山五岳，但係佢無蝦過其他同學架，有時其他同學畀人欺凌，佢見到都會幫手解圍，比起嗰個不知所謂嘅牛辸明好好多。」
 
我應道：「係啊！嗰個專踢中一二學生入８座數字幫嘅牛辸明，就係同死妹釘同一班架。」
 
楊鳳瑤嗔道：「收聲啦你！」
 
呂靜宜補充道：「成皇志，布甸未必會主動搵你麻煩，不過你都知佢有幾多追求者啦！可能有啲人會幫佢出頭。」
 
我哈哈一笑道：「只要唔係學校出面嘅黑社會，依間學校啲人我未驚過。」
 
一名圖書館管理員經過，向我勸喻道：「麻煩同學係圖書館保持安靜。」





=15.6000003814697px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl