《將軍澳迴旋處上的時空裂縫》: 第三章最終回：找到戒指主人了！

 
第三章最終回：
找到戒指主人了！
 

時空裂縫打開後，第四日的早上。
 
「賢仔！揾到啦！
啱啱有個女人打黎話係佢唔見咗隻戒指呀！
我問佢隻戒指係咩樣，佢答得出係蝴蝶形，




連戒指入面刻住『LXB』佢都講到呀！係佢啦！」
 
「係！？咁有無話點樣交還戒指俾佢？」
 
「有呀！佢話陣間下晝親自黎單車舖喎。」
 
「太好啦！…… 不過，你頭先話係個女人打黎？」
 
「呃…… 係喎。點解係個女人黎架呢。」
 





電話筒內一片沉默。

 
「恐防有詐，都係唔好帶劉霞去，
我怕係尋晚嗰兩個Men in Black 啲同黨，
可能係黎引劉霞現身。我同你去見一見個女人先。」
 
＊＊＊＊＊＊＊＊＊＊
 




下午三時，我們要等的人來到了。
 
但沒有任何看似劉霞未婚夫的人。

來到的，是一位五十多歲的婦人，
以及一位二十歲的少女。
 
「你好呀，今朝打過電話黎，我哋係黎攞返一隻戒指架，之前唔見咗。」
 
我拿出那隻屬於劉霞未婚夫的蝴蝶戒指，給那個婦人和少女看。
 
那個婦人見到戒指後非常開心，說：

「真係唔該晒你哋呀，好彩揾得返咋！
依隻戒指好珍貴，好有紀念價值架！




最衰依個衰女包，咁重要嘅嘢都可以唔見嘅？」

婦人指著那個少女，語氣似是說笑，不是認真罵的。
 
「咩喎！人哋嗰日入咗醫院呀，仲點會記得漏低咗隻戒指架？」
少女反駁。
 
林少心急地問：「入咗醫院？點解嘅？」
 
 
 
那個少女嘆了一口氣，道：

「是咁的。
嗰日我同班 friend 黎踩單車。




喺你哋間單車舖租完車，就沿住將軍澳條單車徑踩啦。

踩踩下嘅時候，我條頸鏈無端端斷咗喎！
即係咁，隻蝴蝶戒指係穿住條頸鏈，掛喺我條頸上面嘅。
咁條鏈斷咗啦，咁我一手捉住佢，無俾佢跌咗去喎。
 
但我班friend 繼續踩緊架嘛，
咁我緊係嗱嗱聲，求其揾個地方袋住條鏈先啦。
咁啱間單車有個袋仔，咪袋落去囉。
 
之後講起就嬲啦！
都唔知將軍澳啲單車徑點設計嘅！！！
 
條單車徑斷下斷下唔在講，又成日掘路，
明明雙程路，無端端又封咗其中一邊掘路喎，叫人點踩？





斜路就仲過份！
唔平架喎！斜路有凹凸位架喎！
我嗰日就係落斜坡時，俾個凹凸位搞到炒車，
成個人撞咗埋條柱度，個頭係咁流血，仲暈埋，無晒意識。
 
之後我班friend幫我叫白車，入咗醫院縫針，住咗一個月先出院。
 
你話喇，我搞成咁，仲點會記得自己漏低咗隻戒指？」
 
 
 
 
 
我聽完一頭霧水。




為何整個故事，都沒有提及過劉霞未婚夫的呢？
 
 
我問那個少女：
「咁你識唔識一個叫黎曉波嘅人？」
 
 
那少女一臉疑惑，望一望婦人。
 
那個婦人答：
「即係契爺爺呀衰女包，咁都唔記得。
我哋識佢呀！黎曉波係我契爺，隻戒指就係佢親自送俾我架。」
 
我越聽越混亂。
黎曉波是這個五十多歲的女人的契爺？
劉霞未婚夫頂多都是三十多歲吧？
 
「佢送隻戒指俾你？咁佢而家喺邊度？」
 
「佢……過咗身喇。」
 
聽到這一句，
我和林少都晴天霹靂。
 
佢死咗！？
點會咁架？
 
剛剛才滿心歡喜，以為終於找到劉霞未婚夫，
事情可以圓滿解決，大團圓結局。
誰知，天意要這樣弄人。
 
 
 
我不敢相信地問：「佢…… 幾時過身架？」
 
「都大半年前啦，終年八十一歲，都算係笑喪喇。」
 
吓？
 
(第三章完)